Yollarda təhlükəsizlik qlobal kampaniyası iştirakçılarının sayı artır

Bakı:

17 °C

63 %

9 m/s

Əlaqə

AZ RU EN

Ana səhifə / Arxiv / Yollarda təhlükəsizlik qlobal kampaniyası iştirakçılarının sayı artır

Yollarda təhlükəsizlik qlobal kampaniyası iştirakçılarının sayı artır

08.04.2026 [20:16]

Qazaxıstan BMT-nin qlobal maarifləndirmə kampaniyasına qoşulub. Bu kampaniya idman, kino və musiqi dünyasının tanınmış simaları tərəfindən dəstəklənən və yol hərəkəti təhlükəsizliyinin təşviqinə, habelə yol qəzalarında ölüm və xəsarətlərin sayının azaldılmasına yönəlmiş beynəlxalq təşəbbüsdür.

AZƏRTAC BMT-yə istinadla xəbər verir ki, kampaniya artıq dünyanın 80-dən çox ölkəsinə və təxminən 1000 şəhərinə yayılıb. Təşəbbüsə qoşulan Qazaxıstan yol hərəkəti təhlükəsizliyinin təşviqi üçün daha geniş beynəlxalq səylərin bir hissəsinə çevrilib.

2026-cı il aprelin 3-dən etibarən Astana və Almatıda Novak Cokoviç, Jan Reno, Maykl Fassbender və Mişel Yeonun yer aldığı kampaniyanı təbliğ edən reklam lövhələri və plakatlar quraşdırılıb.

Kampaniyaya “JCDecaux” ilə əməkdaşlıq və “Saatchi & Saatchi”nin dəstəyi ilə BMT Baş katibinin yol hərəkətinin təhlükəsizliyi üzrə xüsusi elçisi rəhbərlik edir. Bu təşəbbüs ictimai xadimləri, qərar qəbul edənləri və fəalları yol təhlükəsizliyinə dair aydın öhdəliklər götürməyə çağırır. Kampaniya sadə, effektiv və sübutlara əsaslanan təhlükəsizlik davranışlarını təşviq edir və əsas risk faktorlarını azaltmaq, daha təhlükəsiz, inklüziv və dayanıqlı şəhər mühiti yaratmaq üçün fəaliyyətə çağırış kimi xidmət edir.

BMT Baş katibinin yol hərəkətinin təhlükəsizliyi üzrə xüsusi elçisi Jan Todt qeyd edib: “Qazaxıstanda yol qəzaları hər il 2 mindən çox insanın həyatına son qoyur, ölkə daxilində ailələrə və icmalara təsir göstərir. Əldə edilən irəliləyişlərə - ölüm hallarının azalmasına və ciddi təhlükəsizlik kəməri tələblərinə baxmayaraq, sürət həddini aşma və sərxoş vəziyyətdə avtomobil idarə etmək kimi problemlər qalmaqdadır. Mobillik artdıqca, bütün yol istifadəçilərinin təhlükəsizliyini təmin etmək üçün davamlı səylər göstərilməlidir”.

Yol-nəqliyyat hadisələri ciddi qlobal problem olaraq qalır. Hər il dünyada təxminən 1,19 milyon insan yol qəzalarında həyatını itirir. Onlar, həmçinin gənclər arasında ölümün əsas səbəbi olaraq qalır. Qazaxıstan hökumətinin məlumatlarına görə, 2025-ci ildə 36.146 yol-nəqliyyat hadisəsi qeydə alınıb ki, bunlardan 1.796-sı ölümlə nəticələnib.

Təşəbbüsü dəstəkləyən beynəlxalq miqyasda məşhurlar arasında Didye Droqba, Patrik Dempsi, Şarl Lekler, Mark Markes, Kayli Minoq və Yussu N'Dur var. Kampaniyanın mesajlarının BMT-nin altı rəsmi dilində yayılmasına ümumilikdə 16 qlobal ulduz və Olimpiya çempionu kömək edir.

Paylaş:

Baxılıb: 190 dəfə