Ermənistanda istefalar davam edir

Bakı:

13 °C

94 %

4 m/s

Əlaqə

AZ RU EN

Ana səhifə / Dünya / Ermənistanda istefalar davam edir

Ermənistanda istefalar davam edir

23.07.2021 [09:09]

Məlum olduğu kimi, erməni müxalifətinin növbədənkənar parlament seçkilərinin nəticələrinin ləğv edilməsi yönündə tələbi Ermənistanda siyasi böhranın daha da dərinləşməsinə səbəb olub. Erməni mediası yazır ki, məsələ ilə bağlı 4 siyasi qüvvə tərəfindən ünvanlanan müraciətlərlə əlaqədar olaraq konstitusiya məhkəməsinin yekun qərarı müxalifətin lehinə olmayıb. İyulun 19-da konstitusiya məhkəməsi (KM) tərəfindən seçkilərin nəticələrinin ləğvinə dair müraciətlərin rədd edilməsi və MSK-nın seçki nəticələri ilə bağlı qərarının qüvvədə saxlanılması barədə qərar qəbul edilib.
Bu məqamda qeyd edək ki, seçkinin nəticələrini şübhə altına almalarına baxmayaraq, parlamentdə yer qazanan “Ermənistan” və “Şərəfim var” blokları parlamentdə təmsil olunmaqdan imtina etməyiblər. Baxmayaraq ki, KM-in qərarı açıqlanandan sonra “Ermənistan” blokunun rəhbəri, baş nazir postunun namizədi Robert Koçaryan mandatdan imtina edib.
“FactInfo”nun yaydığı məlumata görə, “Ermənistan” blokunun üzvü İşxan Saqatelyan deyib ki, parlament mandatından imtina edən namizədlər olsa da, siyasi qüvvə parlamentdə təmsil olunacaq. Bu arada, parlamentdə yer qazanan “Şərəfim var” blokuna daxil olan “Vətən” partiyasının mətbuat katibi Sos Hakopyan “Panorama.am”a bildirib ki, təmsil etdiyi blok da parlamentin işinə qatılacaq. Xatırladaq ki, iyunun 20-də keçirilmiş parlament seçkilərinin nəticələrinə görə, 8-ci çağırış Ermənistan parlamentində “Vətəndaş müqaviləsi” partiyası - 71 mandat, “Ermənistan” bloku - 29 mandat, “Şərəfim var” bloku - 7 mandat alacaq.
Yeri gəlmişkən, seçkilərin nəticələrinin qüvvədə saxlanması fonunda Ermənistan hakimiyyətində istefa dalğası baş verir, xüsusilə məğlub ölkə hərbi rəhbərlikdə kadr dəyişikliyi ilə çalxalanır. Belə ki, bu günlərdə müdafiə naziri səlahiyyətlərini icra edən Vaqarşak Harutyunyan istefa verib. “Aysor.am” yazır ki, baş nazir vəzifəsini icra edən Paşinyanın qərarı ilə Suren Sahakyan da müdafiə nazirinin müavini vəzifəsindən azad edilib.
Ermənistan prezidenti Armen Sarkisyan isə baş qərargah rəisinin birinci müavini Arşak Karapetyanın müdafiə nazirinin birinci müavini təyin edilməsi haqqında sərəncam imzalayıb. “Sputnik-Ermənistan”ın yaydığı məlumata görə, Karapetyan müdafiə naziri V.Harutyunyanı əvəz edəcək. Paşinyanın bu seçimi ölkədə birmənalı qarşılanmayıb. Çünki keçmiş hakimiyyət baş qərargahın kəşfiyyat idarəsinin rəisi vəzifəsini tutan bu generalı 2016-cı il aprel döyüşlərdən sonra vəzifəsindən kənarlaşdırmışdı. “Yerevan.today” yazır ki, Paşinyanın tərəfdarları da 2018-ci ilin dekabrında baş nazirin müşaviri təyin edilən bu şəxsə qarşı çıxıb. Yeri gəlmişkən, “İravunk” yazır ki, Ermənistan müdafiə nazirliyində ciddi dəyişikliklər gözlənilir. Qəzetin yazdığına görə, baş qərargah MN-ə birləşdiriləcək.
Göründüyü kimi, parlament və hökumət böhranı davam edən Ermənistanda hakimiyyət istefa və kadr dəyişikliyi ilə çalxalanır. Hakimiyyətin müxtəlif tədbirlərə əl atdığı indiki vaxtda yaranmış vəziyyət yaxın vaxtlarda məğlub ölkədə sabitlik əldə edilməsini istisna edir.
Qaşqay ZİYƏDDİNOĞLU

Paylaş:

Baxılıb: 848 dəfə