Pakistan Senatı ədalətli qərar qəbul edib

Bakı:

22 °C

60 %

0 m/s

Əlaqə

AZ RU EN

Ana səhifə / Dünya / Pakistan Senatı ədalətli qərar qəbul edib

Pakistan Senatı ədalətli qərar qəbul edib

03.02.2012 [11:34]

Məlum olduğu kimi, Pakistan İslam Respublikasının Senatı fevralın 1-də “Pakistan - Azərbaycan münasibətləri” ilə bağlı dinləmələrdən sonra Azərbaycan Respublikasının ərazisinin 20 faizinin işğalı və ermənilər tərəfindən törədilmiş Xocalı soyqırımı ilə bağlı yekdilliklə qətnamə qəbul edib. Qətnamədə bildirilir ki, Senatın Xarici Əlaqələr Komitəsi Azərbaycan torpaqlarının Ermənistan tərəfindən işğalını və 26 fevral 1992-ci il tarixində erməni silahlı qüvvələri tərəfindən Azərbaycanın Xocalı şəhərində mülki əhaliyə qarşı törədilmiş soyqırımı pisləyir. Komitə Azərbaycan Respublikasının beynəlxalq ictimaiyyət tərəfindən tanınmış ərazi bütövlüyünü və suverenliyini bir daha təsdiq edir. Komitə BMT Baş Assambleyasının və Təhlükəsizlik Şurasının erməni silahlı qüvvələrinin Azərbaycanın işğal olunmuş ərazilərindən dərhal, tam və qeyd-şərtsiz çıxarılmasına dair qətnamələrinin yerinə yetirilməsini tələb edir, beynəlxalq ictimaiyyəti və beynəlxalq təşkilatları Ermənistanı bu qərarları yerinə yetirməyə səsləməyə çağırır. Eyni zamanda, hesab olunur ki, beynəlxalq ictimaiyyət bu soyqırımı üçün məsuliyyət də müəyyən edə bilər. Sənəddə Pakistanın Azərbaycan Respublikasının Ermənistan - Azərbaycan, Dağlıq Qarabağ münaqişəsini sülh yolu ilə həll etmək istiqamətində səylərini dəstəklədiyi də vurğulanır.
Məsələyə münasibət bildirən Milli Məclisin komitə sədri, Azərbaycan - Pakistan Parlamentlərarası əlaqələr üzrə işçi qrupunun üzvü Eldar İbrahimov deyib ki, Azərbaycan və Pakistan starteji münasibətdə olan dövlətlərdir. Pakistanın dövlət müstəqilliymizi tanıyan ilk ölkələr sırasında olduğunu xatırladan millət vəkili Azərbaycan deputatlarının bu ölkənin parlamentində olduqları və tərəflər arasında dostluq münasibətlərinin inkişaf etdiyini deyib. O, qeyd edib ki, gələcəkdə də belə səfərlərin olacağı gözlənilir: “Münasibətlərimiz uğurla inkişaf edir. Pakistan həmişə Dağlıq Qarabağ münaqişəsinin həlli ilə bağlı ölkəmizin mövqeyini müdafiə edib. Bu ölkənin Senatı tərəfindən Xocalı soqırımnın tanınması məhz bu münasibətlərin məntiqi nəticəsidir. Hesab edirəm ki, Pakistan münaqişənin həllində Azərbaycana daim öz dəstəyini verəcək”.
Milli Məclisin deputatı, Xocalı şəhərinin keçmiş icra başçısı Elman Məmmədov də bu qərarın Pakistanın Azərbaycana dost münasibətinin ifadəsi olduğunu bildirib: “Pakistan Senatında Xocalı soyqırımı haqqında qətnamənin qəbul olunması son illər ərzində Azərbaycan Prezidenti İlham Əliyevin apardığı məqsədyönlü siyasətin nəticəsidir. Eyni zamanda, Xocalı soyqırımının dünyada tanıdılması istiqamətində Heydər Əliyev Fondunun fəaliyyəti xüsusi qeyd olunmalıdır”.
E.Məmmədov deyib ki, Pakistan İslam dövləti olaraq həmişə ölkəmizin ədalətli mövqeyini dəstəkləyir: “Belə bir qərarın qəbul olunmasında iki ölkə arasındakı dostluq münasibətləri öz təsirini göstərir. Eyni zamanda, burada Milli Məclisin xidmətlərini də qeyd etmək lazımdır. Mən inanıram ki, haqq-ədalət öz yerini tapacaq və dünyada Xocalı soyqırımını tanıyan ölkələrin də sayı artacaq. Artıq Meksika və Pakistan parlamentləri belə bir qərar qəbul edib. Türkiyə parlamentində Xocalı soyqrımı ilə bağlı müzakirələr aparılır. Hesab edirəm ki, biz Xocalı soyqırımının tanınması istiqamətində işləri günü - gündən gücləndirməliyik. Bu cinayəti törədənlər, bu gün Ermənistanda hakimiyyətdə olan Serj Sarkisyan kimi hərbi cani, qatil cəzasını almalıdır”.
Millət vəkili İmamverdi İsmayılov isə bildirib ki, Pakistan İslam Respublikasının Senatının Azərbaycan Respublikasının ərazisinin 20 faizinin işğalı və ermənilər tərəfindən törədilmiş Xocalı soyqırımı ilə bağlı yekdilliklə qətnamə qəbul etməsi Azərbaycan həqiqətlərinin dünya ictimaiyyətinə çatdırılması baxımından olduqca mühüm əhəmiyyətə malikdir. Onun sözlərinə görə, qətnamədə Xocalı şəhərində mülki əhaliyə qarşı törədilmiş soyqırımın pislənilməsi olduqca mühüm məqamdır: “Bu həmin soyqırımının mülki əhaliyə qarşı törədilməsini bir daha təsdiq edir. Xocalı soyqırımı ermənilərin törətdiyi ən böyükmiqyaslı qətliamlardan biridir və bu qətliamların sayı çoxdur. Mən iki qaçqın və məcburi köçkün rayonun parlamentdə təmsilçisi olaraq bildirmək istəyirəm ki, dünya birliyi Azərbaycanın məruz qaldığı işğala göz yummamalıdır. Bu gün öz evindən-eşiyindn didərgin düşmüş bir milyona yaxın insanın hüquqları tapdanıb. Avropa, beynəlxalq aləm ədalətin bərpasına nail olmalıdır”.
Millət vəkili vurğulayıb ki, Xocalı soyqırımının dünya ictimaiyyətinə tanıdılmasına, bu qətliamın həqiqi qiymətini almasına Azərbaycan Prezidenti İlham Əliyevin xidmətləri sayəsində nail olunub: “Möhtərəm Prezidentimiz hər zaman beynəlxalq tribunalardan Azərbaycan həqiqətlərini dünya birliyinə çatdırıb. Bununla yanaşı, bu istiqamətdə Heydər Əliyev Fondunun gördüyü işlər olduqca mühümdür. Məhz, Heydər Əliyev Fondunun fəaliyyəti sayəsində hər il Xocalı faciəsi günü dünyanın bir sıra ölkələrində kütləvi tədbirlər keçirilir, aparıcı dövlətlərin paytaxtarında Xocalı soyqırımının dəhşətlərini özündə əks etdirən foto-sərgilər reallaşır. Bu mənada dövlətimizin gördüyü işlər artıq öz bəhrəsini verməkdədir. Bir daha bildirmək istəyirəm ki, Azərbaycan dövləti əldə etdiyi iqtisadi-siyasi uğurları ilə artıq dünyanın siyasi palitrasında özünə mühüm yer qazanıb. Buna isə möhtərəm Prezidentimizin ardıcıl və qətiyyətli siyasi iradəsi sayəsində nail olmuşuq”.
Nardar BAYRAMLI

Paylaş:

Baxılıb: 1768 dəfə