Münaqişə Azərbaycanın ərazi bütövlüyü çərçivəsində həll olunmalıdır

Bakı:

26 °C

70 %

2 m/s

Əlaqə

AZ RU EN

Ana səhifə / Siyasət / Münaqişə Azərbaycanın ərazi bütövlüyü çərçivəsində həll olunmalıdır

Münaqişə Azərbaycanın ərazi bütövlüyü çərçivəsində həll olunmalıdır

16.07.2009 [10:19]

Mübariz Qurbanlı: Təcavüzkarla işğala məruz qalan tərəzinin eyni gözündə saxlanılırsa, bu zaman ədalət pozulur və məsələnin həlli yubanır
Məlum olduğu kimi, son dövrlər Ermənistan-Azərbaycan, Dağlıq Qarabağ münaqişəsinin danışıqlar yolu ilə tənzimlənməsi prosesində yenidən fəallıq hiss olunmaqdadır. ötən həftə regiona növbəti səfərləri çərçivəsində ATƏT-in Minsk qrupunun həmsədrləri növbəti dəfə bəyanat verərək, yaxın zamanlarda Dağlıq Qarabağ probleminin həllinə yönəlik ilkin sülh razılaşmasının əldə edilməsinin mümkünlüyünə işarə vurdular. Eyni zamanda, ötən həftənin sonlarında ATƏT-in Minsk qrupunun həmsədr dövlətlərindən biri olan ABŞ-ın Dövlət Departamenti 6 bənddən ibarət Madrid prinsiplərini açıqladı.
Məsələyə münasibət bildirən Yeni Azərbaycan Partiyası (YAP) İcra katibinin müavini, millət vəkili Mübariz Qurbanlı deyib ki, Ermənistan-Azərbaycan, Dağlıq Qarabağ münaqişəsinin həlli ilə əlaqədar çoxlu ümidverici fikirlər səsləndirilir: “özü də bu fikirlər həmişə və mütəmadi səsləndirilir. Hamımız çox istərdik ki, münaqişə tez həll olunsun. Amma, bildiyiniz kimi, bu münaqişənin həlli ilə əlaqədar müəyyən problemlər var. Bugünlərdə mətbuatda Madrid prinsipləri açıqlanıb, bununla bağlı söz-söhbətlər səngimək bilmir. Lakin bütün bunların fonunda Azərbaycanın mövqeyi hər zaman Prezident İlham Əliyev tərəfindən birmənalı şəkildə bəyan edilib, ortaya qoyulub. Yəni, bir qarış da olsun, torpaq güzəştə gedilməməlidir və gedilməyəcək. Həmçinin, münaqişə Azərbaycanın ərazi bütövlüyü çərçivəsində həll olunmalıdır. İndi kim nə deyirsə-desin, Azərbaycanın birmənalı mövqeyi bundan ibarətdir”.
M.Qurbanlı hesab edir ki, ATƏT-in Minsk qrupu həmsədrlərinin ümidverici sözləri, bəyanatları hələlik onların hansı prinsiplərə əsaslandığını ifadə etmir.
“Dəqiq bilmək olmur ki, onlar nəyə əsaslanaraq, nəyə ümid edərək bu fikirləri səsləndirirlər. Əgər bizim dediyimiz şərtlər daxilində belə fikirlər səsləndirirlərsə, bəli, bu, mümkündür. Yox, əgər Azərbaycanın ərazi bütövlüyünə və yaxud gələcəkdə Dağlıq Qarabağ üzərində Azərbaycanın idarəçilik prinsiplərinin qorunub-saxlanılmasına zidd fikirlərə iddia edirlərsə, onda, bu, mümkün deyil. Məsələn, Madrid prinsiləri nə deyir? Guya bir keçid mərhələsi yaradılmalı, bu, sonradan tədricən Dağlıq Qarabağ üzərində Azərbaycanın təsirinin azaldılmasına yönəlməlidir və sair. Bu prinsiplərə əgər ümidverici prinsiplər kimi yanaşıb mövqe ifadə edirlərsə, o zaman Azərbaycan buna heç cür razı deyil. Bir sözlə, biz dəfələrlə ümidverici bəyanatlar eşitsək də, hələlik onların real nəticəsi olmayıb. Ona görə ki, beynəlxalq təşkilatlar təcavüzkara qarşı təzyiq metodundan istifadə etmirlər, təcavüzkarla təcavüzə məruz qalan da tərəzinin eyni gözündə saxlanılırsa, bu zaman ədalət pozulur və məsələnin həlli yubanır” deyə YAP İcra katibinin müavini vurğulayıb.
M.Qurbanlı ilkin sülh razılaşması ilə bağlı hər hansı proqnoz verməyin çətin olduğunu bildirib. Onun fikrincə, bu, beynəlxalq aləmdəki proseslərdən və Ermənistana məlum güclərin nə dərəcədə təsir göstərəcəyindən asılıdır.
Nardar BAYRAMLI

Paylaş:

Baxılıb: 1359 dəfə