Ev alqı-satqısı proseduru sadələşdi

Bakı:

26 °C

65 %

8 m/s

Əlaqə

AZ RU EN

Ana səhifə / İqtisadiyyat / Ev alqı-satqısı proseduru sadələşdi

Ev alqı-satqısı proseduru sadələşdi

17.01.2023 [10:51]

Nicat Dilqəmli

Daşınmaz əmlakın dövlət reyestri obyektlərinə dair sərəncam verilməsi haqqında müqavilələrin notariat qaydasında təsdiqlənməsi proseduru dəyişib. Bu, Prezident İlham Əliyevin təsdiqlədiyi Mülki Məcəlləyə dəyişiklikdə əksini tapıb. Qanuna əsasən, daşınmaz əmlak üzərində sərəncam verilməsinə dair notariat qaydasında təsdiq edilmiş müqavilənin informasiya sistemləri vasitəsilə real vaxt rejimində Elektron Hökumət İnformasiya Sistemi üzərindən ötürülmüş elektron nüsxəsi əsasında müvafiq hüquqlar daşınmaz əmlakın dövlət reyestrində dövlət qeydiyyatına alınacaq. Belə müqavilə ondan irəli gələn mülkiyyət və digər əşya hüquqlarının daşınmaz əmlakın dövlət reyestrində qeydiyyatının aparılması üçün ərizə hesab olunacaq.

İndiyə qədər qüvvədə olan qanuna əsasən, notarius daşınmaz əmlak üzərində sərəncam verilməsinə dair müqaviləni təsdiqlədikdən dərhal sonra onu elektron formada informasiya sistemləri vasitəsilə və təsdiqlənmiş yazılı formada sifarişli poçt göndərişi vasitəsilə daşınmaz əmlakın dövlət reyestrinə göndərməlidir. Belə müqavilə ondan irəli gələn mülkiyyət və digər əşya hüquqlarının daşınmaz əmlakın dövlət reyestrində qeydiyyatının aparılmasına dair ərizə hesab olunur və həmin müqavilə əsasında müvafiq hüquqlar dövlət qeydiyyatına alınır.

Digər dəyişiklik behlə bağlıdır. Beh müqavilənin bağlanmasını təsdiq etmək və icrasını təmin etmək məqsədilə razılığa gələn tərəflərdən birinin müqavilə üzrə digər tərəfə verəcəyi ödənişlər hesabına verdiyi pul məbləğidir. Behin məbləğindən asılı olmayaraq beh haqqında razılaşma yazılı formada bağlanmalıdır.

Qanuna əsasən, beh haqqında razılaşma daşınmaz əmlaka sərəncam verilməsi barədə müqavilənin bağlanması ilə bağlı olduqda, notariat qaydasında təsdiq edilməlidir. Daşınmaz əmlaka sərəncam verilməsi barədə müqavilənin bağlanması ilə bağlı beh haqqında razılaşmanın notariat qaydasında təsdiq edilməsi zamanı behi alana münasibətdə Mülki Məcəllənin 225.6-cı maddəsində nəzərdə tutulmuş qaydalar tətbiq ediləcək.

Məsələ ilə bağlı “Yeni Azərbaycan” qəzetinə danışan əmlak məsələləri mütəxəssisi Ramil Qasımzadə deyir ki, bundan sonra vətəndaşlar üçün əlavə müraciətlərə ehtiyac qalmayacaq. Onlar notarial qaydada əmlaklarını adlarına qeydiyyata aldıqları zaman elə yerindəcə həmin əmlak onların adına rəsmiləşdirilmiş olacaq: “Vətəndaşlarımız indiyə qədər daşınmaz əmlak alarkən notariatda alqı-satqı əməliyyatını yerinə yetirdikdən sonra reyestr xidmətinə müraciət edirdilər və oradan yeni çıxarışı əldə edirdilər. Yeni imzalanan sənədlə artıq növbəti müraciətə ehtiyac qalmayacaq. Yəni Dövlət Reyestr Xidməti artıq onlayn qaydada notariatda icra edilən hərəkətləri (mülkiyyətin addan-ada keçirilməsi, behin verilməsi, girov qoyulması və s.) görmüş olacaq. Vətəndaşların da öz adlarına qeydiyyat etdirdikləri əmlakı dərhal oradaca rəsmiləşdirmək imkanı olacaq”.

R.Qasımzadənin sözlərinə görə, bu dəyişiklik əmlakların rəsmiləşdirilməsi zamanı vətəndaşların işini xeyli asanlaşdıracaq: “Təbii ki, bu, əlavə vaxt itkisinin qarşısını almış olacaq. Eyni zamanda, yeni qayda vətəndaşların müraciətlərinin tez bir zamanda həyata keçirilməsinə imkan yaradacaq. Bundan başqa, bu, həm də sənədlərin itməsinin qarşısını alacaq. Çünki, məsələn, notariatda edilən hərəkətlərdən sonra artıq onlayn formada elektron qaydada Dövlət Reyestr Xidməti bu əməliyyatları görmüş olacaq. Bu baxımdan olduqca səmərəli və əhəmiyyətlidir”.

Paylaş:

Baxılıb: 1526 dəfə