İranın "Səhər" telekanalı Azərbaycanda ictimai-siyasi vəziyyəti gərginləşdirməyə xidmət edir

Bakı:

26 °C

68 %

3 m/s

Əlaqə

AZ RU EN

Ana səhifə / Siyasət / İranın "Səhər" telekanalı Azərbaycanda ictimai-siyasi vəziyyəti gərginləşdirməyə xidmət edir

İranın "Səhər" telekanalı Azərbaycanda ictimai-siyasi vəziyyəti gərginləşdirməyə xidmət edir

02.03.2010 [08:04]

Əli Həsənov: Belə cəhdlərə qarşı da biz dövlət olaraq öz səsimizi qaldırır, İranın lazımı instansiyalarına bununla bağlı iradlarımızı bildiririk
“İranla Azərbaycan qonşu, mədəniyyəti, dili, dini, yaşam tərzi bir-birinə yaxın olan dövlətlərdir. Bizim müştərək dövlətçiliyimiz olub. İranla normal münasibətlər qurmaq Azərbaycan dövlətinin xarici siyasətinin prioritet istiqamətlərindən biridir”. APA-nın xəbərinə görə, bunu Prezident Administrasiyası ictimai-siyasi şöbəsinin müdiri Əli Həsənov jurnalistlərin Təbrizdəki konsulluğun binası qarşısında Azərbaycan bayrağının yandırılması barədə sualı cavablandırarkən deyib.
Ə.Həsənov İran tərəfində də, bəzən Azərbaycanla münasibətlərin normal olmamasını istəyənlərin olduğunu bildirib: “Onlar bu münasibətləri korlamaq istiqamətində fəaliyyət göstərirlər. Biz Azərbaycan dövləti olaraq belə cəhdlərə qarşıyıq. Bu cəhdlərin qarşısını almaq üçün fəaliyyət göstəririk”.
Şöbə müdiri bütün bunları dövlətlə bağlamağın düzgün olmadığını vurğulayıb: “Bununla belə, təəssüflər olsun ki, bəzən İran tərəfindən belə cəhdlərə qarşı yetərincə tədbirlər görülmür. Xüsusilə qeyd etmək lazımdır ki, İranın “Səhər” telekanalı Azərbaycanda ictimai-siyasi vəziyyəti gərginləşdirməyə, qonşu dövlətin həyatındakı prosesləri inkar etməyə, onun mahiyyətini dəyişməyə və saxtalaşdırmağa xidmət edir. Belə cəhdlərə qarşı da biz dövlət olaraq öz səsimizi qaldırır, İranın lazımı instansiyalarına bununla bağlı iradlarımızı bildiririk”.
Prezident Administrasiyanın ictimai-siyasi şöbəsinin müdiri Əli Həsənov, həmçinin, müdafiə naziri Səfər Əbiyevin bəyanatı ilə bağlı deyib ki, müdafiə naziri özü verdiyi bəyanatın məsuliyyətini bilir: “Ona görə də bu bəyanata siyasi şərh verməyə ehtiyac yoxdur”.
Əli Həsənov qeyd edib ki, Azərbaycan Prezidenti dəfələrlə bəyan edib ki, Azərbaycan Dağlıq Qarabağ probleminin həlli ətrafında aparılan danışıqların potensialının bitmədiyini düşünür və ona görə də bu danışıqlarda iştirak edir: “Amma Azərbaycan nə zaman hiss etsə ki, danışıqlar potensialı tükənib, danışıqlar yalnız danışıq xətrinə aparılır, o zaman özünün ixtiyarında olan bütün vasitələrlə ərazi bütövlüyünü, suveren və pozulmuş hüquqlarını bərpa etmək istiqamətində addımlar atacaq”.
Prezident Administrasiyasının rəsmisi Dağlıq Qarabağ münaqişəsi ilə bağlı danışıqların hazırda Praqa prosesi çərçivəsində və Madrid prinsipləri ətrafında aparıldığını deyib: “ATƏT həmsədrlərinin təklifləri hər iki respublikaya təqdim olunub və bu təkliflər ətrafında fikir mübadiləsi aparılır. Lakin danışıq aparan tərəflər bundan artıq məlumat verməyiblər. Bundan sonrakı proseslər necə olacaq, hansı mərhələdə bu təkliflərin razılaşdırılması gözlənilir, bu barədə bundan artıq heç nə bilmirəm”.

Paylaş:

Baxılıb: 1279 dəfə