BMqT: Bu il Aralıq dənizində minə yaxın miqrant həlak olub

Bakı:

27 °C

48 %

6 m/s

Əlaqə

AZ RU EN

Ana səhifə / Dünya / BMqT: Bu il Aralıq dənizində minə yaxın miqrant həlak olub

BMqT: Bu il Aralıq dənizində minə yaxın miqrant həlak olub

08.04.2026 [22:25]

Son aylar Aralıq dənizində gəmi və qayıqların batması nəticəsində 180-dən çox miqrantın öldüyü və ya itkin düşdüyü ehtimal olunur. Beynəlxalq Miqrasiya Təşkilatının (BMqT) yeni məlumatlarına görə, 2026-cı ildə ölənlərin ümumi sayı artıq 1000 nəfərə yaxınlaşır.

AZƏRTAC BMT-nin veb-saytına istinadla xəbər verir ki, bu il təkcə Mərkəzi Aralıq dənizində təxminən 765 nəfər ölüb. Bu, ötən ilin eyni dövrü ilə müqayisədə 460 nəfər çoxdur. Ümumilikdə, 2026-cı ildə Aralıq dənizində azı 990 ölüm hadisəsi qeydə alınıb.

“Bu faciələr bir daha göstərir ki, çoxlu sayda insan təhlükəli yollarda həyatlarını təhlükəyə atmağa davam edir. Həyatları xilas etmək bizim prioritetimiz olmalıdır. Bununla belə, biz, həmçinin həssas insanları istismar edən insan alverçiləri və qaçaqmalçılarının qarşısını almaq, habelə təhlükəsiz və müntəzəm miqrasiya yollarını genişləndirmək üçün daha qətiyyətli və əlaqələndirilmiş səylər göstərməliyik”, -deyə BMqT-nin baş direktoru Emi Poup bildirib.

Aprelin 5-də Aralıq dənizində qayığın batması nəticəsində 80-dən çox miqrant itkin düşüb. Təxminən 120 nəfərin olduğu gəmi Liviyanın Tadcura limanından yola düşüb, lakin pis hava şəraiti səbəbindən batmağa başlayıb və nəticədə faciə baş verib. Ümumilikdə, 32 nəfər ticarət gəmisi tərəfindən xilas edilib və daha sonra İtaliya Sahil Mühafizəsi tərəfindən Lampeduzaya aparılıb. Hazırda BMqT əməkdaşları onlara kömək edirlər.

Bu ayın əvvəlində İtaliyanın cənub sahillərində, Lampeduza yaxınlığında bir gəmidə 19 nəfərin cəsədi tapılıb. Sağ qalanların sözlərinə görə, qayıq 28-29 mart gecəsi Liviyanın Zuvara rayonundan yola düşüb. Qadınlar və uşaqlar da daxil olmaqla, dənizdə 58 nəfər xilas edilib, onların bəzilərinin vəziyyəti ağırdır. Sağ qalanlar Lampeduza adasındakı qəbul mərkəzində müalicə olunurlar.

Türkiyənin Bodrum sahillərində - Egey dənizində Yunanıstana gedən qayığın batması nəticəsində isə azı 19 miqrant həlak olub. Bir neçə nəfəri xilas etmək mümkün olub.

Dəniz yolu ilə Avropaya gələn miqrantların sayında kəskin azalmaya baxmayaraq, ölənlərin sayı durmadan artır. Məsələn, İtaliya 2026-cı ilin əvvəlindən bəri təxminən 6200 miqrantın gəlişini qeydə alıb, 2025-ci ilin eyni dövründə isə bu rəqəm 9400 nəfər olub.

BMqT dənizdə insanların xilas edilməsi üçün əlaqələndirilmiş səylərə, eləcə də təhlükəli marşrutlardan asılılığı azaltmaq məqsədilə qanuni miqrasiya yollarının genişləndirilməsinə çağırır.

Paylaş:

Baxılıb: 558 dəfə