Ermənistanda yeni siyasi böhran gözlənilir

Bakı:

16 °C

67 %

5 m/s

Əlaqə

AZ RU EN

Ana səhifə / Dünya / Ermənistanda yeni siyasi böhran gözlənilir

Ermənistanda yeni siyasi böhran gözlənilir

09.09.2015 [10:12]

İşğalçı ölkədə hazırda faktiki olaraq vətəndaşlarla hakimiyyət arasında ciddi gərginlik mövcuddur və ölkə sosial inqilab ərəfəsindədir
Ermənistan hakimiyyəti getdikcə dərinləşən sosial-iqtisadi böhranı aradan qaldırmaq üçün müxtəlif siyasi manevrlər etməyə çalışsa da, “bumeranq” effekti ilə qarşı-qarşıya qalır. “Armenia Today” yazır ki, bu ölkənin sosial-iqtisadi problemləri aradan qaldırmaq üçün kifayət qədər potensialı yoxdur, ona görə də Ermənistanı növbəti siyasi böhran gözləyir. Ekspertlər isə Yerevanın xarici siyasətinin tamamilə iflasa uğramasını sonun başlanğıcı kimi xarakterizə edirlər.
Ümumiyyətlə, işğalçı siyasət yeridən Ermənistan beynəlxalq münasibətlər sistemində forpost kimi tanınır, müstəqil daxili və xarici siyasət kursu həyata keçirmir. Belə olan halda, öz xarici siyasət strategiyasında beynəlxalq hüquq normalarını, bərabərhüquqlu əməkdaşlığı əsas götürən milli dövlətlər Ermənistanı beynəlxalq münasibətlər sisteminin müstəqil subyekti kimi qəbul etmirlər. Regional miqyasda baş verən son hadisələr bir müddət öncə Qərb ilə Rusiya arasında manevr etdiyi söylənilən Ermənistanın nəinki müstəqil dövlət olmadığını, hətta hazırkı dönəmdə, sadəcə, hərbi baza, yaxud quberniya səciyyəsi daşıdığını bir daha təsdiqlədi. Son vaxtlar erməni ekspertləri, işğalçı ölkənin mediası da Ermənistanın forpost kimi çıxış etdiyini xüsusi olaraq bəyan edirlər. “Armenia Today” onu da qeyd edir ki, Ermənistan artıq nəinki regional layihələr çərçivəsində, eləcə də beynəlxalq aləmdə təcrid vəziyyətinə düşüb.
O da qeyd edilməlidir ki, ekspertlər Ermənistanı daha böyük problemlərin gözlədiyini qeyd edərək olduqca pessimist proqnozlar verirlər. “Lragir. Armenian” xəbər portalının məlumatında bildirilir ki, əvvəllər xaricdən külli miqdarda yardım alan Ermənistan bu ildən etibarən ondan da məhrum olub. 5 milyard dollardan çox xarici borcu qaytarmaq üçün isə xəzinədə vəsait yoxdur.
Beləliklə, Ermənistan hazırda elə bir situasiya qarşısındadır ki, nəinki hər hansı bir uğurdan, heç nisbi müstəqillikdən də danışmağa dəyməz. Dolayısıyla, regional layihələrdə təmsil olunmayan Ermənistan daxili və xarici siyasət nöqteyi-nəzərindən, sözün əsl mənasında, fiaskoya uğrayıb, Yerevanın manevr imkanları tükənib.
Şübhəsiz, Ermənistanın regional və beynəlxalq miqyasda təcrid vəziyyətinə düşməsi bu ölkə daxilində mövcud olan böhranın dərinləşməsini şərtləndirir. Sirr deyil ki, işğalçı siyasət həyata keçirən, xaricdən gələn ianələrə bel bağlayan və total tənəzzülün müşahidə olunduğu Ermənistan ciddi siyasi, iqtisadi və demoqrafik böhranla qarşı-qarşıyadır. Dərin iqtisadi tənəzzül və xaos insanların həyat şəraitini olduqca çətinləşdirdiyi üçün ekspertlər işğalçı ölkədə sosial inqilab çağırışlarının aktuallaşdığını bildirirlər.
Beləliklə, işğalçı ölkədə iqtisadi tənəzzül siyasi xaosu şərtləndirməkdədir. Son zamanlar vətəndaşlarla hakimiyyət arasındakı uçurum özünü daha çox ictimai-siyasi gərginlikdə, xüsusilə də etiraz aksiyalarında göstərir. Hazırda faktiki olaraq vətəndaşlarla hakimiyyət arasında ciddi gərginlik mövcuddur və ölkə sosial inqilab ərəfəsindədir. Bu isə ona dəlalət edir ki, Ermənistanda siyasi böhranın yeni fazası gözlənilir.
NURLAN

Paylaş:

Baxılıb: 1199 dəfə