Heydər Əliyev
yeni azerbaycan logo

Ana səhifə / Mədəniyyət / Bəzən insanlara özlərini göstərmək lazımdır ki, başa düşsünlər

Bəzən insanlara özlərini göstərmək lazımdır ki, başa düşsünlər

14.12.2021 [11:10]

Mən demirəm ki, rüşvətxor baxıb bir daha rüşvət almayacaq. Amma içində bir qırılma nöqtəsi ola bilər

Taleh Yüzbəyov

(əvvəli ötən sayımızda)

- Müsahibələrinizin birində demişdiniz ki, düşünün ki, reklam bilbordlarında şəkliniz var və bütün ölkə sizin şəkillərinizi görür. Ondan sonra işə gəlib zənglərə cavab verən sadə bir adamın həyatına davam edirsən...

- Bəli. İşlədiyim şirkətin reklamında da çəkilmişəm. Düşünün, telefon tarifi bütün şəhəri bəzəyir, səhəri günü gəlib həmin tarifi “call center”də satmalı olursan. Eyni hadisə “Oğlan evi” filminin çəkilişləri zamanı da baş verdi. O zaman satış şöbəsində çalışırdım. Axşam ilk premyeram idi. Hazırlaşıb getmişəm. Sevinirəm ki, səhnəyə çıxmışam. Zirvədəyəm, premyerada insanlar məni alqışlayır. Növbəti gün isə heç nə olmamış kimi ofis həyatına davam etmişəm.

 

Sanki, ikili həyat yaşayırdım

- Bir növ, Herman Hessenin “Yalquzaq” əsərinin qəhrəmanı kimi ikili həyat yaşamısınız. O da ikili həyat yaşamaqdan bezmişdi. Çətin olmadı?

- Çox doğru vurğuladınız. Mən anladım ki, bu ikili həyatı yaşaya bilmirəm. Sonra bu cığırda yeni üfüqlər göründü, “youtube” və “facebook” mənim məşhurlaşmağıma təkan verdi. Belə oldu ki, mən özüm  özümü çəkmək qərarına gəldim.

Səhər oyananda görüb ki, “facebook”da hər kəs bu videodan danışır

- Tale üzünüzə necə güldü? O qırılma anı necə oldu?

- 14  fevralda nişanlıma hədiyyə almağa pulum yox idi. Fikirləşdim ki, nə edim... Ağlıma gəldi ki, video çəkib onu təbrik edim. Həmin mobil operatorun uşaqları ilə danışdım. Dedim ki, mənə kömək edin, qısa süjet çəkək. O ərəfədə də nişanlım, sən demə, vaxt ayılmadığım üçün məndən inciyibmiş. Deyə də bilmirəm ki, sənə sürpriz hazırlayıram. Bir qəpik də xərcləmədən dostlarımla video çəkdik, montaj etdim. 14 fevral gecəsi sosial şəbəkədə paylaşdım. Ondan başqa hamı baxıb. Səhər oyananda görüb ki, “facebook”da hər kəs bu videodan danışır. Bu video sayəsində məşhur olacağımı gözləmirdim. Ondan sonra davamlı olaraq qısa videolar çəkdim.

Hədəfim o deyildi

- Həmin uşaqlarla indi də görüşürsünüz?

- Həmin uşaqların bir neçəsi indi mənimlə çalışır. Yeni layihələrimdə hər zaman onlar olub, olacaqlar. Hələ də münasibət  və dostluq var. Həyat yoldaşımla da iş yoldaşı olmuşuq. O uşaqların həyatımda rolu çox böyükdür. Çox şey o uşaqların hesabına oldu. Amma orada çox qala bilməzdim. Çünki hədəfim o deyildi.

İnciyənlər də var

- “Instagram” hesabınızda “Aktyor dövrünün güzgüsüdür” - deyə qeyd edibsiniz. Aktyor kimi dövrün hansı problemlərinə ayna tutubsunuz?

- Bu, Şekspirin fikridir. Müasir dövr üçün “Yaradıcı insan dövrünün güzgüsüdür” olmalıdır. Videolarımda dövrümüzün reallıqlarını işıqlandırmağa çalışıram. Mənim işlərimə baxan özünü görə bilir. Bəzən insanlara özlərini göstərmək lazımdır ki, başa düşsünlər. Mən demirəm ki, rüşvətxor baxıb bir daha rüşvət almayacaq. Amma içində bir qırılma nöqtəsi ola bilər. Dəfələrlə videolara baxıb nəticə çıxaran insanlar olub. Özləri yazıb etiraf edirlər və mənə təşəkkürlərini bildirirlər. Əksinə, qəbul etməyən, inciyənlər də var.

Dünyada elə təhsilsiz aktyorlar var ki...

- Əhatənizdə təhsili olmayan gənclər də var, münasibət necədir?

- İnternet nə teatrdır, nə də televiziya. Sən heç kimin yerini tutmursan. Sponsor tapıb video çəkirsən və öz kanalında yayımlayırsan. Əgər insan ədalətlidirsə, bu gənclər insanlarda qıcıq yaratmamalıdır. Əlbəttə, təhsil önəmlidir. İnsan aktyor olmaq istəyirsə, təhsilinin olması üstünlükdür. Amma dünyada elə təhsilsiz aktyorlar var ki, təhsilli aktyorlardan kameranı daha yaxşı  hiss edirlər, tərəf müqabilinin sözünə girmirlər, mətni yadda saxlaya bilirlər. Bunlar təcrübə ilə qazanılır.

Bizim vaxtımızda operatorun kamerası yox idi

- Demişdiniz ki, Mədəniyyət və İncəsənət Universitetinin düşünən beyinlərini söküb yenidən yığmaq lazımdır. Sənət böyüklərinizin xətrinə dəyməkdən qorxmursunuz?

- Əgər yolunu satira janrından salırsansa, onsuz da həmişə kiminsə xətrinə dəyməli olacaqsan. Videolarımın çoxu satiradır. Qara yumorla məşğul olmaq istəyirsənsə, istər-istəməz səndən inciyəcəklər. İncəsənət Universitetini bitirmiş, məzunları ilə dəfələrlə söhbət etmiş bir adam kimi deyə bilərəm ki, teatr və kino aktyorluğunu oxuyan uşaqlara heç vaxt kamera qarşısında dərs keçmirlər, ancaq teatrda dərs keçirlər. Hətta bizim vaxtımızda operatorun kamerası yox idi. Bəs o nə ilə öyrənəcək? Evdə öyrənəcək? Sovet dövründən qalma bir “kafa” var. Müəllim və tələbələr zamanla ayaqlaşmalıdırlar. Onların nə yeni filmlərdən, nə də festivallardan xəbərləri var. Bu kimi hallar belə düşünməyə məcbur edir. Bu yaxınlarda reklam çəkilişi edirdik. Kast üçün uşaqları çağırdıq. İstədim ki, öz uşaqlarımız olsun. Gördüm ki, alınmır. Ən azından, masterklasslar keçirilməlidir. Dünyanın məşhur aktyorları 100 dollar ödəməklə sənə masterklass keçir. Bax, bu özünə yatırımdır. Deyiləsi dərd deyil. Mən oradan məzun olmuşam deyə bilirəm. Heç kəsə şər atmıram. Ümid edirəm ki, dəyişilsin. Amma necə deyərlər, köhnə hamam, köhnə tas.

Olmazdı ki, özümüz ona dəstək olaq? 

- Film sektoru həqiqətən çöküb?

- 10 il əvvəl ilə müqayisədə çöküb. Xatırlayırsınızsa, ilk komediya filmlərinin bir uğur dönəmi oldu. 2017-ci ildə bir ilə 15 film çəkilirdi. Sonradan o kino çəkənlərin filmə kommersiya məqsədi ilə yanaşması tamaşaçıları küsdürdü. Daha sonra, məlum olduğu kimi, kinoteatrlar arasında soyuq müharibə oldu. Vəziyyət gərginləşdi. Kinoya pul ayrılır, amma reklama ayrılmır. Bu, sovetdən qalma düşüncədir. Filmi tanıtmaq lazımdır. Baxın Rüfət Həsənovun “Daxildəki ada” filmi 26-cı Sarayevo Film Festivalında qalib oldu. Oskar mükafatı mərasimində Azərbaycanı təmsil etdi. İkinci uğurumuz isə Hilal Baydarov oldu. Ötən il Hilal Baydarovun “Səpələnmiş ölümlər arasında” filmi dünyanın ən nüfuzlu festivalında bizi təmsil etdi. Hilal kino dərvişidir. Onu şəxsən tanıyıram. Bu insanın kinodan başqa amalı yoxdur. Filmlərini də dost-tanışla 100 manata çəkirdi. Xarici prodüserlərdən biri onun işini bəyənib dəstək oldu. Olmazdı ki, özümüz ona dəstək olaq?  Azərbaycanda “art house” alternativ janrlı filmlərə, az büdcəli azad filmlərə dəstək olmaq lazımdır. Ən əsası, filmlərə ayrılan pulları düzgün xərcləmək lazımdır ki, sənətkarlar yetişsin və ölkəmizi layiqincə təmsil edə bilsinlər. Biz də mədəniyyətimizlə fəxr edək.

Zövq aldım

- Səmimi söhbətə görə təşəkkür edirik.

- Uzun müddətdir ki, heç bir mətbuat orqanına müsahibə vermirdim. Sözlərim və fikirlərim təhrif olunurdu. Amma çox zövq aldım. Mən təşəkkür edirəm.

Müşfiqə

 

Paylaş
Baxılıb: 228 dəfə

Xəbər lenti

Hamısına bax

Siyasət

İqtisadiyyat

İqtisadiyyat

Siyasət

Xəbər lenti

Xəbər lenti

Xəbər lenti

Arxiv
B Be Ça Ç Ca C Ş
1
2 3 4 5 6 7 8
9 10 11 12 13 14 15
16 17 18 19 20 21 22
23 24 25 26 27 28 29
30 31