“Yerli özünü idarəetmə orqanlarında qadınların iştirakı: reallıqlar və perspektivlər” mövzusunda konfrans keçirilib

Bakı:

29 °C

48 %

13 m/s

AZ RU EN

Ana səhifə / Siyasət / “Yerli özünü idarəetmə orqanlarında qadınların iştirakı: reallıqlar və perspektivlər” mövzusunda konfrans keçirilib

“Yerli özünü idarəetmə orqanlarında qadınların iştirakı: reallıqlar və perspektivlər” mövzusunda konfrans keçirilib

01.11.2014 [12:44]

Oktyabrın 31-də Bakıda “Kaunterpart İnterneşnl” təşkilatı ABŞ Beynəlxalq İnkişaf Agentliyi (USAİD) tərəfindən maliyyələşən Qadın İştirakçılığı Proqramı çərçivəsində “Yerli özünü idarəetmə orqanlarında qadınların iştirakı: reallıqlar və perspektivlər” mövzusunda konfrans keçirilib. Ailə, Qadın və Uşaq Problemləri üzrə Dövlət Komitəsi ilə əməkdaşlıq çərçivəsində Azərbaycan Şəhər, Qəsəbə, Kənd Bələdiyyələrinin Milli Assosiasiyalarının texniki dəstəyi ilə təşkil olunan konfransda yerli özünüidarəetmədə qadın liderliyinin gücləndirilməsi ilə bağlı prioritetlər müəyyənləşdirilib.
AzərTAc xəbər verir ki, hökumət rəsmilərinin, Milli Məclisin deputatlarının, vətəndaş cəmiyyəti təşkilatlarının və bələdiyyələrin nümayəndələrinin iştirak etdikləri tədbirdə yerli özünüidarəetmədə qadın liderliyi, qadınların bələdiyyələrdə bərabər təmsilçiliyinin hüquqi aspektləri, bələdiyyələrin fəaliyyətində qadınların rolunun artırılması yolları və digər mövzularda məruzələr dinlənilib. Çıxışlarda bələdiyyələr və qeyri-hökumət təşkilatları arasında əməkdaşlığın və qarşıdan gələn bələdiyyə seçkilərində qadınların aktivliyinin artırılmasının vacibliyi vurğulanıb.
Milli Məclisin sosial siyasət komitəsinin üzvü, “Lider Qadınlar” İctimai Birliyinin sədri Məlahət İbrahimqızı bildirib ki, dövlətin idarə olunmasında və yerli özünü idarəetmədə qadınların iştirak hüququ beynəlxalq və milli qanunvericilikdə təsbit edilib. Azərbaycanda bu sahədə dövlətin siyasi iradəsini əks etdirən, beynəlxalq standartlara cavab verən hüquqi baza yaradılıb və bir sıra nailiyyətlər əldə olunub.
USAID-in Qadın İştirakçılığı Proqramı çərçivəsində görülən işlər barədə məlumat verən M.İbrahimqızı qeyd edib ki, qarşıdakı bələdiyyə seçkilərində qadın namizədlərin sayının artırılması və qadınların siyasi iştirakçılığı platformasının gücləndirilməsi layihənin əsas hədəfləri sırasındadır.
Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova yerli özünüidarəetmə orqanlarında qadınların təmsilçiliyinin artırılmasının vacibliyindən danışaraq, 2009-cu ildə keçirilmiş bələdiyyə seçkilərində qadınların təmsilçiliyinin 4 faizdən 27 faizə yüksəlməsini müsbət hal kimi dəyərləndirib.
USAID-in ölkəmizdəki missiyasının rəhbəri Bruk Ayşam bildirib ki, daha dayanıqlı və ədalətli inkişafa qadınların liderlik potensialını artırmaqla nail olmaq mümkündür.
Milli Məclisin Regional məsələlər komitəsinin üzvü Tahir Rzayev, Ədliyyə Nazirliyinin Bələdiyyələrlə İş Mərkəzinin direktoru Mehdi Səlimzadə, Azərbaycan Şəhər, Qəsəbə, Kənd Bələdiyyələrinin Milli Assosiasiyalarının sədri Hümbət Hüseynov çıxış edərək yerli özünüidarəetmə orqanlarında qadınların təmsilçiliyi ilə bağlı fikirlərini bölüşüblər.
Müzakirələr işçi qrupların iştirakı ilə davam etdirib.

Paylaş:

Baxılıb: 885 dəfə