Gəncliyin ən gözəl çağı...

Bakı:

14 °C

82 %

7 m/s

Əlaqə

AZ RU EN

Ana səhifə / Elm / Gəncliyin ən gözəl çağı...

Gəncliyin ən gözəl çağı...

17.11.2024 [10:06]

Beynəlxalq Tələbələr Günüdür

Tələbə olmaq sadəcə, dərs və imtahanlardan ibarət deyil. Tələbəlik bilik əldə etmənin, özümüzü axtarmağın, yeni ideyaları qəbul etməyin, şəxsi inkişafın və bir ömür boyu davam edən əlaqələr qurmağın yoludur. Ona görə də inkişaf etmiş hər bir ölkədə tələbələrə diqqət yüksək səviyyədədir. Bu istiqamətdə mühüm proqramlar həyata keçirilir, tələbələrə müəyyən güzəştlər edilir, təhsil keyfiyyətinin artırılması üçün tələbələrə stimullar verilir.

Ölkəmizdə tələbələrə göstərilən diqqət və qayğı hər gün artmaqdadır. Prezident İlham Əliyevin tələbələrə diqqəti onu təsdiqləyir ki, bu mühüm amil son dövrlərdə dövlət siyasətinin mühüm prinsipləri sırasına daxil edilib. Bu proses təkcə paytaxt ilə məhdudlaşmır, bölgələri də əhatə edir.

Gələcəyə qoyulan sərmayə...

Məlumdur ki, dünyada tələbələrə təhsil kreditlərinin verilməsi təcrübəsi geniş yayılıb. Ayrı-ayrı ölkələrdə tələbələrin təhsil kreditləri ilə təminatına ötən əsrin 60-cı illərindən başlanılıb. Hazırda dünyanın 60-dan çox ölkəsində bu təcrübədən istifadə olunur. Təbii ki, uzun illər ərzində tələbələrə təhsil kreditlərinin verilməsində ümumi qaydalar formalaşıb. Eyni zamanda, hər bir ölkə öz imkanlarından, dövlət siyasətinin prioritetlərindən və bu kimi digər amillərdən çıxış edərək tələbələrə təhsil kreditlərinin verilməsində özünün fərdi yanaşmasını da tətbiq edir.

Tələbələrə təhsil kreditlərinin verilməsi ölkəmiz üçün də mühüm bir amildir. Buna görə də müvafiq qanunvericilik bazası hazırlanarkən dünyadakı qabaqcıl təcrübədən istifadə olunub. Müvafiq qanunvericilik bazası Prezident İlham Əliyevin 17 iyun 2021-ci il tarixində imzaladığı “Azərbaycan Respublikası Elm və Təhsil Nazirliyinin tabeliyində Təhsil Tələbə Krediti Fondunun yaradılması və fəaliyyətinin təmin edilməsi ilə bağlı bir sıra tədbirlər haqqında” Fərmana əsasən formalaşıb. Fərmanın icrasının təmin edilməsi məqsədilə Nazirlər Kabineti “Təhsil Tələbə Krediti Fondunun vəsaiti hesabına təhsil tələbə kreditlərinin verilməsi Qaydası”nın təsdiq edilməsi haqqında” ayrıca Qərar qəbul edib. Qaydada təhsil tələbə kreditinin növləri və kreditdən istifadə hüququ, kreditin verilməsinə dair tələblər və tətbiq edilən güzəştlər müəyyənləşdirilib.

Əlamətdar günün faciəvi tarixi...

Yeri gəlmişkən, noyabrın 17-si Beynəlxalq Tələbələr Günüdür. Beynəlxalq Tələbə günü gənclik bayramı kimi qəbul edilsə də, onun yaranma tarixi qanlı hadisələrlə bağlıdır.

İkinci Dünya müharibəsi dövründə Adolf Hitlerin işğal etdiyi ərazilərdən biri də Çexiya idi. Qəddarlığı ilə məşhurlaşan Adolf Hitleri və nasistləri faşistlikləri ilə çox yaxşı tanıyırıq. 16 noyabr 1939-cu ildə Praqada tələbələr və müəllimlər Respublika gününü qeyd etmək məqsədilə küçələrə axışdılar. Nasistlər bu aksiyanı vəhşicəsinə dağıtdılar və bu zaman tələbələrdən biri öldürüldü. Ölən tələbənin dəfni anti-nasist nümayişə çevrildi. Əsarətdə qalmaq istəməyən xalq və itirilmiş gənc bir həyat... Buna susmaq asan deyildi.

Qarşıdurmaya cavab olaraq almanlar Praqa tələbə yataqxanalarını mühasirəyə aldılar: 1200-dən çox tələbə sürgünə göndərildi, nümayişdə fəal iştirak edən 9 tələbə mühakimə edilmədən edam edildi. Sürgünə göndərilən tələbələrin çoxu sağ qala bilmədi. Nəticədə Adolf Hitler müharibə bitənə qədər Çexiya universitetlərinin fəaliyyətini dayandırdı. Belə dəhşətli hadisədən 2 il sonra 1941-ci ildə Beynəlxalq Tələbə Təşkilatı 17 noyabr tarixinin ölən gənclərin şərəfinə Beynəlxalq Tələbə Günü olaraq qeyd edilməsini qərara aldı.

Yeganə BAYRAMOVA

Paylaş:

Baxılıb: 606 dəfə