Şuşadan Avropaya Uzanan Strateji Tərəfdaşlıq: Azərbaycan–Slovakiya Münasibətlərində Yeni Mərhələ

Bakı:

25 °C

65 %

8 m/s

Əlaqə

AZ RU EN

Ana səhifə / Arxiv / Şuşadan Avropaya Uzanan Strateji Tərəfdaşlıq: Azərbaycan–Slovakiya Münasibətlərində Yeni Mərhələ

Şuşadan Avropaya Uzanan Strateji Tərəfdaşlıq: Azərbaycan–Slovakiya Münasibətlərində Yeni Mərhələ

16.07.2026 [16:34]

Şuşa artıq yalnız Azərbaycanın mədəniyyət paytaxtı deyil. Bu şəhər son illərdə ölkənin diplomatik mərkəzlərindən birinə çevrilib. Dünyanın müxtəlif ölkələrinin dövlət və hökumət başçılarının, beynəlxalq təşkilatların rəhbərlərinin məhz Şuşaya səfər etməsi Azərbaycanın əldə etdiyi tarixi Zəfərin beynəlxalq aləmdə qəbul edilməsinin, yeni reallıqların tanınmasının və Qarabağın dirçəlişinin dünya ictimaiyyətinə nümayiş etdirilməsinin bariz ifadəsidir. Slovakiya Prezidenti Peter Pelleqrinin də səfərinə məhz Şuşadan başlaması xüsusi siyasi və simvolik məna daşıyır.

Prezident İlham Əliyevin Slovakiya Respublikasının Prezidenti Peter Pelleqrini ilə Şuşada keçirdiyi görüş və verdiyi bəyanat Azərbaycan xarici siyasətinin mühüm istiqamətlərindən biri olan Avropa ilə əməkdaşlığın yeni mərhələyə yüksəldiyini nümayiş etdirdi. Bu bəyanat təkcə iki dövlət arasında münasibətlərin cari vəziyyətini deyil, həm də gələcək inkişaf perspektivlərini, regional əməkdaşlığın mahiyyətini və Qarabağın bərpası prosesinə beynəlxalq dəstəyin əhəmiyyətini əks etdirən mühüm siyasi sənəd kimi qiymətləndirilə bilər.

Prezident İlham Əliyevin çıxışında xüsusi vurğulanan məqamlardan biri Slovakiya ilə Azərbaycan arasında siyasi dialoqun davamlı və sistemli xarakter alması oldu. Dövlət başçısı ötən ilin sonunda Slovakiyaya etdiyi rəsmi səfəri xatırladaraq göstərilən yüksək qonaqpərvərliyə görə təşəkkürünü ifadə etdi. Bu diplomatik jest eyni zamanda dövlətlərarası münasibətlərin qarşılıqlı hörmət və etimada söykəndiyini nümayiş etdirdi.

Bu münasibətlərin əsasını isə 2024-cü ildə imzalanmış Strateji tərəfdaşlığa dair Birgə Bəyannamə təşkil edir. Həmin sənəd iki ölkə arasında əlaqələrin hüquqi və siyasi bazasını daha da möhkəmləndirib. Prezident İlham Əliyevin vurğuladığı kimi, sənəd kağız üzərində qalan niyyətlər toplusu deyil, artıq praktiki nəticələr verən fəaliyyət proqramıdır. Birgə layihələrin icrası, davamlı siyasi məsləhətləşmələr və müxtəlif sahələrdə əldə olunan razılaşmalar strateji tərəfdaşlığın real məzmun qazandığını göstərir.

Beynəlxalq təcrübə göstərir ki, strateji tərəfdaşlıq yalnız qarşılıqlı etimad və güclü siyasi iradə olduğu halda uğurla inkişaf edir. Azərbaycan ilə Slovakiya münasibətlərində də məhz bu amillər özünü aydın şəkildə göstərir. Hər iki ölkə qarşılıqlı faydaya əsaslanan əməkdaşlıq modelini seçərək uzunmüddətli tərəfdaşlıq qurmağa nail olub.

Şuşada səsləndirilən ən mühüm mesajlardan biri Slovakiyanın Qarabağın bərpasına verdiyi dəstəklə bağlı idi. Prezident İlham Əliyev xüsusi minnətdarlıq hissi ilə vurğuladı ki, Slovakiya şirkəti Ağdam rayonunun Baş Qərvənd kəndində "Ağıllı kənd" layihəsini həyata keçirir. Dövlət başçılarının həmin layihə ilə yerində tanış olması əməkdaşlığın artıq konkret nəticələr verdiyini göstərən əhəmiyyətli nümunədir.

Qarabağın yenidən qurulması Azərbaycanın milli inkişaf strategiyasının əsas istiqamətlərindən biridir. İşğaldan azad olunmuş ərazilərdə müasir şəhərlərin və kəndlərin salınması, "Ağıllı şəhər" və "Ağıllı kənd" konsepsiyalarının tətbiqi regionun gələcəyinə hesablanmış strateji yanaşmadır. Slovakiya şirkətlərinin bu prosesdə iştirak etməsi isə Avropa biznes dairələrinin Qarabağın iqtisadi potensialına və Azərbaycanın həyata keçirdiyi layihələrə göstərdiyi etimadın göstəricisidir.

Prezident İlham Əliyevin çıxışında xüsusi vurğulanan digər mühüm məqam münasibətlərin səmimiliyi və qarşılıqlı etimada əsaslanması idi. Dövlət başçısı Peter Pelleqrinin Azərbaycana ilk dəfə gəlmədiyini xatırladaraq onun parlament sədri, Baş nazir və daha sonra Prezident kimi ölkəmizə müxtəlif dövrlərdə səfərlər etdiyini qeyd etdi. Bu fakt təsadüfi deyil. Bu, Peter Pelleqrinin Azərbaycana və Azərbaycanla əməkdaşlığa xüsusi önəm verdiyini göstərir.

Şuşadan verilən mesajlar Azərbaycanın xarici siyasətinin uğurlarını bir daha nümayiş etdirdi. Azərbaycan bu gün həm regionun aparıcı dövləti, həm də Avropa üçün etibarlı tərəfdaş kimi qəbul olunur. Ölkəmizin təşəbbüsü ilə həyata keçirilən beynəlxalq enerji, nəqliyyat və logistika layihələri Avrasiyanın iqtisadi xəritəsini dəyişdirən mühüm təşəbbüslər sırasındadır. Slovakiya ilə münasibətlərin inkişafı da məhz bu strateji xəttin tərkib hissəsidir.

Prezident İlham Əliyevin "biz konkret işlərin tərəfdarıyıq" fikri isə Azərbaycan diplomatiyasının əsas prinsipini ifadə edir. Bu siyasət bəyanatlardan daha çox real layihələrə, qarşılıqlı faydaya və uzunmüddətli əməkdaşlığa söykənir. Son illərdə həyata keçirilən layihələr də sübut edir ki, Bakı əməkdaşlıq etdiyi bütün tərəfdaşlarla konkret nəticələr əldə etməyə üstünlük verir.

Vəli Sərxanlı

YAP Culfa rayon təşkilatının fəalı

Paylaş:

Baxılıb: 480 dəfə