Dağlıq Qarabağ münaqişəsinin həllində ciddi irəliləyişin zamanı çatıb

Bakı:

14 °C

88 %

6 m/s

Əlaqə

AZ RU EN

Ana səhifə / Siyasət / Dağlıq Qarabağ münaqişəsinin həllində ciddi irəliləyişin zamanı çatıb

Dağlıq Qarabağ münaqişəsinin həllində ciddi irəliləyişin zamanı çatıb

15.06.2011 [09:29]

Kazan görüşündə real nəticənin əldə olunması üçün işğalçı Ermənistana təzyiq göstərilməlidir
Azərbaycan və Ermənistan prezidentlərinin iyunun 25-də Kazan şəhərində keçiriləcək görüşünə çox az müddətin qaldığı bir vaxtda görüş öncəsi hazırlıqlar ən yüksək səviyyəyə çatdırılıb. Məlum olduğu kimi, iyunun 11-də Moskvada baş tutan Azərbaycan, Ermənistan və Rusiya xarici işlər nazirlərinin görüşündə Kazan danışıqlarının gündəliyində olacaq yekun təkliflər müzakirə edilib. Tədbirdən sonra açıqlama verən Azərbaycanın xarici işlər naziri Elmar Məmmədyarov görüşdə irəliləyişlərin əldə olunduğunu və aparılan intensiv danışıqların sülh sazişi üzərində işləri davam etdirməyə imkan yaratdığını bildirib. Nazirin sözlərinə görə, görüşün nəticələri barədə dövlət başçılarına məruzə ediləcək, bundan sonra prezidentlər danışıqları Kazanda davam etdirəcək.
Siyasi ekspertlərin fikrincə, Moskva görüşünün müsbət şəraitdə keçməsi irəliləyişlərin əldə olunması istiqamətində atılan addımların müəyyən səmərə verəcəyinə ümid yaradır. öz növbəsində, Azərbaycan tərəfi Kazan görüşündən sülhün əldə edilməsinə doğru irəliləyişlər gözləyir. Prezident Administrasiyasının İctimai-siyasi məsələlər şöbəsinin müdiri Əli Həsənov rəsmi Bakının Azərbaycan, Ermənistan və Rusiya prezidentlərinin Kazan görüşündən çox şey gözlədiyini bildirib: “Düşünürük ki, Ermənistan-Azərbaycan, Dağlıq Qarabağ münaqişəsinin həllində ciddi irəliləyişin zamanı çatıb. Bu yaxınlarda Dağlıq Qarabağ münaqişəsi ilə bilavasitə məşğul olan ATƏT-in Minsk qrupunun həmsədr ölkələrinin prezidentləri birgə bəyanat verib. Münaqişənin tezliklə həlli iradəsi ortada var”.
Onun sözlərinə görə, münaqişənin həll edilməsi, danışıqların intensivləşdirilməsi və irəliləyişə nail olunması çağırışları özlüyündə müsbət məqamdır. Şöbə müdiri onu da əlavə edib ki, bu günə qədər əvvəllər razılaşdırılmış və ya razılaşdırılmasına ümid bəslənilən məsələlər konkret görüşlər zamanı Ermənistan tərəfindən pozulub, onların bu və ya digər yanaşması ilə danışıqlar prosesi ləngidilib. Bir sözlə, görünən odur ki, irəliləyişin əldə olunması Ermənistanın hansı mövqe sərgiləyəcəyindən asılıdır.
Bu nöqteyi-nəzərdən, əminliklə demək olar ki, danışıqlara həm görüş öncəsi baş verən proseslər, həm də görüş zamanı tərəflərin sərgiləyəcəyi mövqe əhəmiyyətli dərəcədə təsir göstərəcək. Xatırladaq ki, bundan bir neçə gün əvvəl regiona səfər edən həmsədrlər Azərbaycan və Ermənistanda keçirdikləri görüşlərdən sonra yaydıqları bəyanatda tərəfləri danışıqlar prosesinə zərər vuracaq hər hansı təxribat xarakterli addım və hərəkətlərə yol verməməyə çağırıblar.
Əslində, bu çağırış heç də təsadüfi deyil. çünki həqiqətən də, münaqişənin həlli istiqamətində aparılan danışıqlarda həlledici mərhələni təşkil edən Kazan görüşü ərəfəsində təxribat xarakterli bəyanatların səsləndirilməsi, atəşkəsin pozulması və digər bu kimi hallar danışıqların gedişatına mənfi təsir göstərə bilər. Buna görə də, indiki məqamda danışıqlar prosesində müsbətə doğru addımların atılmasının təmin olunması, görüşün səmərəliliyinin artırılması üçün münbit siyasi-psixoloji şəraitin yaradılması olduqca vacibdir. Lakin bildiyimiz kimi, Ermənistan ordusunun əsgərləri tərəfindən cəbhə xəttində tez-tez atəşkəsin pozulması halları baş verir və bu hal həmsədrlərin regionda səfərdə olduğu günlər də təkrarlanıb.
Buna baxmayaraq, son günlərdə Ermənistan rəsmiləri səsləndirdikləri bəyanatlarla konstruktiv mövqe nümayiş etdirməyə çalışır. Belə ki, ABŞ, Rusiya və Fransa pezidentlərinin mayın 26-da imzaladığı Dovil bəyanatının, Azərbaycan, Ermənistan və Rusiya xarici işlər nazirlərinin Moskva görüşünün əhəmiyyətindən danışaraq, rəsmi Bakını münaqişənin həllini “uzatmamağa” çağıran işğalçı ölkə rəsmiləri bununla beynəlxalq ictimaiyyətdə sülhə hazır olduqları barədə rəy formalaşdırmağa cəhd göstərirlər. Həmçinin, Ermənistanın əvvəlki görüşlərdə olduğu kimi, Kazan görüşündə də antisülh mövqeyi sərgiləməyəcəyinə zəmanət verilə bilməz. Buna görə də, görüşdə real nəticənin əldə olunması üçün həmsədr ölkələr, xüsusən də Rusiyanın işğalçı ölkəyə təzyiq göstərməsi labüddür.
Bir məsələni də vurğulayaq ki, Ermənistan-Azərbaycan, Dağlıq Qarabağ münaqişəsinin ədalətli həlli istiqamətində irəliləyişin əldə olunması həmsədr ölkələrin, eləcə də, ATƏT-in Minsk qrupunun nüfuzuna da müsbət təsir göstərə bilər. çünki bildiyimiz kimi, 17 ildir aparılan danışıqların bu vaxtadək nəticəsiz qalması beynəlxalq miqyasda Minsk qrupunun fəaliyyətinin səmərəliliyi ilə bağlı şübhələr meydana çıxarır. Beynəlxalq böhran qrupunun Avropa proqramının direktoru Sabina Freyzerin bu günlərdə mətbuata açıqlamasında səsləndirdiyi fikirlər də bu narahatlığın ifadəsidir. Onun sözlərinə görə, Kazan görüşü uğursuzluqla nəticələnərsə, Minsk qrupunun formatına yenidən baxıla bilər. Ermənistan kimi bir dövlətin işğalçı siyasəti üzündən qlobal güclərin yer aldığı bir qurumun formatının dəyişdirilməsi məsələsinin ortaya çıxması isə həmsədr ölkələrin nüfuzuna zərbədir. Buna görə də, işğalçı Ermənistan ən qısa zamanda sülhə dəvət olunmalı, Azərbaycan ərazilərinin işğalından əl çəkməlidir.
Hülya MƏMMƏDLİ

Paylaş:

Baxılıb: 946 dəfə