Markus Ritterə xatırlatma, tövsiyyə və tələb

Bakı:

23 °C

46 %

7 m/s

Əlaqə

AZ RU EN

Ana səhifə / Siyasət / Markus Ritterə xatırlatma, tövsiyyə və tələb

Markus Ritterə xatırlatma, tövsiyyə və tələb

31.03.2023 [10:03]

Avropa İttifaqının missiyası normallaşma prosesinə xələl gətirməməlidir

N.BAYRAMLI

Avropa İttifaqının Ermənistanda iki illik müddətə yerləşdirilmiş monitorinq missiyası obyektiv fəaliyyət göstərməli, bölgədə sülhün təmin olunmasına çalışmalıdır. Bu missiya haqqında Avropa İttifaqında qərar qəbul olunarkən rəsmi Bakı öz etirazını bildirmiş və bunun dövlətimizlə razılaşdırılmalı olduğunu bəyan etmişdi. Necə ki, ilk iki aylıq missiya Praqa görüşündə bütün tərəflərlə razılaşdırılmışdı. Bununla belə, növbəti dəfə birtərəfli qərar verildi. Azərbaycan bu missiyanı bölgədəki sülh prosesinə xələl gətirməməyə çağırmışdı. Amma görünən odur ki, sözügedən missiya da fəaliyyətində qeyri-müəyyənliyə yol verir. Avropa İttifaqının (Aİ) Ermənistandakı missiyasının rəhbəri Markus Ritterin Almaniyanın “Deutsche Welle” qəzetinə müsahibəsindəki məqamlar bunu deməyə əsas verir. Belə ki, o, müsahibədə “Azərbaycanın yaz aylarında hücuma hazırlaşdığının Ermənistan tərəfindən iddia edildiyi”, “belə bir hücum olmayacağı təqdirdə, bunun Aİ missiyasının uğuru olacağını” deyib.

Missiya mülki deyil, daha çox hərbi kontingentə bənzəyir

Əslində, Avropa İttifaqının Ermənistandakı missiyası mülki deyil, daha çox hərbi kontingentə bənzəyir. Missiyanın rəhbəri olan Markus Ritter 2020-ci ildən Ştutqart Şəhər Polis İdarəsinin rəisi vəzifəsində çalışıb. Xidmət etdiyi qurumlar isə onun polis deyil, daha çox hərbçi olduğunu göstərir. Belə ki, əvvəllər M.Ritter Aİ-nin İraqdakı konsultasiya missiyasına rəhbərlik edib, Cənubi Sudan, Gürcüstan və Kosovoda Aİ və BMT missiyalarında xidmət edib, həmçinin Almaniyanın Əfqanıstandakı səfirliyində polis müşaviri olub.

Ritter “Deutsche Welle” qəzetinə verdiyi müsahibədə isə bir növ erməni tərəfinin təbliğatçısı kimi çıxış edib. Azərbaycan Xarici İşlər Nazirliyinin mətbuat katibi Ayxan Hacızadə onun müsahibədəki fikirlərini şərh edib. “Aİ missiyası rəhbərinin Ermənistan tərəfinin yalan və böhtan dolu iddialarını əsas tutaraq, guya Azərbaycanın hər hansı bir hücuma hazırlaşdığı barədə fikirlər səsləndirməsini, Aİ missiyasının əsas vəzifəsinin “Ermənistanı Azərbaycandan qorumaq” kimi təqdim etməsini qətiyyətlə qınayırıq”, -deyən A.Hacızadənin sözlərinə görə, bu missiyanın Azərbaycan və Ermənistan arasında normallaşma prosesinə xələl gətirmək məqsədilə sui-istifadə edilməsinə imkan verilməməsinin zəruriliyi tərəfimizdən dəfələrlə vurğulanıb. Aİ missiyasının Ermənistanda yerləşməsinin müvafiq qaydada Azərbaycanın legitim maraqlarını nəzərə alması, habelə Aİ tərəfindən bu missiyanın fəaliyyətinin qarşılıqlı inam və etimadı sarsıtmayacaq şəkildə həyata keçirilməsi təmin edilməlidir.

“Missiya o kəndlərdə dağıdılmış azərbaycanlı məzarlıqlarını və mədəni irsini hər gün görür”

Qərbi Azərbaycan İcması (QAİ) da Markus Ritterin qərəzli və həqiqətə uyğun olmayan fikirlərinə cavab verib. Bildirilib ki, M.Ritter bu fikirləri ilə tarixçəsi Azərbaycana qarşı hərbi təcavüz, işğal, etnik təmizləmə, insanlıq əleyhinə cinayətlərlə dolu olan və hazırda da Azərbaycanın ərazi bütövlüyünə qarşı əməllərini davam etdirən Ermənistanı qurban kimi, Ermənistanın bütün bu cinayətlərinin qurbanı olmuş Azərbaycanı isə mənfi ruhda verməyə cəhd edib. Biz M.Ritterə xatırlatmaq istərdik ki, Avropa İttifaqının insan hüquqlarının müdafiəsi məqsədilə göndərdiyi missiyanın üzərinə Ermənistandan qovulmuş azərbaycanlılarla bağlı böyük və konkret vəzifə düşür. Onun missiyasının açıldığı sərhəd zonasında yerləşən yaşayış məskənlərinin demək olar ki, hamısı azərbaycanlıların yaşamış olduqları və etnik təmizləməyə məruz qaldıqları məkanlardır. Əminik ki, missiya o kəndlərdə dağıdılmış azərbaycanlı məzarlıqlarını və mədəni irsini hər gün görür. Belə olan təqdirdə, missiya rəhbərinin öz mandatına uyğun olaraq gözünün qarşısında olan insan hüquqları pozuntuları ilə məşğul olmaq əvəzinə iftira və təxribat xarakterli bəyanat verməsi təəssüf doğurur.

Töhfə verməlidir

“Biz missiyanı öz işi ilə məşğul olmağa və Avropa İttifaqı Şurasının Prezidenti Şarl Mişelə göndərdiyimiz məktubda istədiyimiz kimi, aşağıdakıları həyata keçirməyə çağırırıq:

- Ermənistana qayıdacaq qovulmuş azərbaycanlıların təhlükəsiz qayıdışına töhfə vermək;

- Münaqişənin Ermənistandan zorla qovulmuş azərbaycanlılara təsirinə dair məlumat toplamaq, o cümlədən azərbaycanlıların mülkiyyətinin və mədəni irsinin vəziyyəti barədə hesabatlar hazırlamaq;

- Ermənistandan qovulmuş azərbaycanlılar üçün etimad quruculuğu tədbirləri hazırlamaq və həyata keçirmək, o cümlədən onların öz evlərini, qəbiristanlıqlarını, müqəddəs yerlərini və mədəni abidələrini ziyarət edə bilmələrinə şərait yaratmaq;

- İcma ilə birlikdə beynəlxalq humanitar hüquq, insan hüquqları, mülkilərin qorunması, BMT Təhlükəsizlik Şurasının qətnamələrinin, o cümlədən Qadınlar, sülh və təhlükəsizlik mövzusunda 1325 (2000) nömrəli qətnaməsinin, Gənclər, sülh və təhlükəsizlik mövzusunda 2250 (2015) nömrəli və Uşaqlar və Silahlı Münaqişələr mövzusunda 1612 (2005) nömrəli qətnaməsinin müddəalarına dair müvafiq proqramlar hazırlamaq və icra etmək.

Avropa İttifaqı, o cümlədən onun Ermənistandakı missiyası insan hüquqları sahəsində tərəfsiz və müfəssəl səyləri ilə Ermənistandan qovulmuş azərbaycanlıların hüquqlarına hörməti təşviq etməli və bununla davamlı sülhün əldə olunmasına yardım etməlidir”,- deyə Qərbi Azərbaycan İcmasının cavabında vurğulanıb.

Paylaş:

Baxılıb: 558 dəfə