Cəbrayıl zəfəri həm də mənəvi gücün təntənəsidir

Bakı:

24 °C

88 %

4 m/s

Əlaqə

AZ RU EN

Ana səhifə / Arxiv / Cəbrayıl zəfəri həm də mənəvi gücün təntənəsidir

Cəbrayıl zəfəri həm də mənəvi gücün təntənəsidir

04.10.2025 [14:30]

Cəbrayıl rayonu 27 il ərzində Ermənistan ordusunun işğalı altında qaldı. Bu dövrdə rayonun bütün təsərrüfatı və yaşayış infrastrukturu yerlə-yeksan edilmiş, qədim mədəniyyət nümunələri və tarixi abidələr dağıdılaraq talan olunmuşdu. İşğal illərində Cəbrayılın təbii sərvətləri mənimsənilmiş, bölgəyə milyardlarla manatlıq ziyan vurulmuşdu. Lakin bu haqsızlıqlara 2020-ci ilin 4 oktyabrında son qoyuldu. Həmin gün Azərbaycanın şanlı salnaməsində ən əlamətdar günlərdən biri kimi qalacaq. Çünki məhz bu tarixdə qazanılan uğur yalnız Cəbrayılın azad olunması deyil, həm də Vətən müharibəsinin gələcək mərhələləri üçün dönüş nöqtəsi idi.Dünya müharibə təcrübəsində nadir hallarda rast gəlinən hadisə yaşandı: savaşın ilk günlərində kəndlər düşməndən geri alındı. Belə ki, 27 sentyabrda qəhrəman Azərbaycan əsgəri Cəbrayıl rayonunun Böyük Mərcanlı və Nüzgar kəndlərini işğaldan təmizlədi. 3 oktyabrda Suqovuşan qəsəbəsi, Talış kəndi və Cəbrayılın bir sıra digər yaşayış məntəqələri azad edildi. Bu qələbələr ordumuza daha böyük ruh və əzmkarlıq gətirdi. 4 oktyabrda isə , Ali Baş Komandan İlham Əliyev xalqa müraciətində Cəbrayıl şəhəri ilə yanaşı Karxulu, Şükürbəyli, Yuxarı Maralyan, Çərəkən, Daşkəsən, Horovlu, Decal, Mahmudlu və Cəfərabad kəndlərinin də işğaldan azad olunduğunu elan etdi. Bununla da Cəbrayıl rayonu tamamilə azad edildi və düşmən tərəf ağır itkilər verdi.4 oktyabr Cəbrayılın azad edilməsi günü kimi tarixə düşdü. Qələbədən qısa müddət sonra – 16 noyabr 2020-ci ildə Prezident İlham Əliyev və Birinci xanım Mehriban Əliyeva Cəbrayılda oldular. Dövlət başçısı burada və Xudafərin körpüsündə üçrəngli bayrağımızı ucaltdı. 2021-ci ilin 4 oktyabrında Cəbrayıla yenidən səfər edən Prezident “KAMAZ” ASC ilə “Gəncə Avtomobil Zavodu”nun birgə servis mərkəzinin, “Araz Vadisi İqtisadi Zonası” Sənaye Parkının, yeni xəstəxananın, məktəbin və çoxmənzilli yaşayış kompleksinin təməlini qoydu. Eyni zamanda, Cəbrayıl Memorial Kompleksinin və şəhərin bərpa layihəsinin də əsasını qoyaraq yerli sakinlərlə görüşdü.Azərbaycan Prezidentinin işğaldan azad olunmuş ərazilərə etdiyi hər bir səfər həmin torpaqlarda aparılan quruculuq işlərinə xüsusi önəm verildiyini təsdiqləyir və görülən tədbirlərə güclü dəstək rolunu oynayır. Bundan əlavə, 2020-ci ilin 24 dekabr və 2021-ci ilin 24 iyun tarixlərində imzalanmış sərəncamlarla Cəbrayıl uğrunda vuruşaraq qəhrəmanlıq göstərən minlərlə hərbi qulluqçu “Cəbrayılın azad olunmasına görə” medalı ilə təltif edildi. Bu təltiflər Vətən müharibəsi iştirakçılarına göstərilən yüksək qayğının və hörmətin bariz nümunəsidir.

Zaur Mehdiyev,

YAP Gədəbəy rayon təşkilatının sədr müavini

Paylaş:

Baxılıb: 657 dəfə