Aqrar sahənin inkişafı dövlətin xüsusi diqqət mərkəzindədir

Bakı:

15 °C

88 %

0 m/s

Əlaqə

AZ RU EN

Ana səhifə / Arxiv / Aqrar sahənin inkişafı dövlətin xüsusi diqqət mərkəzindədir

Aqrar sahənin inkişafı dövlətin xüsusi diqqət mərkəzindədir

26.05.2026 [14:25]

Ölkəmizdə bütün sahələrdə olduğu kimi, kənd təsərrüfatının inkişafına da daim xüsusi diqqət və qayğı göstərilir. Əhalinin ərzaq təhlükəsizliyinin təmin edilməsi, regionların sosial-iqtisadi inkişafının sürətləndirilməsi, kənd yerlərində məşğulluğun artırılması və fermerlərin rifahının yüksəldilməsi dövlət siyasətinin prioritet istiqamətlərindən biridir. Bu məqsədlə kənd təsərrüfatında müasir texnologiyaların tətbiqi, subsidiyaların verilməsi, aqrar sahəyə dövlət dəstəyinin genişləndirilməsi, suvarma və infrastruktur layihələrinin həyata keçirilməsi, həmçinin məhsuldarlığın artırılmasına yönəlmiş tədbirlər ardıcıl şəkildə davam etdirilir. Görülən işlər nəticəsində kənd təsərrüfatı ölkə iqtisadiyyatının dayanıqlı inkişafına, ixrac potensialının güclənməsinə və kənd əhalisinin həyat səviyyəsinin yüksəlməsinə mühüm töhfə verir.

Mayın 25-də Azərbaycan Respublikasının Prezidenti İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib. Prezidenti İlham Əliyevin müşavirədə etdiyi geniş çıxış ölkəmizdə aqrar sahənin inkişafının dövlət siyasətinin əsas prioritet istiqamətlərindən biri olduğunu bir daha təsdiqlədi. Dövlət başçısı çıxışında son illərdə kənd təsərrüfatı sahəsində həyata keçirilən islahatlar, regional inkişaf proqramları, əldə olunan nəticələr və qarşıda duran əsas vəzifələr barədə ətraflı danışdı.

Prezident İlham Əliyev vurğuladı ki, hələ 2004-cü ildə qəbul edilən ilk Regional İnkişaf Proqramı kənd təsərrüfatının və bölgələrin inkişafında mühüm rol oynayıb. Sonrakı illərdə qəbul edilən bir neçə regional inkişaf proqramı nəticəsində bölgələrdə genişmiqyaslı infrastruktur layihələri həyata keçirilib, kəndlərin siması dəyişib, məşğulluq artıb və insanların rifah halı yüksəlib.

Dövlət başçısı çıxışında vurğuladı ki, hələ 2004-cü ildən həyata keçirilən regional inkişaf proqramlarının əsas istiqamətlərindən biri məhz kənd təsərrüfatının inkişafı olmuşdur. Bu yanaşma nəticəsində ölkədə kənd yollarının yenilənməsi, elektrik təminatının yaxşılaşdırılması, su anbarlarının tikilməsi, suvarma sistemlərinin genişləndirilməsi və aqrar infrastrukturun gücləndirilməsi istiqamətində mühüm nəticələr əldə edilmişdir. Bu isə kənd təsərrüfatının sistemli və davamlı inkişafına şərait yaratmışdır.

Müşavirədə təqdim olunan inkişaf perspektivləri aqrar sahədə yeni transformasiya mərhələsinin başlandığını göstərir. Əsas məqsəd resurslardan səmərəli istifadə, müasir texnologiyaların tətbiqi, məhsuldarlığın artırılması və rəqabətqabiliyyətli kənd təsərrüfatının formalaşdırılmasıdır. Bu transformasiyanın əsas istiqamətləri resurs səmərəliliyi, yüksək əlavə dəyərli istehsal, bazar inteqrasiyası, texnologiya və innovasiya əsaslı inkişaf modelinə keçid kimi müəyyənləşdirilib. Bu yanaşma kənd təsərrüfatının ənənəvi istehsal sahəsindən daha müasir, rəqəmsallaşmış və ixracyönümlü sektora çevrilməsinə xidmət edir.

Prezident İlham Əliyev qeyd etmişdir ki, aqroparkların yaradılması kənd təsərrüfatının inkişafında mühüm rol oynamışdır. Bununla yanaşı, ölkədə buğda istehsalının və özünü təminetmə göstəricisinin artırılmasının vacibliyi vurğulanmış, ərzaq təhlükəsizliyi baxımından daxili istehsalın gücləndirilməsinin əsas hədəflərdən biri olduğu bildirilmişdir.

Dövlətimizin başçısı digər dənli bitkilər, kartof, tərəvəz, bostan məhsulları, meyvə və giləmeyvə istehsalı sahəsində vəziyyətin ümumilikdə müsbət olduğunu qeyd etmiş, xüsusilə fındıqçılıq sahəsində əldə olunan uğurları diqqətə çatdırmışdır. Bildirilmişdir ki, Azərbaycan hazırda qoz-fındıq istehsalı üzrə dünyada qabaqcıl yerlərdən birini tutur.

Çıxış zamanı heyvandarlıq məhsulları, quşçuluq, balıqçılıq, bitki yağları, çayçılıq, şəkər və digər məhsullar üzrə təminat göstəriciləri açıqlanmış, investorlar idxal olunan məhsulların ölkə daxilində istehsalına töhfə verməyə dəvət edilmişdir.

“Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı”nın təsdiq edilməsi və bundan irəli gələn bəzi məsələlərin tənzimlənməsi haqqında Azərbaycan Respublikası Prezidentinin Sərəncamı ölkədə aqrar sektorun dayanıqlı və müasir əsaslarla inkişafını hədəfləyən strateji əhəmiyyətli sənəddir.

Prezident İlham Əliyevin rəhbərliyi ilə həyata keçirilən məqsədyönlü siyasət nəticəsində Azərbaycanın kənd təsərrüfatı sahəsində yeni inkişaf mərhələsinə qədəm qoyacağına, ərzaq təhlükəsizliyinin daha da möhkəmlənəcəyinə, aqrar sektorun dayanıqlı inkişafının təmin olunacağına və regionların sosial-iqtisadi inkişafının davamlı xarakter alacağına əminlik ifadə olunub.

Rövlan Heydərov

YAP Naftalan şəhər təşkilatının sədri

Paylaş:

Baxılıb: 86 dəfə