Dövlət Suverenliyi – milli iradəmizin təntənəsi

Bakı:

16 °C

77 %

1 m/s

Əlaqə

AZ RU EN

Ana səhifə / Arxiv / Dövlət Suverenliyi – milli iradəmizin təntənəsi

Dövlət Suverenliyi – milli iradəmizin təntənəsi

18.09.2026 [14:22]

Hər bir xalqın tarixində onun milli iradəsini, dövlətçilik əzmini və müstəqillik uğrunda mübarizəsini təcəssüm etdirən əlamətdar günlər vardır. Azərbaycan xalqı üçün belə mühüm tarixlərdən biri də 20 sentyabr – Dövlət Suverenliyi Günüdür. Bu gün dövlətimizin müstəqilliyinin, ərazi bütövlüyünün və suverenliyinin tam bərpa olunmasının rəmzi kimi xalqımızın yaddaşında əbədi yaşayacaq.

Azərbaycan xalqı tarix boyu öz dövlətçilik ənənələrini qoruyub saxlamış, üzləşdiyi ağır sınaqlara və məhrumiyyətlərə baxmayaraq, müstəqillik amalından heç vaxt geri çəkilməmişdir. XX əsrin sonlarında ölkəmizin ərazilərinin işğala məruz qalması, torpaqlarımızın uzun illər düşmən tapdağında qalması xalqımız üçün böyük faciə olmaqla yanaşı, dövlətimizin suveren hüquqlarının həmin ərazilərdə həyata keçirilməsinə də mane olmuşdur.

Lakin Azərbaycan dövlətinin ardıcıl və məqsədyönlü siyasəti, xalqımızın milli həmrəyliyi və Silahlı Qüvvələrimizin gücü nəticəsində bu tarixi ədalətsizliyə son qoyuldu. 2020-ci ildə 44 günlük Vətən müharibəsində qazanılan tarixi Zəfər Azərbaycanın ərazi bütövlüyünün böyük hissəsinin bərpasını təmin etdi və ölkəmizin dövlətçilik tarixində yeni mərhələnin əsasını qoydu. Bu Qələbə həm də Azərbaycan xalqının öz torpaqlarına bağlılığının, milli iradəsinin və dövlətçilik əzminin parlaq təcəssümü oldu.

2023-cü il sentyabrın 19-da Azərbaycanın Qarabağ iqtisadi rayonunda baş verən genişmiqyaslı təxribatların qarşısının alınması və ölkəmizin suverenliyinin təmin edilməsi məqsədilə lokal xarakterli antiterror tədbirlərinə başlanıldı. 23 saat ərzində Azərbaycan Ordusunun həyata keçirdiyi uğurlu əməliyyat nəticəsində qarşıya qoyulan vəzifələr yüksək peşəkarlıqla yerinə yetirildi. Sentyabrın 20-də Azərbaycan Respublikasının bütün ərazisində dövlət suverenliyinin tam bərpa olunması ilə xalqımızın uzun illər daşıdığı tarixi arzu reallığa çevrildi. Azərbaycan Respublikasının Dövlət Bayrağı ölkəmizin suverenliyinin bərqərar olduğu bütün ərazilərdə əzəmətlə dalğalanmağa başladı.

Bu tarixi hadisənin əhəmiyyətini nəzərə alaraq Azərbaycan Respublikasının Prezidenti İlham Əliyev 19 sentyabr 2024-cü il tarixində “Azərbaycan Respublikasında Dövlət Suverenliyi Gününün təsis edilməsi haqqında” Sərəncam imzaladı. Sərəncama əsasən, hər il sentyabrın 20-si Azərbaycan Respublikasında Dövlət Suverenliyi Günü kimi qeyd edilir. Sənəddə xüsusi olaraq vurğulanır ki, 2023-cü il sentyabrın 20-də Azərbaycan Respublikasının bütün ərazisində qanunun aliliyi təmin edilmiş və dövlət suverenliyi bərpa olunmuşdur.

Dövlət Suverenliyi Günü, ilk növbədə, şəhidlərimizin müqəddəs xatirəsinə ehtiram, qəhrəman hərbçilərimizin şücaətinə verilən yüksək qiymət və Azərbaycan xalqının milli iradəsinin təntənəsidir. Bu Zəfər bizə bir daha göstərdi ki, dövlətin gücü yalnız onun iqtisadi və hərbi imkanları ilə deyil, həm də xalqın dövlətçilik ətrafında sıx birliyindən qaynaqlanır. Suverenlik isə yalnız siyasi anlayış deyil, milli ləyaqətin, azadlığın və dövlət müstəqilliyinin ən mühüm ifadəsidir.

20 Sentyabr həm də gələcək nəsillərə ötürüləcək böyük tarixi irsin başlanğıc nöqtələrindən biridir. Bu gün Azərbaycanın qarşısında yeni vəzifələr dayanır: işğaldan azad edilmiş ərazilərin bərpası, dayanıqlı inkişafın təmin olunması, həmin torpaqlara həyatın qaytarılması və dövlətimizin daha da gücləndirilməsi. Bu istiqamətdə həyata keçirilən genişmiqyaslı quruculuq işləri Zəfərin yalnız hərbi deyil, həm də sosial-iqtisadi və mənəvi nəticələrinin möhkəmləndirilməsinə xidmət edir.

Dövlət Suverenliyi Günü Azərbaycan xalqının tarixində yeni bir qürur səhifəsidir. Bu əlamətdar tarix dövlətimizin ərazi bütövlüyünün və suverenliyinin toxunulmazlığını, xalqımızın milli iradəsinin dönməzliyini nümayiş etdirir. Bu gün Azərbaycan öz taleyinin sahibidir, öz ərazisində Konstitusiyasının və qanunlarının aliliyini təmin edən müstəqil dövlətdir. Dövlət suverenliyimiz xalqımızın ən böyük milli sərvətlərindən biri, şəhidlərimizin bizə əmanət etdiyi müqəddəs dəyərdir.

20 Sentyabr – Dövlət Suverenliyi Günü xalqımızın Zəfər yaddaşını yaşadan, dövlətçilik qürurunu daha da möhkəmləndirən və gələcəyə inamımızı artıran əlamətdar bir gündür. Bu tarix Azərbaycan dövlətinin gücünün, xalqımızın birliyinin və milli iradəsinin təntənəsi kimi daim yaşayacaq.

Mələk Rzayeva

YAP Kəngərli rayon təşkilatının əməkdaşı

Paylaş:

Baxılıb: 300 dəfə