Gürcüstanda dövlət çevrilişinin qarşısı alınıb

Bakı:

15 °C

82 %

10 m/s

Əlaqə

AZ RU EN

Ana səhifə / Dünya / Gürcüstanda dövlət çevrilişinin qarşısı alınıb

Gürcüstanda dövlət çevrilişinin qarşısı alınıb

06.05.2009 [17:22]

Gürcüstan Daxili İşlər Nazirliyi ölkədə hərbi qiyam və çevriliş cəhdinin qarşısının alındığını açıqlayıb. APA-nın “Qruziya Online” portalına istinadən verdiyi xəbərə görə, Gürcüstan DİN bəyan edib ki, Rusiya xüsusi xidmət orqanları tərəfindən əlaqələndirilən, həm vəzifədə, həm də istefada olan yüksək rütbəli hərbçilər ölkədə qiyam qaldırmağa hazırlaşıb.
Minimum məqsəd ölkədə keçiriləcək NATO təlimlərini pozmaq, maksimum məqsəd isə hərbi çevriliş həyata keçirmək olub. Açıqlamada çevriliş cəhdinin başçıları kimi generallar Kobaladze, Pirtsxalaişvili, Karkaraşvili, Tevzadze, Uçadze, Tskrialişvili və Qaxokidzenin adları çəkilir. Onların hər birinə 50 min dollar vəd olunub. Gizli müzakirələrin birində qeyd edilib ki, 5 min rus əsgəri də onlara qoşulacaq və Tiflis ələ keçiriləcək. Qiyam zamanı hakimiyyət komandasında təmsil olunan siyasətçilər Bokeriya, Ramişvili, Merabişvili, Uqulava və deputat Tarqamadzenin fiziki məhvi, Saakaşvili hakimiyyətinin düşmənləri Aslan Abaşidze, Levan Mamaladze, Kibar Xalvaşi və Levan Privelinin ölkəyə gətirilməsi planlaşdırılıb.
Qiyam cəhdinin üstü açıldıqdan sonra Muxrovani adlanan yerdə dislokasiya olunmuş tank briqadası hakimiyyət orqanlarına tabe olmadığını elan edib. Briqadanın Otanadze soyadlı komandirlərindən biri həbs edilib, Qvaladze soyadlı digər zabit isə axtarılır.
Bu arada Gürcüstan Müdafiə Nazirliyinin rəhbərliyi paytaxt Tiflisdən 20-30 km aralıda yerləşən Muxrovanidə dislokasiya olunmuş tank batalyonun hərbi qulluqçularını qiyamı dayandırmağa çağırıb. APA-nın “Novosti-Qruziya” və “Qruziya Online” agentliklərinə istinadən verdiyi məlumata görə, Muxrovanidə olan müdafiə naziri David Sixarulidze hərbçiləri qanunsuz addımlara son qoyaraq hakimiyyətə tabe olmağa çağırdıqlarını bildirib. O, qiyamçıların konkret tələb irəli sürmədiklərini söyləyib: “Qiyam dünən ölkədə çevriliş hazırlayan keçmiş hərbi məmurların həbsindən sonra başlayıb. Hərbi qəsd planı irimiqyaslı olub və qarşıya qoyulan məqsədlərdən biri də Gürcüstanda planlaşdırılan NATO təlimlərini pozmaq idi”.
Daxili İşlər Nazirliyinin analitik-informasiya departamentinin rəhbəri Şota Utiaşvili isə bəyan edib ki, çevrilişin təşkilatçıları Rusiya xüsusi xidmət orqanları ilə əlaqəsi olan və onlardan pul alan yüksək rütbəli sabiq hərbçilərdir. O bildirib ki, “Delta” xüsusi təyinatlı dəstəsinin keçmiş komandiri Giya Qvaladze həbs edilib, ona dəstək verən Muxrovanidəki xüsusi təyinatlı hərbi hissənin və Milli Qvardiyanın batalyonlarından birinin keçmiş komandiri Koba Otanadze və Tiflisdəki hərbi hissələrdən birinin sabiq komandiri Zaza Muşkudiani isə axtarılır. Qiyam hazırlığına sübut kimi gizli videoçəkiliş də nümayiş etdirilib. Videolentdə G.Qvaladze və K.Otanadzenin hərbi qiyam planını müzakirə etdikləri görünür.
Muxrovanidəki tank batalyonunun komandiri Mamuka Qorqişvili isə açıqlama ilə çıxış edərək daxili siyasi vəziyyətə qarışmaq niyyətində olmadıqlarını, ancaq yaranmış vəziyyətə dözüm göstərə bilmədiklərini söyləyərək hakimiyyətlə müxalifəti dialoqa çağırıb: “ölkənin dağılması prosesini və qarşıdurmanı sakit müşahidə etmək mümkün deyil. Lakin bizim tərəfimizdən hər hansı aqressiv hərəkətlər olmayacaq. Biz kazarma vəziyyətindəyik və buradan çıxmağa hazırlaşmırıq”.
Dünən axşam saatlarında isə Gürcüstan Daxili İşlər Nazirliyinin rəsmi nümayəndəsi Şota Utiaşvili Muxrovani hərbi bazasındakı qiyamın yatırıldığını elan edib. Lent.az-ın “France Presse” agentliyinə istinadən verdiyi məlumata görə, qiyamçıların bir hissəsi, o cümlədən, hərbi bazanın komandanı təslim olub. Onlardan ancaq bir neçə nəfəri qaça bilib.
Hakimiyyət orqanları bildirirlər ki, prezident Mixail Saakaşvili qiyamçılarla danışıq aparmaq üçün şəxsən hərbi hissəyə gedib. Məhz onunla danışıqlardan sonra qiyamçılar təslim olublar.

Paylaş:

Baxılıb: 1369 dəfə