Sarkisyanın istefası gündəmdədir...

Bakı:

27 °C

47 %

5 m/s

Əlaqə

AZ RU EN

Ana səhifə / Dünya / Sarkisyanın istefası gündəmdədir...

Sarkisyanın istefası gündəmdədir...

20.02.2015 [00:30]

Ermənistan mətbuatı bu ölkədə siyasi gərginliyin daha da kəskinləşərək vətəndaş müharibəsi həddinə çatacağını diqqətə çatdırır
Siyasi böhran şəraitində olan Ermənistanda ictimai-siyasi kataklizmlər daha da güclənir. Belə ki, repressiyaya məruz qalan ictimai fəallar və siyasi subyektlərin Serj Sarkisyan hakimiyyətinə qarşı etiraz səsini ucaltmaları bu ölkə daxilində kəskin qarşıdurma ehtimalını daha da artırıb. Hakimiyyətə müxalif siyasi qüvvələrin etiraz forması daha çox mitinqlər və aksiyalar şəklindədir. İşğalçı ölkə KİV-i yazır ki, qarşıdakı günlərdə mitinq-aksiyaların artması gözləniləndir. Ermənistan mətbuatı, həmçinin, siyasi gərginliyin daha da kəskinləşərək vətəndaş müharibəsi həddinə çatacağını bəyan edir. Bununla yanaşı, bir çox erməni eksperti bildirir ki, mövcud problemlər bu ölkədə sosial inqilab çağırışlarını aktuallaşdırır və siyasi kataklizmləri şiddətləndirir. Məhz bu, Ermənistanın gələcəyini sual altına alan başlıca faktorlardandır.
Sarkisyan hakimiyyəti iflasa uğramaqdadır
Ermənistanda nəşr edilən “168 Jam” qəzeti yazır ki, siyasi qüvvələr arasındakı mübarizə daha çox pərdə arxasında gedir. Nəşrin yazdığına görə, açıq şəkildə hələ heç kim demir ki, indiki vəziyyət hakimiyyətin dəyişməsinə səbəb ola bilər: “Birincisi, Ermənistanda iqtisadi vəziyyət çox acınacaqlıdır. İkincisi, Sarkisyan hakimiyyəti iflasa uğramaqdadır. Sarkisyanın istefaya getməsi ehtimalı da mövcuddur”.
Bununla yanaşı, bu ölkədə hakimiyyətin sadə vətəndaşlarla yanaşı, mətbuata təzyiqləri də şiddətlənib. “Armenia today” isə yazır ki, siyasi gərginliyin artmasına xidmət edən bütün bu hallar iqtisadi böhranı daha da dərinləşdirir. Görünən odur ki, vətəndaşlar Ermənistanın hazırkı durumundan narazıdırlar və ölkə sosial inqilab astanasındadır. Siyasi ekspertlər qeyd edirlər ki, Ermənistanda kompleks və sistemli xarakter daşıyan total böhran meyillərinin xarakteristikasını təsvir etmək üçün sadəcə, bir neçə sahədəki real duruma nəzər yetirmək məqsədəmüvafiqdir. İlk növbədə, işğalçı ölkənin total böhranı çərçivəsində əsas diqqət iqtisadi tənəzzül meyillərinə çəkilir.
Erməni diasporu Ermənistan hakimiyyətinə qarşı siyasi təzyiqlər edir
Bəhs olunan nəşr yazır ki, Ermənistan hakimiyyətinin başlıca dayaq nöqtəsi olan xaricdəki erməni lobbisi də hazırkı hərbi xuntanı tənqid və qınaq atəşinə tutmaqdadır. Müşahidələr onu deməyə əsas verir ki, bu istiqamətdəki son tendensiya mövcud hakimiyyətlə xaricdə yaşayan ermənilər arasında kəskin ziddiyyət, mübahisə və mübarizə meyillərinin ortaya çıxmasıdır. Belə ki, Fransa, Livan və ABŞ-dakı erməni lobbisi, demək olar ki, davamlı olaraq İrəvan hakimiyyətinin əleyhinə tənqidi materiallar yayır, üstəlik, lobbinin nəzarəti altında fəaliyyət göstərən əksər mətbu orqanlar da saylarında Ermənistan hakimiyyətini kəskin şəkildə tənqid edirlər. Digər tərəfdən, erməni diasporu artıq əvvəlki kimi mövcud hakimiyyətin beynəlxalq aləmdəki təbliğat maşını funksiyasını yerinə yetirmir. Eyni zamanda, diaspor Sarkisyan hakimiyyətinə etdiyi maliyyə yardımlarını da kəsmək haqqında müəyyən mesajlar verməkdədir. Bundan savayı, erməni diasporu Ermənistan hakimiyyətinə qarşı açıq-aşkar siyasi və iqtisadi təzyiqlər də etməyə başlayıb. Bu isə “hakimiyyət-diaspor tandemi”nin tam mənada fiaskoya uğradığına dəlalət edir.
Beləliklə, Ermənistan növbəti dəfə ciddi kataklizmlərin məngənəsindədir. Ekspertlər vətəndaş müharibəsinə doğru sürüklənən işğalçı ölkənin gələcək taleyinə dair optimist proqnozlar vermirlər.
NURLAN

Paylaş:

Baxılıb: 1372 dəfə