Nikol Paşinyanın Rusiyaya səfəri uğursuz və nəticəsiz olub

Bakı:

19 °C

72 %

7 m/s

Əlaqə

AZ RU EN

Ana səhifə / Siyasət / Nikol Paşinyanın Rusiyaya səfəri uğursuz və nəticəsiz olub

Nikol Paşinyanın Rusiyaya səfəri uğursuz və nəticəsiz olub

05.01.2019 [10:09]

Ekspertlər bu faktın işğalçı ölkənin baş nazirinin ciddi fiqur kimi qəbul edilmədiyini göstərdiyini, ümumilikdə regionda və dünyada Ermənistana neqativ münasibətin təzahürü olduğunu bildirirlər
İşğalçı siyasətini davam etdirən Ermənistanın regionda təcrid vəziyyəti dərinləşir, təcavüzkar ölkə bütün diplomatik cəbhələrdə uduzmaqda davam edir. Digər tərəfdən, Ermənistanın yürütdüyü destruktiv siyasət nəticəsində bu işğalçı ölkənin qonşu dövlətlərlə və beynəlxalq ictimaiyyətlə münasibətlərində ciddi gərginlik hökm sürür. Bunun nəticəsidir ki, Ermənistanın qonşu və region dövlətləri, o cümlədən aparıcı dövlətlər və güc mərkəzləri ilə münasibətləri iflasa uğrayıb. Son vaxtlar erməni ekspertləri, həmçinin işğalçı ölkənin mediası da Ermənistanın beynəlxalq arenada atdığı addımların heç bir perspektiv vəd etmədiyini, bu ölkə rəhbərliyinin gözləntilərinin iflasla nəticələndiyini xüsusi olaraq vurğulayır, bədbin proqnozlar verirlər. Diqqətə çatdırılır ki, ciddi siyasi kataklizmlərlə qarşı-qarşıya olan Ermənistanın xarici siyasəti də tamamilə iflasa uğrayıb, bu ölkənin manevr imkanları qalmayıb. Yeri gəlmişkən, Ermənistanın baş naziri Nikol Paşinyanın Rusiyaya səfərinin uğursuz, nəticəsiz və utancverici olması da bu baxımdan ayrıca qeyd edilməlidir. Ümumiyyətlə, bu kontekstdə bir sıra məqamlara xüsusi diqqət yetirmək lazımdır. Əvvəla, vurğulamaq gərəkdir ki, N.Paşinyan Moskvada olduğu vaxtda Vladimir Putinin Robert Koçaryana təbrik göndərməsi Rusiyanın və bu ölkənin dövlət başçısının Ermənistana, Ermənistan hakimiyyətinə və şəxsən Paşinyana münasibətinin göstəricisidir. Səfərin nəticələrindən pərt olan Paşinyan isə mətbuat konfransında da özünü itirdi, Ermənistanda keçirilmiş seçkiləri gah vaxtından əvvəl, gah da vaxtında keçirilmiş seçki adlandırdı. Ekspertlər qeyd edirlər ki, bütün bunlar Ermənistanın baş nazirinin ciddi fiqur kimi qəbul edilməməsini göstərməklə yanaşı, həm də ümumilikdə regionda və dünyada Ermənistana olan neqativ münasibətin təzahürüdür.
Milli Məclisin deputatı Elman Məmmədov qeyd edib ki, regionda təcrid vəziyyətində olan Ermənistan ardıcıl olaraq ciddi uğursuzluqlarla üzləşir. Onun sözlərinə görə, Paşinyanın Rusiya səfərinin nəticəsiz olması isə işğalçı ölkənin xarici siyasətinin uğursuzluğu və perspektivsizliyinin, eyni zamanda, Ermənistana olan münasibətin bariz ifadəsidir: “Paşinyanın Moskvada olduğu vaxtda Rusiya Prezidenti Vladimir Putinin Robert Koçaryana təbrik göndərməsi də həm Ermənistana, həm də bu ölkənin baş nazirinə münasibətin göstəricisidir. Ümumiyyətlə, Ermənistanın baş naziri Nikol Paşinyanın ciddi siyasi fiqur kimi qəbul edilmədiyi bəllidir. Eyni zamanda, işğalçı ölkə bütün sahələrdə olduğu kimi, xarici siyasətdə də ciddi uğursuzluqlarla üzləşib. Ermənistan regionda təcrid vəziyyətində olmaqla yanaşı, bu ölkənin qonşu dövlətlərlə, eyni zamanda, beynəlxalq ictimaiyyətlə münasibətlərində ciddi gərginliyin hökm sürdüyü reallıqdır. Belə olan halda, Ermənistanın qarşısında heç bir perspektivin olmadığını əminliklə söyləmək olar”.
Milli Məclisin deputatı Tahir Rzayev isə deyib ki, bütün sahələrdə uğursuzluqlarla üzləşən, işğalçı siyasətini davam etdirən Ermənistanın manevr imkanları tükənib: “Ermənistanda faktiki olaraq bütün sahələrdə dərin tənəzzül hökm sürür, işğalçı ölkənin xarici siyasəti iflasa uğrayıb. Nikol Paşinyanın Rusiya səfərinin uğursuz və nəticəsiz olması da bunun bariz nümunəsidir. Ümumiyyətlə, bu səfərin nəticələri həm də regionda və dünyada Ermənistana olan neqativ münasibəti əks etdirən faktlardan biri oldu”.
“Ermənistan regionda təcrid vəziyyətindədir və bütün sahələrdə hökm sürən tənəzzül bu ölkəni uçuruma sürükləyir. Belə olan halda, Ermənistanın indiki rəhbərliyi regional və beynəlxalq reallığı düzgün dərk edib nəticə çıxarmalıdır. Bu ölkənin siyasi, iqtisadi, sosial, demoqrafik böhrandan çıxmasının yeganə yolu işğal siyasətinə son qoyması, Azərbaycanın işğal olunmuş ərazilərindən öz qoşunlarını çıxarmasıdır”, - deyə millət vəkili əlavə edib.
Nurlan QƏLƏNDƏRLİ

Paylaş:

Baxılıb: 607 dəfə