Azərbaycanın və Latviyanın birinci xanımları Müasir İncəsənət Muzeyi ilə tanış olub, "Sənət inciləri" sərgisinə baxıblar

Bakı:

24 °C

60 %

6 m/s

AZ RU EN

Ana səhifə / Gündəm / Azərbaycanın və Latviyanın birinci xanımları Müasir İncəsənət Muzeyi ilə tanış olub, "Sənət inciləri" sərgisinə baxıblar

Azərbaycanın və Latviyanın birinci xanımları Müasir İncəsənət Muzeyi ilə tanış olub, "Sənət inciləri" sərgisinə baxıblar

12.05.2011 [10:01]

Dünən Azərbaycanın birinci xanımı, Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban Əliyeva və ölkəmizdə səfərdə olan Latviyanın birinci xanımı Lilita Zatlere Müasir İncəsənət Muzeyində olublar. Qonağa məlumat verilib ki, buradakı ekspozisiyanın əsasını XX əsrin ikinci yarısından bu günədək yaradılmış ən yaxşı avanqard rəsm və heykəltəraşlıq əsərləri təşkil edir. Muzeydə Azərbaycanın adlı-sanlı və gənc, əsasən avanqard üslubda işləyən rəssam və heykəltəraşlarının 1000-dək işi toplanıb.
Qərbi Avropa incəsənəti salonunda isə Pablo Pikasso, Salvador Dali, Mark Şaqal kimi dahi klassiklərin əsərləri nümayiş etdirilir. Dizayn müəllifi tanınmış rəssam Altay Sadıqzadə olan bu mədəniyyət məbədində uşaq incəsənəti salonu, kitabxana, videosalon, restoran və art-kafe də fəaliyyət göstərir.
Qonaq Azərbaycanın xalq rəssamları Səttar Bəhlulzadə, Böyükağa Mirzəzadə, Elmira Şahtaxtinskaya, Tahir Salahov, ömər Eldarov, Nadir Əbdürrəhmanovun, bir çox digər fırça və tişə ustalarının əsərləri ilə tanış olub.
Azərbaycanın və Latviyanın birinci xanımları Müasir İncəsənət Muzeyində açılmış “Van Cleef & Arpels” şirkətinin tarixi sənət kolleksiyasının və azərbaycanlı Əməkdar rəssam Əliyar Əlimirzəyevin biri digərindən maraqlı əsərlərinin təqdim olunduğu “Sənət inciləri” sərgisinə də baxıblar.
Bildirilib ki, “Sənət inciləri” sərgisi eyni yaradıcı ideyanı paylaşan iki fərqli ifadə tərzini bir araya gətirməklə Fransa və Azərbaycan arasında mədəni dialoqu nümayiş etdirir. Bu yaradıcı ideyanın bir qolu “Van Cleef & Arpels” Evinin zərgərlik məmulatlarında, digər qolu isə Azərbaycan rəssamı Əliyar Əlimirzəyevin əsərlərində təcəssüm tapıb. Buna görə də həm Ə.Əlimirzəyevin əsərləri, həm də “Van Cleef & Arpels”in nadir sənət nümunələri bir-birini heyrətamiz şəkildə tamamlayır.
“Van Cleef & Arpels”in yaradıcılıq dünyasının əsasını təşkil edən dörd əsas mövzuda - “Təbiət”, “Şərq dünyası”, “Yüksək moda” və “Görünməz çərçivə” üzrə təqdim edilən zinət əşyaları ilə tanışlıqdan sonra Azərbaycanın və Latviyanın birinci xanımları rəssam Əliyar Əlimirzəyevin əsərlərinə baxıblar.
Qonaq muzey və sərgi ilə tanışlıqdan xoş təəssüratla ayrılıb.

* * *

Latviyanın birinci xanımı Lilita Zatlere ölkəmizə səfəri çərçivəsində dünən dünya mədəni irs abidələrindən olan İçərişəhərlə tanış olub. Latviyanın birinci xanımı milli mədəni irsimizin incisi sayılan “Şirvanşahlar Sarayı Kompleksi” ilə tanış olub. Qonağa saray kompleksi barədə ətraflı məlumat verilib.
Kiçik Qala küçəsi ilə davam edən gəzinti zamanı Lilita Zatlere təndir çörəyinə qonaq edilib.
Sonra Latviyanın birinci xanımı dünya şöhrətli rəssam Tahir Salahovun emalatxanasında fırça ustasının yaradıcılığı ilə tanış olub.
Qonaq “Bazar meydanı”ndakı əzəmətli Qız qalasının üstünə qalxaraq paytaxtın mənzərəsini seyr edib. Bakının rəmzi sayılan abidənin tarixi barədə qonağa məlumat verilib.
Latviyanın birinci xanımı İçərişəhərin Fəxri qonaqlar kitabına ürək sözlərini yazıb.
Qonağa xatirə hədiyyələri təqdim olunub.

* * *

Azərbaycanda səfərdə olan Latviyanın birinci xanımı Lilita Zatlere dünən Beynəlxalq Muğam Mərkəzində olub. AzərTAc-ın məlumatına görə, Latviya Prezidentinin xanımına dənizkənarı Milli Parkda yerləşən mərkəz haqqında ətraflı məlumat verilib.
Mərkəz ilə yaxından tanış olan xanım Lilita Zatlere burada Azərbaycanın görkəmli muğam ifaçılarının büstlərinə baxıb və ona musiqi alətləri barədə ətraflı məlumatlar verilib.
Latviya Prezidentinin xanımı gənc muğam ifaçılarının çıxışlarını dinləyib, onlarla xatirə şəkli çəkdirib.
Sonra qarşılıqlı xatirə hədiyyələri təqdim olunub.

Paylaş:

Baxılıb: 1161 dəfə