28 May – Azərbaycanın Müstəqillik salnaməsinin şanlı səhifəsi

Bakı:

18 °C

72 %

9 m/s

Əlaqə

AZ RU EN

Ana səhifə / Arxiv / 28 May – Azərbaycanın Müstəqillik salnaməsinin şanlı səhifəsi

28 May – Azərbaycanın Müstəqillik salnaməsinin şanlı səhifəsi

25.05.2026 [12:31]

28 May Azərbaycan xalqının tarixində yalnız mühüm siyasi hadisə deyil, həm də milli qürurun, azadlıq iradəsinin və dövlətçilik ənənələrinin təntənəsidir. 1918-ci il mayın 28-də Azərbaycan Xalq Cümhuriyyətinin elan olunması ilə Şərqdə ilk parlamentli demokratik respublikanın əsası qoyuldu. Bu tarixi hadisə xalqımızın əsrlər boyu yaşatdığı istiqlal arzularının gerçəyə çevrilməsi, milli özünüdərkin və dövlətçilik düşüncəsinin yeni mərhələyə qədəm qoyması idi.

Azərbaycan Xalq Cümhuriyyəti cəmi 23 ay yaşamasına baxmayaraq, milli dövlətçilik tariximizdə silinməz iz qoydu. Həmin dövrdə dövlət atributlarının qəbul edilməsi, parlamentin yaradılması, milli ordunun formalaşdırılması, təhsil və mədəniyyət sahəsində mühüm islahatların həyata keçirilməsi gənc respublikanın nə qədər böyük siyasi iradəyə malik olduğunu nümayiş etdirdi. Xalq Cümhuriyyəti sübut etdi ki, Azərbaycan xalqı müstəqil dövlət qurmağa və onu idarə etməyə qadirdir.

Xüsusilə qeyd edilməlidir ki, Azərbaycan Xalq Cümhuriyyəti demokratik dəyərlərə böyük önəm verirdi. Qadınlara seçki hüququnun verilməsi həmin dövr üçün olduqca mühüm və tarixi addım idi. Bu qərar bir çox Avropa dövlətlərindən daha əvvəl qəbul edilmişdi və Azərbaycan dövlətinin mütərəqqi düşüncəyə sahib olduğunu göstərirdi. Milli, dini və etnik mənsubiyyətindən asılı olmayaraq bütün vətəndaşların hüquqlarının qorunması Cümhuriyyətin əsas prinsiplərindən biri idi.

Mürəkkəb beynəlxalq vəziyyət və daxili çətinliklər səbəbindən Azərbaycan Xalq Cümhuriyyəti uzunömürlü olmadı. 1920-ci ildə müstəqilliyimiz itirilsə də, xalqın azadlıq ruhu heç zaman sönmədi. Azərbaycan xalqı istiqlal ideyalarını öz yaddaşında yaşatdı və gələcək nəsillərə ötürdü.

1991-ci ildə Azərbaycan yenidən dövlət müstəqilliyini bərpa etdi. Ancaq müstəqilliyin ilk illərində ölkədə siyasi böhran, iqtisadi tənəzzül və vətəndaş qarşıdurması hökm sürürdü. Məhz belə ağır bir dövrdə xalqın tələbi ilə hakimiyyətə qayıdan Heydər Əliyev Azərbaycan dövlətçiliyini xilas etdi, ölkədə sabitlik yaratdı və müstəqilliyimizin əbədi, dönməz xarakter almasının əsasını qoydu. Ulu Öndərin “Müstəqilliyi qorumaq, saxlamaq onu əldə etməkdən qat-qat çətindir” fikri bu gün də dövlətçilik siyasətimizin əsas istiqamətlərindən biri kimi səslənir.

Bu gün müasir Azərbaycan İlham Əliyevin rəhbərliyi ilə böyük inkişaf yolu keçir. Azərbaycanın beynəlxalq nüfuzu artır, iqtisadi qüdrəti möhkəmlənir, siyasi mövqeyi güclənir. Ən önəmlisi isə Azərbaycan Bayrağı artıq işğaldan azad edilmiş torpaqlarımızda qürurla dalğalanır. Bu, Azərbaycan Xalq Cümhuriyyətinin qurucularının arzuladığı güclü və qalib dövlət ideyasının təntənəsidir.

Qarabağ və Şərqi Zəngəzurda həyata keçirilən genişmiqyaslı bərpa-quruculuq işləri də milli dövlətçilik tariximizin yeni mərhələsini təşkil edir. Azad edilmiş torpaqlarda həyat yenidən canlanır, şəhər və kəndlər müasir şəkildə yenidən qurulur. Bu proses Azərbaycan dövlətinin gücünü, xalq-iqtidar birliyini və milli həmrəyliyi bütün dünyaya nümayiş etdirir.

28 May Müstəqillik Günü yalnız keçmişə ehtiram deyil, həm də gələcəyə böyük inamın ifadəsidir. Bu tarix bizə xatırladır ki, müstəqillik xalqımızın ən böyük sərvəti, dövlətçilik isə ən müqəddəs dəyəridir. Azərbaycan xalqı öz müstəqilliyini qorumağa, daha da möhkəmləndirməyə və gələcək nəsillərə güclü dövlət əmanət etməyə qadirdir.

Bu gün 28 May ruhu Azərbaycanın hər bir guşəsində yaşayır. Üçrəngli bayrağımızın yüksəklərdə dalğalanması, xalqımızın birlik və həmrəylik nümayiş etdirməsi Azərbaycanın müstəqillik yolunun əbədi olduğunu bir daha təsdiqləyir.

Gündüz Bayramov

YAP Samux rayon təşkilatının sədri

Paylaş:

Baxılıb: 333 dəfə