Azərbaycan Ağsaqqallar Şurasının üzvləri Qəbələdə bölgənin gəncləri ilə görüş keçiriblər

Bakı:

28 °C

51 %

4 m/s

Əlaqə

AZ RU EN

Ana səhifə / Siyasət / Azərbaycan Ağsaqqallar Şurasının üzvləri Qəbələdə bölgənin gəncləri ilə görüş keçiriblər

Azərbaycan Ağsaqqallar Şurasının üzvləri Qəbələdə bölgənin gəncləri ilə görüş keçiriblər

31.07.2013 [09:36]

Azərbaycan Ağsaqqallar Şurasının təşkilatçılığı ilə Qəbələ şəhərində gənclərlə görüş keçirilib.
AzərTAc xəbər verir ki, tədbir iştirakçıları əvvəlcə Ümummilli lider Heydər Əliyevin Qəbələ şəhərindəki abidəsi önünə əklil və gül dəstələri qoyaraq xatirəsini ehtiramla yad ediblər.
Tədbirin əhəmiyyətindən danışan Azərbaycan Ağsaqqallar Şurasının sədri, Milli Məclisin deputatı Fəttah Heydərov bildirib ki, Ulu öndər Heydər Əliyev müstəqilliyimizin ilk illərində ölkə rəhbərliyinə qayıdışı ilə xalqımızı fəlakətdən xilas edib, Onun həyata keçirdiyi məqsədyönlü siyasət nəticəsində Azərbaycanın dünyada nüfuzu artıb. Hazırda Prezident İlham Əliyev Ümummilli liderin müdrik daxili və xarici siyasət kursunu layiqincə davam etdirir.
Diqqətə çatdırıb ki, bütün ömrünü Azərbaycan xalqına həsr etmiş Ulu öndər Heydər Əliyevin hər sözü, açdığı uğurlu yol bu gün gənclərimizin həyat amalına çevrilib. Azərbaycan xalqının ağsaqqal sözünü daima uca tutmasından və onların ətrafında sıx birləşməsindən danışan natiq eyni zamanda, qeyd edib ki, ağsaqqallar da gənclər üçün kamil örnək olmalıdırlar. Bu baxımdan keçirilən tədbir həm də nəsillərin görüşüdür.
Azərbaycan Ağsaqqallar Şurasının sədri, Milli Məclisin deputatı Fəttah Heydərov ölkəmizin inkişafında gənclərin və ağsaqqalların rolundan da geniş söhbət açıb. Bildirib ki, Ulu öndər Heydər Əliyevin bir ağsaqqal olaraq Azərbaycan üçün açdığı yol ən düzgün istiqamətdir. Bu yolu bəyənməyənlərin və irad tutanların əksəriyyəti kənar qüvvələrin maraqlarına xidmət edirlər və onların təsiri altına düşürlər. O, üzünü ağsaqqallara tutaraq deyib ki, sizin rolunuz gəncləri düz yola istiqamətləndirməkdən ibarətdir.
Rayon İcra Hakimiyyətinin başçısı Səbuhi Abdullayev Azərbaycanda ağsaqqal institutunun min illərin sınağından uğurla çıxdığını və xalqın ən çətin anlarında uğurla fəaliyyət göstərdiyini diqqətə çatdırıb.
Görüşdə çıxış edən ağsaqqallar rayon şöbələrinin fəaliyyətində gənclərin vətənpərvərlik tərbiyəsinə xüsusi diqqət yetirildiyini deyiblər. Bildirilib ki, gənclər və yeniyetmələrdə Vətənə məhəbbət hissinin aşılanması üçün vaxtaşırı ümumtəhsil məktəbləri, kolleclər və musiqi məktəblərində görüşlər keçirilir, ağsaqqalların örnək ola biləcək həyat yolu haqqında söhbətlər aparılır.
Qarşılıqlı fikir mübadiləsi şəraitində davam edən görüşdə ölkəmizdə yaşlı nəslə və gənclərə göstərilən diqqət və qayğıya görə Prezident İlham Əliyevə minnətdarlıq bildirilib.
Gənclər ölkəmizdə aparılan uğurlu islahatlardan danışıb, qarşıdakı prezident seçkilərində dövlətimizin başçısı İlham Əliyevin namizədliyini yekdilliklə dəstəkləyəcəklərini vurğulayıblar.

Paylaş:

Baxılıb: 2329 dəfə