Əli Əhmədov: Ermənistan Türkiyənin qoyduğu ədalətli şərtə əməl etməlidir

Bakı:

26 °C

47 %

9 m/s

Əlaqə

AZ RU EN

Ana səhifə / Müsahibə / Əli Əhmədov: Ermənistan Türkiyənin qoyduğu ədalətli şərtə əməl etməlidir

Əli Əhmədov: Ermənistan Türkiyənin qoyduğu ədalətli şərtə əməl etməlidir

07.07.2012 [11:43]

Yeni Azərbaycan Partiyasının Sədr müavini-İcra katibi, millət vəkili Əli Əhmədov SİA-ya müsahibə verib:
- Yeni Azərbaycan Partiyasının təşkil etdiyi “Yay məktəbləri”ndə əsasən hansı məsələlər müzakirə edilir, gənclərə aşılanan fikirlər və onlardan gözləntiləriniz nədir?
- İlk olaraq gənclər bu layihə çərçivəsində ölkəmizin səfalı yerlərində dincəlirlər. Digər yandan isə onlar istirahətlə yanaşı təfəkkürlərini formalaşdırır, özləri üçün maraqlı olan bir sıra məsələləri müzakirə edirlər. Dünən keçirilən müzakirələrdə “Azərbaycan 2020: gələcəyə baxış” İnkişaf Konsepsiyasında gənclərin rolu mövzusunda fikir mübadiləsi aparıldı. Mən hesab edirəm ki, bu mövzu bu gün Azərbaycan reallığında kifayət qədər aktualdır. Bu cür müzakirələrin keçirilməsində əsas məqsədimiz gənclərin 2020-ci ilə ünvanlanmış inkişaf konsepsiyasınının tərtib və qəbul edilməsində yaxından iştirakını təmin etməkdir. Bu gün Azərbaycan gəncləri ölkəmizin demoqrafik strukturunda yüksək yer tuturlar. Məhz bu baxımdan Azərbaycanın strategiyasının müəyyənləşməsində gənclərin fikirlərinin öyrənilməsi vacibdir. Yəni, bizim üçün ölkəmizin gələcəyinin gənclərin gözündən təhlil edilməsi önəmlidir. Ona görə də, onların bütün fikirlərinə diqqət və qayğı ilə yanaşırıq.
- Gənclərin sosial şəraitinin yaxşılaşdırılması ilə bağlı ölkə səviyyəsində bir sıra tədbirlər görülür. Növbəti planlarınız hansı istiqamətdədir?
- Hökumətimiz tərəfindən Azərbaycan gənclərinin sosial şəraitinin yaxşılaşdırılması ilə bağlı layihələr hazırlanır. Bu istiqamətdə hüquqi baza artıq formalaşıb. İlk olaraq qeyd edim ki, gənclərin işlə təmin olunması aktual problemlərdən biridir. Digər bir problem isə gənclərin, gənc ailələrin mənzil şəraitinin yaxşılaşdırılması ilə əlaqədardır. Bütün bu problemlərin həlli ilə bağlı ölkə Prezidentinin təşəbbüsü ilə hökumətimiz tərəfindən müxtəlif layihələr hazırlanır. Hazırda gənclərə ipoteka kreditlərinin güzəştli və yüngülləşdirilmiş şərtlərlə verilməsi üzərində iş gedir. Mən hesab edirəm ki, bu iki vacib məsələnin həll olunması Azərbaycan gənclərinə hökumətimiz tərəfindən göstərilən qayğının ifadəsi olacaq.
- Türkiyə mətbuatında yazılan bəzi məlumatlara görə, Ermənistanla sərhədlərin açılması Dağlıq Qarabağ məsələsinin həllini tezləşdirə bilər. Sizcə də, bu, belədirmi?
- Bununla əlaqədar hələlik müxtəlif söz-söhbətlər davam edir. Siz bilirsiniz ki, Türkiyə ilə Ermənistan arasındakı sərhədlər Ermənistanın Azərbaycan torpaqlarını işğal etdiyinə görə bağlanıb. Sərhədlərin bağlanması Türkiyənin etirazını ifadə edirdi. Türkiyə cəmiyyəti birmənalı şəkildə Ermənistanın Azərbaycana təcavüzünü aradan qaldırmamış sərhədlərin açılmasının mümkün olmayacağı barədə mesajlar verib. Türkiyənin dövlət rəsmiləri dəfələrlə Ermənistanla sərhədlərin açılmasının yeganə şərti olaraq rəsmi İrəvanın Azərbaycan torpaqlarının işğalına son qoymasını tələb ediblər. Hesab edirəm ki, bütün bunlar bizdə işğal faktı aradan qalxmadan Türkiyə-Ermənistan arasında 20 ildir bağlı qalan sərhəd məsələsinin öz həllini tapa bilməyəcəyinə inam yaradır. Əgər Ermənistan Türkiyə ilə sərhədlərin açılmasını istəyirsə, Türkiyənin qoyduğu ədalətli şərtə əməl etməlidir. Yəni, Azərbaycanın işğal altında olan torpaqlarını azad etməlidir.

Paylaş:

Baxılıb: 1195 dəfə