Türk dünyası təhlükəsizlik və həmrəyliyin yeni ünvanıdır

Bakı:

24 °C

88 %

9 m/s

Əlaqə

AZ RU EN

Ana səhifə / Arxiv / Türk dünyası təhlükəsizlik və həmrəyliyin yeni ünvanıdır

Türk dünyası təhlükəsizlik və həmrəyliyin yeni ünvanıdır

22.09.2026 [10:59]

Sentyabrın 17-də Prezident İlham Əliyevin Türk Dövlətləri Təşkilatına üzv ölkələrin təhlükəsizlik üzrə rəhbər şəxsləri ilə görüşü Türk dünyasının qarşısında dayanan mühüm məsələlərin müzakirəsi baxımından xüsusi əhəmiyyət daşıdı. Bakıda keçirilən görüşdə TDT-nin təhlükəsizlik gündəliyi ilə yanaşı, təşkilata üzv dövlətlər arasında qarşılıqlı fəaliyyətin daha da gücləndirilməsi, beynəlxalq proseslərdə təşkilatın rolunun artırılması və müasir çağırışlara birgə cavab verilməsi məsələləri diqqət mərkəzində oldu.

Prezident İlham Əliyevin çıxışında diqqəti cəlb edən əsas məqamlardan biri Türk dünyasına münasibətin mahiyyətini ifadə edən “Türk dünyası bizim ailəmizdir və bizim başqa ailəmiz yoxdur” fikri oldu. Bu ifadə Azərbaycanın TDT-yə münasibətinin yalnız siyasi və iqtisadi əməkdaşlıqla məhdudlaşmadığını göstərir. Ümumi tarix, dil, mədəniyyət, mənəvi dəyərlər və etnik yaxınlıq Türk dövlətlərini bir-birinə bağlayan mühüm amillər kimi təqdim olunur. Dövlətimizin başçısı qeyd etdi ki, bu mənəvi birlik və ortaq köklər təşkilatın möhkəmlənməsində xüsusi rol oynayır.

Bu baxımdan TDT-nin inkişafında təhlükəsizlik məsələsinin xüsusi çəkisi var. Prezident İlham Əliyev bildirdi ki, geniş coğrafiyada ictimai asayiş və müxtəlif terror təhdidləri ilə bağlı vəziyyət nəzarət altındadır. Lakin mövcud vəziyyət arxayınlaşmağa əsas vermir. Çünki ətraf regionlarda müharibələr davam edir, münaqişələrin coğrafiyası genişlənir və təhlükəsizlik mühiti daim dəyişir. Bu reallıq dövlət təhlükəsizliyinə cavabdeh qurumlar arasında operativ məlumat mübadiləsinin, təcrübə mübadiləsinin və birgə fəaliyyətin daha da gücləndirilməsini zəruri edir.

Müasir dövrdə təhlükəsizlik anlayışı yalnız fiziki təhlükələrlə məhdudlaşmır. Dövlətlərin konstitusiya quruluşuna, ictimai sabitliyə və milli-mənəvi dəyərlərə qarşı ideoloji təxribatlar, informasiya və kiberməkanda yaranan risklər də diqqət tələb edir. Prezident İlham Əliyev məhz buna görə TDT çərçivəsində əlaqələndirilmiş fəaliyyətin və profilaktik tədbirlərin gücləndirilməsinin vacibliyini vurğuladı.

Azərbaycanın TDT məkanında fəal əməkdaşlığı ikitərəfli münasibətlərdə də özünü göstərir. Prezident İlham Əliyev çıxışında Türkiyə, Qazaxıstan, Qırğızıstan və Özbəkistanla müttəfiqlik haqqında sənədlərin imzalandığını, Qazaxıstan, Özbəkistan və Qırğızıstanla birgə investisiya fondlarının yaradıldığını diqqətə çatdırdı. Bu münasibətlər siyasi dialoqla yanaşı, iqtisadi, nəqliyyat, enerji və humanitar sahələri də əhatə edir.

Xüsusilə Azərbaycan-Qazaxıstan münasibətləri barədə Prezident İlham Əliyevin fikirləri iki ölkə arasındakı əlaqələrin strateji, müttəfiqlik və qardaşlıq xarakterini bir daha nümayiş etdirdi. Dövlətimizin başçısı Azərbaycan və Qazaxıstanın bundan sonra da fəal qarşılıqlı fəaliyyət göstərəcəyinə və xalqların rifahı naminə çalışacağına əminliyini ifadə etdi. O, Qazaxıstanın Qarabağın bərpasına verdiyi dəstəyi xüsusi minnətdarlıqla qeyd etdi.

Görüşdə beynəlxalq hüquq məsələsi də xüsusi yer tutdu. Prezident İlham Əliyev bildirdi ki, beynəlxalq hüququn üstünlüyünün qorunması vacibdir. Dövlətimizin başçısı Azərbaycanın uzun illər üzləşdiyi problemin timsalında beynəlxalq mexanizmlərin effektivliyinin əhəmiyyətini vurğuladı və qeyd etdi ki, beynəlxalq hüquq normalarının pozulmasına imkan verilməməlidir.

Prezident İlham Əliyevin “beynəlxalq hüquq iflic vəziyyətinə düşmüşdü” fikri məhz bu kontekstdə səsləndirildi. Dövlətimizin başçısı bildirdi ki, BMT Təhlükəsizlik Şurasının qətnamələrinin icrası təmin edilsəydi, Azərbaycan öz hüquqlarını döyüş meydanında bərpa etməyə məcbur qalmazdı. Onun fikrincə, münaqişələrin qarşısının alınması və onların sülh yolu ilə həlli üçün beynəlxalq hüququn işlək mexanizmlərinin yaradılması zəruridir.

Beləliklə, sentyabrın 17-də Bakıda keçirilən görüş Türk Dövlətləri Təşkilatının qarşısında duran vəzifələrin yalnız bugünkü təhlükəsizlik çağırışları ilə məhdudlaşmadığını göstərdi. Burada söhbət eyni zamanda ortaq dəyərlərin qorunmasından, dövlətlərarası həmrəyliyin möhkəmləndirilməsindən, qarşılıqlı rifahın təmin edilməsindən və beynəlxalq hüququn üstünlüyünün müdafiəsindən gedir.

Azərbaycan Prezidentinin mesajı aydındır: dəyişən dünyada Türk dövlətlərinin qarşılıqlı etimadı, təhlükəsizlik sahəsində əməkdaşlığı və birlikdə hərəkət etmək imkanları xüsusi əhəmiyyət daşıyır. TDT-nin potensialının gücləndirilməsi isə üzv ölkələrin xalqlarının təhlükəsizliyinə, rifahına və gələcək inkişafına xidmət edən mühüm istiqamət kimi önə çıxır.

Sevinc Xəlilova

YAP Samux rayon təşkilatının sədr müavini