Bakıda birinci Beynəlxalq “Caspian Energy Forum-2014” keçirilib

Bakı:

25 °C

69 %

10 m/s

Əlaqə

AZ RU EN

Ana səhifə / İqtisadiyyat / Bakıda birinci Beynəlxalq “Caspian Energy Forum-2014” keçirilib

Bakıda birinci Beynəlxalq “Caspian Energy Forum-2014” keçirilib

24.04.2014 [09:12]

Aprelin 23-də “Caspian Energy International Media Group”un 15 illik yubileyi çərçivəsində Bakıda Birinci Beynəlxalq “Caspian Energy Forum-2014” keçirilib.
AzərTAc xəbər verir ki, forumu “Caspian European Club”un baş icraçı direktoru Telman Əliyev açıb. O, tədbir iştirakçılarını salamlayaraq bildirib ki, 15 il bundan əvvəl “Caspian Energy” jurnalının yaradılmasında məqsəd Azərbaycanın və Xəzəryanı regionu ölkələrinin neft strategiyasının dünyada tanıdılması idi. Bu istiqamətdə çox iş görülüb.
Sonra açılış nitqi ilə çıxış edən forumun sədri, energetika naziri Natiq Əliyev bu ilin Azərbaycan və Xəzər regionu ölkələri üçün əlamətdar bir il olduğunu deyib. Qeyd olunub ki, cari il Azərbaycanda Ümummilli lider Heydər Əliyevin rəhbərliyi ilə 1994-cü il sentyabrın 20-də Bakıda beynəlxalq neft şirkətləri konsorsiumu ilə imzalanmış “Azəri”, “Çıraq”, “Günəşli” yataqlarının kəşfiyyatı və işlənilməsi üzrə “Əsrin müqaviləsi”nin 20 illik yubileyi təntənəli surətdə qeyd ediləcək. Belə bir forumun məhz “Əsrin Müqaviləsi”nin 20 illik yubileyi çərçivəsində keçirilməsi olduqca əlamətdar hadisədir.
Sonra forum öz işini sessiyalarla davam etdirib.
“Avropa İttifaqının enerji təhlükəsizliyinin Xəzər və Qara dəniz regionları ölkələri ilə qarşılıqlı fəaliyyəti” mövzusunda keçirilən birinci sessiyaya energetika naziri Natiq Əliyev sədrlik edib. Nazir sessiyada “Azərbaycanın enerji təhlükəsizliyi - Xəzər regionu ölkələri ilə əməkdaşlıq və əsas prioritetlər” mövzusunda məruzə ilə çıxış edib.
Sessiyada Amerika Birləşmiş Ştatlarının Azərbaycan Respublikasındakı səfiri Riçard Morninqstar çıxış edərək bildirib ki, “Əsrin müqaviləsi”nin imzalanması ABŞ ilə Azərbaycan əməkdaşlığının inkişaf etməsinə öz müsbət təsirini göstərib.
Azərbaycan Respublikası Dövlət Gömrük Komitəsinin sədri Aydın Əliyev çıxış edərək bildirib ki, ötən 22 il ərzində Azərbaycanda gömrük işinin təkmilləşdirilməsi, gömrük orqanlarının maddi-texniki və normativ-hüquqi bazalarının möhkəmləndirilməsi, dünya gömrük sisteminə inteqrasiyası istiqamətində uğurlu addımlar atılıb.
Sessiyada Azərbaycan Respublikasının Nazirlər Kabineti Aparatının ekologiya şöbəsinin müdiri İlyas Əlizadə “Davamlı inkişafın ekoloji və energetik göstəriciləri” mövzusunda məruzə ilə çıxış edib.
Akkord Sənaye, Tikinti, İnvestisiya Korporasiyasının baş direktoru Göksel Aybek və “Azersun Holding”in prezidenti Abdulbari Gözəl çıxış edərək forumun keçirilməsinin əhəmiyyətindən danışıblar.
ARDNŞ-in geologiya, geofizika və yataqların işlənməsi üzrə birinci vitse-prezidenti, akademik Xoşbəxt Yusifzadənin sədrliyi ilə keçirilən forumun ikinci sessiyasında “Təbii qaz və qeyri-konvensional təbii qaz - XXI əsrin əsas enerji daşıyıcısıdır” və “Xəzərdə kəşfiyyat və hasilat perspektivləri” mövzularında fikir mübadiləsi aparılıb.
Sessiyada “SOCAR-AQŞ”-in baş direktoru Ramin İsayevin “Ekoloji təmiz qazıma, Xəzərin xidmət şirkətlərinin əsas iş prinsipləri” və “Caspian Wireline Service”-nin prezidenti Kelvin Vilsonun “Geologiya və geofizikanın aparıcı dünya texnologiyalarının Xəzərdə tətbiqi” mövzularında məruzələri dinlənilib.
Milli Məclisin iqtisadi siyasət komitəsinin sədri, akademik Ziyad Səmədzadənin sədrlik etdiyi forumun üçüncü və dördüncü sessiyalarında “İqtisadi qloballaşma - Azərbaycan iqtisadiyyatı üçün üstünlükləri və çatışmazlıqları”, “Qeyri-neft sektorunun inkişafı - Azərbaycanda sənaye, keyfiyyət infrastrukturu, nəqliyyat və turizmin inkişaf potensialı”, “Azərbaycanda XXI əsrin informasiya-kommunikasiya texnologiyaları innovasiyaları”, “Postböhran dünya maliyyə sistemi və Azərbaycanın maliyyə siyasəti” və başqa mövzular ətrafında müzakirələr aparılıb.
Birinci Beynəlxalq “Caspian Energy Forum-2014”-ün təşkilatçıları Caspian European Club (CEIBC) və “Caspian Energy International Media Group”dur.

Paylaş:

Baxılıb: 1360 dəfə