Qurban Qurbanov: Bakıda ehtiyatlı olmalıyıq

Bakı:

25 °C

40 %

3 m/s

Əlaqə

AZ RU EN

Ana səhifə / İdman / Qurban Qurbanov: Bakıda ehtiyatlı olmalıyıq

Qurban Qurbanov: Bakıda ehtiyatlı olmalıyıq

01.08.2009 [10:10]

UEFA-nın rəsmi saytında “Qarabağ”ın qazandığı qələbə ilə bağlı yazı yerləşdirilib
“Qarabağ” Azərbaycan futbolunda yeni rekord müəyyənləşdirib. Klublarımız 1994-cü ildən qatıldığı avrokuboklarda indiyədək heç vaxt ardıcıl 3 oyun qapısının toxunulmazlığını qoruya bilməyib. İlk olaraq buna “Qarabağ” nail olub ki, hazırda milli komandamızın da əsas qapıçısı olan Fərhad Vəliyevin “quru seriya”sı artıq 270 dəqiqəyə çatıb. Cari mövsümdə avrokuboklarda çıxış edən klublarımızdan yalnız Ağdam təmsilçisi qol buraxmayıb ki, bu da 29 yaşlı qapıçının sayəsində mümkün olub. İndiyədək klublarımız bir mövsümdə ardıcıl üçüncü oyunda qələbə üzünə həsrət qalmışdı. “Qarabağ” bu uğursuz sindroma son qoymaqla, 2 rekord müəyyənləşdirdi. Komandamızın qazandığı qələbədə böyük pay sahibi olan baş məşqçi Qurban Qurbanov qarşılarına qoyulan məqsədə nail olduqlarını bildirsə də, Bakıda ehtiyatlı oynamağın tərəfdarıdır: “Bizim məqsədimiz ən azı qol buraxmamaq idi. Maksimum vəzifənin öhdəsindən gəldik. Rəqibin oyununu analiz etmək üçün yaxşı imkanlarımız oldu. Həm də rəqib yorğun idi. Onlar həftəsonu çempionat oyununa çıxmışdı. Biz müdafiədə diqqətli olmalı və arxada boşluqlar yaranmasına imkan verməməli idik. Qarşıya qoyulan məqsədə çatmaq üçün hər bir futbolçuya ən azı meydanın özümüzə aid olan hissəsində diqqətli olmağı, komanda halında müdafiə olunmağı tapşırmışdım. Rəqib ucaboy oyunçularından yararlanmağa çalışırdı. Bir müddət pressinq tətbiq etdilər. Qoldan sonra isə istər-istəməz üstümüzə gəlməyə başladılar ki, bu zaman müdafiələrində boşluqlar yarandı. Bundan istifadə edib çox sayda qol imkanı yaratdıq. Düzdür, bir qol vurduq. Amma bu, səfər oyunu üçün normal nəticədir. Mübarizə hələ başa çatmayıb. Kubok oyunları iki matçdan ibarət olur. Biz ehtiyatlı olmalıyıq. çünki Bakıda rəqib hücum edəcək. Onların heyətində ucaboy oyunçular var. Biz, həmçinin, ilk oyunda buraxdığımız səhvləri təkrarlamamalıyıq”.
Komandanın kapitanı Aslan Kərimov da sevinmək üçün tələsmir: “İlk matçda yaxşı oyun nümayiş etdirdik. Bunun nəticəsi olaraq qələbə qazandıq. Deyə bilmərik ki, artıq mərhələ adlamışıq. Düzdür, bizim şansımız daha çoxdur. Cavab matçında da hücum edib, qələbə qazanmalıyıq. Bakıda azarkeşlərimizin dəstəyinə bel bağlayacağıq”.
Qeyd edək ki, UEFA-nın rəsmi saytında “Honka”-”Qarabağ” matçı ilə bağlı yazı yerləşdirilib. Yazıda bildirilir: “İlk hissədə meydan sahiblərinin qol vurmaq imkanları var idisə, fasilədən sonra meydanda yalnız qonaqlar diqtə edən tərəf idi. Finlərin qapıçısı Yanne Henriksson Vüqar Nadirov və Vaqif Cavadovun zərbələrindən sonra komandasını qoldan xilas etdi. Emin İmaməliyev və Admir Telinin zərbəsi isə dəqiq olmadı. Nəhayət, 70-ci dəqiqədə qonaqlar rəqib qapısına yol tapdılar: oyunu üzərinə götürən Elvin Məmmədov rəqibin cərimə meydançasına daxil olaraq sərrast zərbə ilə topu qapının uzaq “doqquzluğuna” göndərdi. Bununla “Qarabağ” cavab oyunu ərəfəsində üstünlük əldə etdi”.

Paylaş:

Baxılıb: 1474 dəfə