"Yeni Azərbaycan" qəzetinin redaksiyasında Azərbaycan televiziya və radio məkanında mövcud durumla bağlı Dəyirmi masa keçirilib

Bakı:

13 °C

94 %

6 m/s

AZ RU EN

Ana səhifə / Siyasət / "Yeni Azərbaycan" qəzetinin redaksiyasında Azərbaycan televiziya və radio məkanında mövcud durumla bağlı Dəyirmi masa keçirilib

"Yeni Azərbaycan" qəzetinin redaksiyasında Azərbaycan televiziya və radio məkanında mövcud durumla bağlı Dəyirmi masa keçirilib

14.10.2009 [09:45]

Dünən “Yeni Azərbaycan” qəzetinin redaksiyasında Azərbaycan televiziya və radio məkanında mövcud durumla bağlı Dəyirmi masa keçirilib. Tədbirdə “Yeni Azərbaycan” qəzetinin baş redaktoru Hikmət Babaoğlu, Yeni Azərbaycan Partiyasının (YAP) rayon təşkilatlarının sədrləri və KİV nümayəndələri iştirak ediblər.
İlk olaraq, baş redaktor Azərbaycan Respublikasının Prezidenti Administrasiyasının rəhbəri, akademik Ramiz Mehdiyevin “Azərbaycan” qəzetinin 02.10.2009 tarixli sayında dərc olunmuş “Azərbaycanın efir məkanı: problemlər və vəzifələr” sərlövhəli məqaləsinə diqqət çəkərək söyləyib ki, bu gün həqiqətən də, Azərbaycanın televiziya və radio məkanında problemlər mövcuddur və onların həlli vacibdir.
YAP Əzizbəyov rayon təşkilatının sədri Namiq Əhmədov Azərbaycan xalqının milli-mənəvi dəyərlərinin qorunmasını və gənc nəslin milli ruhda tərbiyə olunmasının vacibliyini vurğulayaraq deyib ki, televiziyaların da fəaliyyəti bu məqsədə xidmət etməlidir. N.Əhmədov təəssüf hissi ilə qeyd edib ki, bu gün Azərbaycanın müstəqil televiziya kanalları maddi maraqlarını rəhbər tutaraq ümumi maraqlardan çıxış etməyi yaddan çıxarıb və bu da hazırda böyük bir problem kimi qarşımıza çıxır: “Bu problem vaxtında ortaya qoyulub və müsbət nəticələrin əldə edilməsinə qədər ciddi addımlar atılmalıdır”.
“Cəmiyyətdə uzun müddətdir ki, müzakirə olunan bu məsələ artıq geniş ictimai auditoriyanın qınaq obyektinə çevrilib” - deyən YAP Sumqayıt şəhər təşkilatının sədri Asif İmaməliyev isə söyləyib ki, televiziya gənclərin şəxsiyyət kimi formalaşmasına böyük təsir göstərən vasitələrdən biridir. YAP Binəqədi rayon təşkilatının sədri Nəbi Xəlilov isə diqqətə çatdırıb ki, akademik Ramiz Mehdiyevin ortaya qoyduğu problem kifayət qədər ciddidir və bütün cəmiyyət üzvləri televiziya məkanında mövcud olan problemlərin həllində fəal iştirak etməlidir. Televiziya məkanında bayağı şouların, peşəkarlıqdan uzaq aparıcıların, etik davranışlarına cavabdeh olmayan insanların yer almasının xoşagəlməz hadisə olduğunu söyləyən YAP Sabunçu rayon təşkilatının sədri Mehriban Abasquliyeva isə bildirib ki, bu problemlər bu gün aradan qaldırılmasa, gələcəkdə böyük fəsadlara səbəb olacaq. YAP Nizami rayon təşkilatının sədri Sədaqət Vəliyeva isə televiziyanın ictimaiyyətin güzgüsü olduğunu və bu efir məkanının xalqımızın mentalitetinə, milli-mənəvi dəyərlərimizin qorunmasına xidmət etməli olduğunu söyləyib.
Qeyd: Növbəti saylarımızda Dəyirmi masanı geniş şəkildə işıqlandıracağıq.

Paylaş:

Baxılıb: 1195 dəfə