Cəmil Həsənli xalqı aldatmağa çalışır

Bakı:

19 °C

72 %

8 m/s

Əlaqə

AZ RU EN

Ana səhifə / Siyasət / Cəmil Həsənli xalqı aldatmağa çalışır

Cəmil Həsənli xalqı aldatmağa çalışır

13.08.2021 [09:03]

Azərbaycanın əldə etdiyi nailiyyətlərin əsasında milli maraqlara əsaslanan uğurlu dövlət siyasətinin dayandığı heç kimə sirr deyil. Ən əsası, şaxələndirilmiş iqtisadi siyasət, vətəndaşların sosial rifahının yüksəldilməsi və sabitlik amili müstəqil Azərbaycanın regionun aparıcı aktoruna çevrilməsində, 44 günlük Vətən müharibəsində qazanılan qələbədə mühüm rol oynayıb. Bütövlükdə, Azərbaycanın davamlı və dayanıqlı inkişafı ölkəmizin qarşısında yeni perspektivlər açır.
Təbii ki, bu reallıqlar dostlarımızı sevindirdiyi kimi düşmənlərimizin və onların əlaltılarının narahatlıqlarına səbəb olur. Bunun nəticəsidir ki, istər ölkə daxilində “beşinci kolon” funksiyasını həyata keçirən radikal müxalifət düşərgəsi, istərsə də onların xaricdəki uzantıları mütəmadi şəkildə sosial şəbəkələrdə yalanlar yaymağa, şər-böhtan kampaniyaları aparmağa cəhdlər göstərirlər. Məsələn, qondarma antimilli şuranın marionet sədri, uzun müddətdir ki, xaricdə “lövbər” salaraq ermənipərəst mərkəzlərin sifarişlərini yerinə yetirən Cəmil Həsənli yenidən gündəmə gəlmək üçün manipulyasiyalara əl atır, Azərbaycanın artan gücündən, iqtisadi inkişafından narahat olduğunu açıq şəkildə büruzə verir. Görünən odur ki, ölkə iqtisadiyyatında qeyri-neft sektorunun payının ildən-ilə artması, Azərbaycanın çoxşaxəli iqtisadi inkişaf strategiyasının müsbət nəticələr verməsi C.Həsənli və onun kimilərinin yuxusunu ərşə çəkib. Bunun nəticəsidir ki, ucuz və cılız “iqtisadi mülahizə”ləri ilə özünün varlığını sübuta yetirmək istəyən antimilli şuranın sədri utanmadan əsl reallıqları gizlətməyə çalışır, ermənipərəst mərkəzlərdən aldığı sifarişlər əsasında absurd iddialar səsləndirir. O, sosial şəbəkələrdə Azərbaycanın davamlı və dayanıqlı inkişafı ilə bağlı reallıqları təhrif etməyə, ictimai rəyi manipulyasiyaya məruz qoymağa çalışır.
Vurğulamaq yerinə düşər ki, respublikamızda qeyri-neft sənayesinin davamlı inkişafının təmin olunmasına güclü siyasi iradə və maddi dəstək göstərilir, neftdənkənar sənaye müəssisələrinin yaradılmasına sərmayə qoyuluşu təşviq edilir, bu məqsədlə hüquqi baza möhkəmləndirilir. Son illərdə reallaşdırılan islahatların böyük bir qismi məhz respublikamızda qeyri-neft sektoru üzrə sənaye quruculuğunun genişləndirilməsinə hesablanıb. Vurğulanmalıdır ki, ölkəmizdə iri və kiçik sənaye müəssisələrinin istifadəyə verilməsi ilə bağlı statistika kifayət qədər zəngindir. Bunun sayəsində respublika üzrə qeyri-neft sənaye istehsalı və ixracı əhəmiyyətli dərəcədə artıb. Artıq neçə ildir ki, milli iqtisadiyyatımızda ən yaxşı inkişaf göstəriciləri məhz qeyri-neft sənayesində qeydə alınır. Bu baxımdan, 2021-ci ilin ilk yarısının göstəriciləri də istisna deyil. Belə ki, qeyri-neft sənayemiz 16,6 faiz artıb. Nəzərə alsaq ki, ölkənin sənaye xəritəsi ildən-ilə regionlara doğru genişlənir və artıq işğaldan azad edimiş regionlarımızda da sənaye parkları istifadəyə veriləcək, qeyd edə bilərik ki, bu rəqəm daha da yüksələcək.
Bəli, bütün bu reallıqlar antimilli şuraçı Cəmil Həsənlinin qərəzli olduğunu və dezinformasiyalar yaymaqla manipulyasiyaya cəhd etdiyini göstərir. Əlbəttə, radikal müxalifət nümayəndələrinin bu cür antimilli təbliğatları onların ermənipərəst mərkəzlərdən yeni sifarişlər aldıqlarını bir daha təsdiqləyir. Amma hər zaman olduğu kimi, dağıdıcı düşərgə təmsilçilərinin ictimai rəyi yanıltmaq və xalqı aldatmaq cəhdləri fiaskoya məhkumdur.
Pərviz SADAYOĞLU

Paylaş:

Baxılıb: 1277 dəfə