Azərbaycan hökuməti ilə Beynəlxalq Miqrasiya Təşkilatı arasında əməkdaşlıq inkişaf edir

Bakı:

17 °C

54 %

4 m/s

Əlaqə

AZ RU EN

Ana səhifə / Siyasət / Azərbaycan hökuməti ilə Beynəlxalq Miqrasiya Təşkilatı arasında əməkdaşlıq inkişaf edir

Azərbaycan hökuməti ilə Beynəlxalq Miqrasiya Təşkilatı arasında əməkdaşlıq inkişaf edir

08.03.2018 [08:53]

Azərbaycan Respublikası Baş nazirinin müavini, Qaçqınların və Məcburi Köçkünlərin İşləri üzrə Dövlət Komitəsinin sədri, Beynəlxalq Humanitar Yardım üzrə Respublika Komissiyasının sədri Əli Həsənov martın 7-də ölkəmizdə səfərdə olan Beynəlxalq Miqrasiya Təşkilatının (BMqT) baş direktorunun müavini xanım Laura Tompson ilə görüşüb.
AZƏRTAC xəbər verir ki, Baş nazirin müavini Azərbaycanın Beynəlxalq Miqrasiya Təşkilatının bütün qurumları, o cümlədən Cenevrə bölməsi ilə sıx əməkdaşlığa malik olduğunu söyləyib.
Əli Həsənov Azərbaycanda qaçqın və məcburi köçkünlərin həyat şəraitinin yaxşılaşdırılması istiqamətində görülən işlərdən danışıb. O qeyd edib ki, Prezident İlham Əliyevin rəhbərliyi ilə Azərbaycan dövləti tərəfindən qaçqın və məcburi köçkünlərlə bağlı görülən işlər yüksək qiymətləndirilir. Məhz buna görə BMT-nin Qaçqınlar üzrə Ali Komissarlığı Azərbaycanı İcraiyyə Komitəsinin səsvermə hüququ olan tam üzv kimi qəbul edib. Qaçqınlar üzrə Ali Komissarlığın İcraiyyə Komitəsinin hər il keçirilən sessiyasında iştirak etdiyini xatırladan Əli Həsənov BMT-nin qurumlarının Azərbaycandakı uğurlu fəaliyyətini qeyd edib.
Əli Həsənov BMqT-nin Azərbaycandakı nümayəndəliyinin fəaliyyətinə də toxunub. Bildirib ki, nümayəndəlik Azərbaycan hökuməti ilə çox sıx əlaqə qurub.
Diqqətə çatdırılıb ki, Beynəlxalq Miqrasiya Təşkilatı dəyəri 30 milyon dollaradək olan müxtəlif layihələr, proqramlar həyata keçirməklə Azərbaycan hökumətinə kömək edib. Bu layihələrin, proqramların hamısı Azərbaycan hökumətinin prioriteti olub. Həmin layihələrə insan alverinə qarşı mübarizə, su mənbələrinin bərpası və s. mühüm məsələlər daxildir.
BMqT-nin Cenevrədə yerləşən mənzil-qərargahında bu təşkilatın baş direktoru Uilyam Leysi Svinq ilə keçirdiyi görüşü xatırladan Əli Həsənov bildirib ki, görüşdə mühüm məsələlər müzakirə olunub. BMqT və Azərbaycan arasında miqrasiya sahəsində əməkdaşlığın yüksək səviyyədə olması məmnunluqla qeyd edilib.
Ermənistan-Azərbaycan, Dağlıq Qarabağ münaqişəsindən danışan Baş nazirin müavini bu problemin həlli ilə bağlı yaradılmış Minsk qrupunun 20 ildən çoxdur davam edən fəaliyyətinin təəssüf doğurduğunu deyib. Bildirib ki, bu vaxtadək qəbul olunan bütün sənədlər, sadəcə, kağız üzərində qalıb. Azərbaycan torpaqlarının 20 faizi Ermənistan silahlı qüvvələri tərəfindən işğal edilib. İndiki Ermənistan dövləti tarixi Azərbaycan torpaqlarında çar Rusiyası tərəfindən yaradılıb ki, bununla da azərbaycanlıların bu ərazilərdən deportasiyası başlayıb. Nüfuzlu beynəlxalq qurumların münaqişənin həllinə dair qəbul etdikləri qətnamələrin hələ də yerinə yetirilməməsi, beynəlxalq güclərin münaqişənin həllinə ikili standartlarla yanaşmaları bir daha sübut edir ki, bu, antidemokratik, ədalətsiz mövqedir.
Əli Həsənov ölkəmizdə gedən inkişaf prosesləri barədə də məlumat verib. O deyib ki, bu inkişafın təməli Ulu öndər Heydər Əliyev tərəfindən qoyulub və bu siyasət uğurla davam etdirilir. Dünya İqtisadi Forumu 2017-ci ildə Azərbaycanı rəqabətqabiliyyətliliyinə görə 35-ci yerə layiq görüb. Azərbaycan inkişaf etmiş ölkələr arasında 3-cü, MDB məkanında isə 1-ci yerdədir. Ərazi və əhali baxımından elə də böyük olmayan Azərbaycanın qısa müddətdə - son 10-15 il ərzində belə nailiyyətlər qazanması heç də asan olmayıb. Azərbaycanda yoxsulluğun və işsizliyin səviyyəsi 5 faizdir. 2003-cü ildə qaçqın və məcburi köçkünlər arasında yoxsulluq həddi 75 faiz idisə, bu gün 12 faizdir. Dünyanı bürüyən maliyyə böhranı Azərbaycana çox az təsir göstərdi. Bu gün ölkəmizdə ümumi daxili məhsulun 70 faizə qədəri qeyri-neft sektorunun payına düşür. Azərbaycanda qeyri-neft sektorunun bir çox sahələrinin inkişafına xüsusi diqqət yetirilir.
Əli Həsənov ölkənin sürətli inkişafının miqrasiya məsələlərinə də təsir etdiyini deyib. Bildirib ki, bu inkişaf bir tərəfdən ölkə əhalisinin digər ölkələrə getməsinin qarşısını alır, iş yerlərinin sayı artır, digər tərəfdən isə ölkəyə miqrantların axınına imkan yaradır. Azərbaycanda böyük enerji, infrastruktur layihələri həyata keçirilir. Bu da iş yerlərinin artması deməkdir. Əgər bizim torpaqlarımız işğal edilməsə idi, bir milyondan artıq qaçqın və məcburi köçkünümüz olmasaydı, inkişafımız bundan da sürətli olardı.
Baş nazirin müavini qaçqınların və məcburi köçkünlərin vəziyyətinin yaxşılaşdırılması ilə bağlı Azərbaycanın təcrübəsinin bir çox Avropa ölkələri üçün nümunə olduğunu deyib. Bildirib ki, Azərbaycanda qaçqınların və məcburi köçkünlərin hüquqlarının qorunduğu, problemlərinin həll edildiyi bir vaxtda bəzi Avropa ölkələrində miqrantlar böyük problemlərlə, təzyiqlərlə üzləşirlər. Bu gün 550 milyon nəfər əhalisi olan Avropa ölkələri 600-700 min qaçqın problemi qarşısında aciz qalıb. Lakin 10 milyon nəfər əhalisi olan Azərbaycan ölkə rəhbərliyinin düzgün və humanist siyasəti nəticəsində onilliklərdən bəri 1,2 milyon qaçqın və məcburi köçkünlə bağlı problemlərin öhdəsindən gəlir.
Beynəlxalq Miqrasiya Təşkilatının baş direktorunun müavini Laura Tompson ətraflı məlumata görə təşəkkür edib, təmsil etdiyi qurum ilə Azərbaycan hökuməti, xüsusilə Qaçqınların və Məcburi Köçkünlərin İşləri üzrə Dövlət Komitəsi arasında əməkdaşlığın əhəmiyyətini vurğulayıb. Bildirib ki, Azərbaycanda inklüziv cəmiyyət qurulub. BMqT-nin ən fəal üzvlərindən biri olan Azərbaycan regionda mühüm önəm kəsb edən ölkədir, xüsusən də tranzit ölkə kimi böyük rola malikdir.
“Beynəlxalq Miqrasiya Təşkilatının Azərbaycandakı nümayəndəliyi uğurla fəaliyyət göstərir. Biz Qaçqınların və Məcburi Köçkünlərin İşləri üzrə Dövlət Komitəsi ilə əlaqələri daha da inkişaf etdirmək istəyirik”, - deyə xanım L.Tompson əlavə edib.
Azərbaycana səfəri çərçivəsində ölkəmizdə müşahidə etdiyi inkişafı yüksək qiymətləndirən L.Tompson xüsusən də “ASAN xidmət” mərkəzlərinin fəaliyyətinin əhəmiyyətini qeyd edib. O vurğulayıb ki, Azərbaycanın bu təcrübəsi bütün ölkələrdə tətbiq oluna bilər.
Görüşdən sonra BMqT-nin nümayəndə heyəti Abşeron rayonunun Masazır qəsəbəsində məcburi köçkünlər üçün salınmış yaşayış kompleksinə baş çəkib. Qonaqlar burada 33 saylı Zəngilan rayon tam orta məktəbində, Zəngilan Rayon Tarix Diyarşünaslıq Muzeyində yaradılan şəraitlə tanış olublar.

Paylaş:

Baxılıb: 551 dəfə