ƏDV-dən azad edilən mallar

Bakı:

15 °C

94 %

2 m/s

Əlaqə

AZ RU EN

Ana səhifə / İqtisadiyyat / ƏDV-dən azad edilən mallar

ƏDV-dən azad edilən mallar

08.12.2021 [10:59]

“ƏDV geri al” hansı məhsullara keçərli deyil?

Nicat Dilqəmli

Növbəti aydan etibarən avtomobillər, alkoqollu içkilər və tütün məmulatları alan zaman ödənilən ƏDV geri qaytarılmayacaq.

Bu barədə Milli Məclisin İqtisadi siyasət, sənaye və sahibkarlıq komitəsinin üzvü, deputat Vüqar Bayramov məlumat verib.

“ƏDV geri al” layihəsi çərçivəsində növbəti aydan tətbiq ediləcək dəyişikliklər ilə bağlı müraciətləri qeyd etmək istərdik ki, “Vergi Məcəlləsi”nin 165-ci “Verginin sıfır (0) dərəcəsi ilə tutulması” maddəsinə bir sıra dəyişikliklər edilib və artıq bu dəyişikliklər ötən cümə günü Milli Məclis tərəfindən təsdiq olunub”, deyə deputat bildirib.

O əlavə edib ki, yeni dəyişikliklərə əsasən, avtomobillər, alkoqollu içkilər və tütün məmulatları alan zaman ödənilən ƏDV geri qaytarılmayacaq. Əvvəllər bu istisna yalnız neft və qaz məhsullarına tətbiq olunurdu: “Bununla yanaşı, tibb müəssisələri tərəfindən göstərilən tibbi xidmətlərə görə ödənilən ƏDV-nin də bir hissəsi gələn ildən etibarən geri qaytarılacaq. Digər dəyişiklik yaşayış və qeyri-yaşayış sahələrinin alınması ilə bağlıdır. Belə ki, yeni dəyişikliyə əsasən, fiziki şəxs olan istehlakçılar eyni binadan bir və ya bir neçə yaşayış və ya qeyri-yaşayış sahələrini aldıqda, ƏDV-nin qaytarılması alınmış yaşayış sahəsinin 500 kvadratmetr və qeyri-yaşayış sahəsinin 500 kvadratmetrdən çox olmayan hissəsinə mütənasib ödənmiş ƏDV-yə tətbiq edilir.

Dəyişikliklər Azərbaycan Prezidenti tərəfindən təsdiq olunduqdan sonra gələn aydan qüvvəyə minəcək”.

Çap məhsullarının qiyməti dəyişəcək?

Yeni ildən bəzi mallar Əlavə Dəyər Vergisindən azad ediliblər. Bu malların ƏDV-dən azad olması cəmiyyətə hansı dividentlər qazandıracaq, yaxud ƏDV-dən azad edilmiş məhsulların qiymətində azalma müşahidə ediləcəkmi?

İqtisadçı-ekspert Elbrus Cəfərli məsələni “Yeni Azərbaycan”a şərh edərkən bildirdi ki, bu sahədə ƏDV-nin ləğv edilməsi kitab və digər çap məhsullarının, dərsliklərin qiymətinin aşağı düşməsinə səbəb olacaq: Məlum olduğu kimi, Vergi Məcəlləsində nəzərdə tutulan dəyişikliklərə əsasən, bir sıra mallar 2022-ci il yanvarın 1-dən ƏDV-dən azad ediləcək. Qanun layihəsinə görə, siyahısı müvafiq icra hakimiyyəti orqanı tərəfindən təsdiq edilən KİV məhsullarının və kitabların (elektron kitablar istisna olmaqla), habelə dərslik komplektlərinin idxalı və satışı, həmin malların (məhsulların) istehsalı (nəşri) ilə bağlı rulon və ya vərəqə şəklində kağızın idxalı və satışı, mətbu KİV məhsullarının və kitabların (o cümlədən elektron kitabların), habelə dərslik komplektlərinin istehsalı ilə bağlı redaksiya, nəşriyyat və poliqrafiya fəaliyyəti (reklam xidmətləri istisna olmaqla) ƏDV-dən azad olunur. Bu sahədə ƏDV-nin ləğv edilməsi kitab və digər çap məhsullarının, dərsliklərin qiymətinin aşağı düşməsinə səbəb olacaq, ölkədə çap sənayesinin inkişafını təşviq edərək yeni iş yerlərinin və sahibkarlığın inkişafına təkan verəcək”.

Ekspert kənd təsərrüfatı məhsullarının istehsalı ilə bağlı xidmətlər üçün ƏDV-nin ləğvindən də danışıb: “Layihəyə əsasən, beynəlxalq və tranzit yük daşınması ilə bağlı ekspeditor xidmətlərinin göstərilməsi ƏDV-yə sıfır dərəcə ilə cəlb ediləcək. Kənd təsərrüfatı texnikalarının mülkiyyət hüququnun keçməməsi şərti ilə müəyyən halqa və müəyyən müddətə lizinqə (icarəyə) verilməsi də ƏDV-dən azad edilir.

Kənd təsərrüfatı məhsullarının istehsalı ilə bağlı aqrotexniki xidmətlərin göstərilməsinin ƏDV-dən azad edilməsi də nəzərdə tutulub”.

Elbrus Cəfərli, həmçinin bildirib ki, bəzi mallar aksiz vergisinə cəlb ediləcək:

“Tütün əvəzləyiciləri, birdəfəlik istifadə üçün elektron siqaret, qəlyan və onların əvəzediciləri aksizli malların siyahısına daxil edilir.

Layihəyə əsasən, tütün əvəzləyicilərinin hər kiloqramına 30 manat, birdəfəlik istifadə üçün elektron siqaret, qəlyan və onların əvəzedicilərinin hər bir ədədinə isə 0,25 manat aksiz dərəcəsi tətbiq olunur. Siqaret məhsullarına görə aksiz vergi dərəcəsi 1000 ədədinə görə 38.5 manat olması müəyyən olunur”.

E.Cəfərli, həmçinin bildirib ki, enerji doldurucularının idxalı vergidən azad ediləcək: “Vergi Məcəlləsinə dəyişikliyə əsasən, hibrid - elektrik mühərriki ilə işləyən avtomobillər üçün ikinci və üçüncü səviyyə elektrik enerji doldurucularının idxalı - 2022-ci il yanvarın 1-dən 3 il müddətinə vergi ödəməkdən azad ediləcək”.

Paylaş:

Baxılıb: 1841 dəfə