“Milyonluq rəssam”

Bakı:

15 °C

67 %

10 m/s

Əlaqə

AZ RU EN

Ana səhifə / Mədəniyyət / “Milyonluq rəssam”

“Milyonluq rəssam”

08.04.2023 [11:49]

Niyə cəzalandırılırdı?

Şahanə XANKİŞİYEVA

Bu gün dünyaca məşhur Pablo Pikassonun anım günüdür. Pikasso uşaqlığından gəncliyinədək realistik tərzdə rəsmlər çəkməklə əsrarəngiz incəsənət bacarığı nümayiş etdirib. İlk əvvəl atasının, daha sonra anasının soyadını daşıyan Pikassonu 23 müxtəlif adlarla çağırıblar. Pablo Pikasso adı ilə isə incəsənətdə “milyonluq rəssam” kimi tanınıb.

Pikasso doğulduqdan sonra maraqlı bir hadisə yaşanır, o, ölü doğulur. Ancaq bir siqaret tüstüsü onun həyatını xilas edir. Belə ki, ölmüş körpəni görən dayısı siqaret çəkərək tüstünü onun üzünə üfürür və Pablo ağlamağa başlayır. Beləliklə, siqaret və dayısı Pikassonun həyatını xilas edir...

“Tanrı da bir sənətkardır... Mənim kimi. Mən, Tanrıyam” - Pikasso...

Pikasso rəssamlığa çox erkən yaşlarında başlayıb. O, sözün əsl mənasında rəssam olmaq üçün doğulub, belə ki, ilk dediyi söz ispan dilində “qələm” mənasını bildirən “lapiz”in qısaldılmış forması “piz” olub. Sonra isə atası onun rəssamlığa yönəlməsində dəstək verib. Elə ilk rəssamlıq dərslərini rəsm müəllimi olan atası Xose Ruizdən alır. Ruiz Pablonun özündən daha üstün olduğunu gördükdən sonra rəsm çəkməkdən imtina edir.

Pikasso məktəbdə seçilən şagirdlərdən olsa da tez - tez cəza alırdı. Pikasso sonralar verdiyi müsahibələrdə pis bir şagird olduğunu və tez - tez zirzəmiyə göndərildiyini deyib. Ağ divarları olan boş bir otaqda sadəcə bir oturacağın olduğunu deyən Pikasso

orada vaxt keçirməyi sevdiyini, hətta sonsuza qədər orada qala biləcəyini deyib. Çünki, zirzəmidə fasiləsiz qara qələmlə işləyə bilmək arzusu onda “zirzəmi sevdası” yaratmışdı. 8 yaşında isə özünün ilk ciddi əsəri olan “Pikador”u yaradaraq ömrü boyu özündə saxlayır.

Pikasso 1894-1895-ci illərdə La-Korunyad incəsənət məktəbində təhsil alır. 1898-ci ilin iynunda Barselonaya dönür və burada “Els Quatre Gats” kafesində fəaliyyət göstərən rəssamlar cəmiyyətinə üzv yazılır. Onun ilk rəsm sərgisi də məhz bu kafedə nümayiş etdirilir. Ən məşhur əsərləri sırasında isə erkən-kubist tərzində olan “Avinyonlu qızlar” və “Gernika” əsəri xüsusi qeyd edilə bilər.

Parisdə olduğu zaman Pikasso tez bir zamanda sənətkarların əhatəsinə girir və ömrünün sonuna qədər bir çox şairlə dostluq edir. Bunlar arasında Maks Yakob və Giyom Apolliner var idi. Pikasso xüsusilə Maks Yakob ilə yaxın idi. Belə ki, 1902-1903-cü illərin qışında, Pikassonun sözün əsl mənasında diləndiyi zaman, Yakob otağını onunla bölüşməyə dəvət edir. Yalnız bir yataq olduğundan dostlar yatağı günün vaxtlarına görə bölür: Yakob gecə, Pikasso gündüzlər yatır və bu ikisinə də uyğun gəlir, çünki Pablo gecə işləməyi üstün tuturdu...

Pikassonun həddindən artıq özünəvurğunluğu və eqosu onun həm həyatına, həm də yaradıcılığına ciddi zərbə vurur. Belə ki, dövrünün psixoloqları onun hərəkətlərində şəxsiyyət pozuqluğu meyarlarının olduğunu demişdilər. Rəssamın dostu ilə dialoqda dediyi cümlə də onun özünə pərəstişkarlığın sübutunu tapıb: “Tanrı da bir sənətkardır... Mənim kimi. Mən, Tanrıyam”

Rəssamın hətta şizofrenik statusu tibb ictimaiyyəti tərəfindən dəstəklənirdi. Buna isə səbəb rəsmlərindəki mürəkkəblik idi.

Mona Lisa’nı kim oğurladı?

1911- ci ildə “Mona Liza” portreti Luvrdan oğurlandığı zaman polis Pikassonun şair dostu Giyom Apollineri şübhəli qismində saxlayır, amma o, günahkar kimi Pikassonu göstərir. Nəticədə polis Pikassonu nəzarətə götürür, ancaq sonradan hər ikisi azadlığa buraxılır...

4 may 2010-cu ildə Kristiesdə 106 milyon 482 min dollara satılan Pikassonun “Çılpaq, Yaşıl yarpaqlar və Büst” əsəri o dövrdə dünyanın ən bahalı sənət əsəri oldu.

2015-ci il mayın 11-də hərracların birində satılan sənət əsərləri üçün yeni rekord qeydə alınıb - Pablo Pikassonun “Əlcəzair qadınları” adlı rəsm əsəri 179 milyon 365 min dollara satılıb.

Paylaş:

Baxılıb: 749 dəfə