İqlim dəyişikliyinə son qoymaq üçün ölkəmizdə hansı işlər görülür?

Bakı:

10 °C

93 %

6 m/s

Əlaqə

AZ RU EN

Ana səhifə / Xəbər lenti / İqlim dəyişikliyinə son qoymaq üçün ölkəmizdə hansı işlər görülür?

İqlim dəyişikliyinə son qoymaq üçün ölkəmizdə hansı işlər görülür?

05.12.2023 [10:40]

M.BAYRAMLI

İqlim dəyişikliyi, su qıtlığı, ərzaq təhlükəsizliyi insanları narahat edir. Uzun sürən quraqlıq və torpaqların şoranlaşması isə insanları aclıq təhlükəsi ilə üz-üzə qoyur. Bu problemlərin baş verməsində insanların da rolu az deyil. Araşdırmalara görə, əsrin sonunadək qlobal istiləşmə 2,8°C artacaq. Adambaşına düşən karbon izi təxminən 4 tondur. Buna ən çox səbəb olan ölkələr sırasında Çin, ABŞ, Hindistan, Aİ, İndoneziya, Rusiya və Braziliya yer alır. Çünki bu 7 ölkə qlobal istixana qazının, təxminən, yarısının səbəbkarıdır.

Azərbaycan (Bakı) isə 260-cı yerdə qərarlaşıb. Ətraf mühitə dəyən ziyanı minimuma endirmək üçün karbon emissiyalarının miqdarı müəyyən səviyyədən aşağı saxlanılmalıdır.

“Ekoloji davamlılıq Azərbaycanın inkişaf strategiyasında diqqət mərkəzində yer alıb, təmiz ətraf mühitə və yaşıl inkişafa sadiqlik ilk beş prioritet sahəyə daxildir. Yaşıl enerji transformasiyasının hərəkətverici qüvvəsi kimi, bərpa olunan enerji mənbələrinin 2030-cı ilə qədər Azərbaycanda elektrik enerjisi istehsalı üçün quraşdırılmış gücün 30%-ni təşkil edəcək”..

Bunu Azərbaycanın iqtisadiyyat naziri Mikayıl Cabbarov Dubayda keçirilən COP 28 konfransı çərçivəsində G77 və Çin liderlərinin sammitində deyib.

Onun sözlərinə görə, Azərbaycan istixana qazlarının əhəmiyyətli dərəcədə azaldılmasını hədəfləyir. Qaz emissiyalarını 2050-ci ilə qədər 40% faiz azaltmaq hədəflənib. Buraya Qarabağ və Şərqi Zəngəzur regionlarında iqlim dəyişikliyi ilə bağlı öhdəliklərin yerinə yetirilməsinə töhfə verən yaşıl enerji zonasının yaradılması da daxildir.

Bəs fərdi olaraq hansı tədbirləri görə bilərik? Şəxsi nəqliyyat vasitələrinin istifadəsini azaltmaqla işə başlaya bilərsiniz. Gündəlik həyatda ictimai nəqliyyatdan və ya velosipeddən istifadə edə biləcəyiniz ən böyük yaxşılıqdır. Eyni zamanda, sudan qənaətlə istifadə edin, təkrar emal edilə bilən məhsullara üstünlük verin. Daha az zibil “istehsal” edin. Kağız, plastik və şüşə tullantılarını bir-birindən ayıraraq təkrara emala verin. Endirimlərin toruna düşün gərəksiz geyim və ya tekstil məhsulları almayın. Bir sözlə, qlobal istiləşmənin yaratdığı iqlim dəyişikliyinə son qoymaq üçün ətraf mühiti təmiz saxlamaq, xüsusilə böyük şəhərlərdə yaşıllıq sahələri qorumaq, onların sayını artırmaq lazımdır. Gələcək nəsillərə daha təmiz və yaşana bilən dünya miras buraxmaq üçün ətraf mühitə daha həssas yanaşmalıyıq.

Paylaş:

Baxılıb: 557 dəfə