İrəvana ultimatum - “müstəqilliyinə” son qoyular!

Bakı:

16 °C

72 %

2 m/s

Əlaqə

AZ RU EN

Ana səhifə / Siyasət / İrəvana ultimatum - “müstəqilliyinə” son qoyular!

İrəvana ultimatum - “müstəqilliyinə” son qoyular!

19.04.2023 [10:21]

Rusiyalı deputat Ermənistanın hələ də SSRİ-nin tərkibində olduğunu xatırladır

Ermənistan ilə Rusiya arasında son dövrlərdə daha qabarıq şəkildə üzə çıxan ziddiyyətlər get-gedə dərinləşməkdədir. Baş nazir Nikol Paşinyanın açıq şəkildə Qərbə “üz çevirməsi”, Aİ-nin uzunmüddətli missiyasının Ermənistana “yerləşdirilməsi”, eyni zamanda bu missiyanın tərkibində hətta “mülki geyimli jandarmların” da olması, ən əsası isə Ermənistan hakimiyyətinin Qərbə yönəlik “isti bəyanatlar” səsləndirməsi keçmiş müttəfiqləri qarşı-qarşıya gətirib. Proseslərin inkişafı açıq şəkildə onu göstərir ki, Rusiya Ermənistanın davranışlarını həzm edə bilmir. Avropaya “sığındığı” görüntüsünü yaratmağa çalışan Nikol Paşinyan isə sanki Moskvadan əvəz çıxmaq istəyir. Bu mənada Ermənistanın Avropa ilə yaxınlaşmasının hər bir ştrixində Kremlin hədəfə alınması görüntüsü yaradılır. Qeyd edək ki, son dövrlərdə səslənən siyasi bəyanatların ardından Rusiya ilə Ermənistan arasındakı siyasi-iqtisadi, hərbi əlaqələr belə təhlükəli fazaya qədəm qoyub. Artıq erməni deputatlar tərəfindən iqtisadi-siyasi sferada Rusiya asılılığından azad olunmanın yolları “araşdırılır”. Hətta Qərbin müşahidə etməsi üçün bəzi “görüləcək tədbirlər” haqqında bəyanatlar belə verilir. Bunların sırasında Ernmənistanın enerji təminatı, nəqliyyat sektoru, yüngül və qida sənayesinin Rusiya nəzarətində olan şirkətlərdən təmizlənməsi daha çox yer alır.

Ermənistan ikili oyun oynamağa çalışır

Təbii ki, Ermənistanda bu kimi fikirlərin aktuallaşması əbəs yerə deyil. Son proseslərdə Qərbin və Avropanın Ermənistanın maraqlarına uyğun davranmaması rəsmi İrəvanı açıq qorxuya salıb. Bəzi siyasi analitiklərin fikrincə, Qərb hazırda Ermənistanın oynamağa çalışdığı ikili oyunu görür və düzgün qiymətləndirir - öz mövqeyini ortaya qoyur. Qərb rəsmi İrəvanın İranla əlaqələrin dərinləşdirilməsi istiqamətində atdığı addımları, Ermənistanın nəinki Rusiyaya qarşı sanksiyalara qoşulmaması, hətta Rusiyaya sanksiyalardan yayınmağa şərait yaratması, “Qərb yolu” adı altında Ermənistanın yalnız Fransanın kolonist siyasətini dəstəkləməsi kimi faktları dəyərləndirir. Bu baxımdan, İrəvanın siyasi dairələri anti-Rusiya ritorikasını artırmağa “məcbur” olub. Yəni, bu da Ermənistanın siyasi manipulyasiyalarından biridir - İrəvan Qərbə yönəlik istiləşmədə də səmimi deyil...

Kremldən açıq təhdid - Rusiyaya birləşmə ehtimalı aktualdır

Maraqlıdır ki, Ermənistanın oynadığı oyun özü üçün mühüm təhdidlər formalaşdırır. Özünü Rusiyaya və Ermənistan ictimaiyyətinə “Qərbə yaxın” kimi göstərməklə mühüm məqsədlər güdən və Kremldən “qorunmağa” çalışan Ermənistan siyasi hakimiyyəti bu dəfə daha ağır təhdidlə üz - üzə qalır. Rusiya illərdir ki, onun himayəsində yaşayan Ermənistanın birdən-birə üz çevirərək fərqli istiqamətə meyllənməsini qəbul etmir. Və dolayısı ilə ona “xəbərdarlıq” edir. bu dəfəki xəbərdarlıq isə daha sərt xarakter daşıyır. Kreml artıq Ermənistanın müstəqilliyinə son qoya bilmə ehtimallarını irəli sürür. Belə ki, Dövlət Dumasının deputatı Yevgeni Fyodorov Ermənistanın Kremlə xəyanət edəcəyinin, ABŞ və NATO ilə Rusiyaya qarşı savaşda alətə çevriləcəyinin hələ 1991-ci ildən məlum olduğunu vurğulayıb. Və rəsmi İrəvana açıq şəkildə xəbərdarlıq edib. Onun fikrincə, rəsmi İrəvan bundan sonra atacağı addımların nəticələri barədə daha dəqiq düşünməyə çalışmalıdır. Əks halda, Kreml Ermənistanın müstəqilliyinin ləğv edilməsi barədə qərar vermək hüququndan istifadə etmək məcburiyyətində qala bilər. Rus deputat xatırladıb ki, Ermənistan keçmiş SSRİ-nin tərkibindən çıxarkən ciddi hüquqi prosedur səhvlərinə yol verib.

Deputat Yevgeni Fyodorov hesab edir ki, Rusiya həmin mərhələdə baş verənləri təftiş etmək məcburiyyətində buraxılarsa, Ermənistan adlı dövlət xəritədən silinəcək: “Ermənistanın keçmiş SSRİ-dən ayrılması ilə bağlı hüquqi prosedur sona çatdırılmayıb. Ona görə də, əslində, Ermənistan hələ də keçmiş SSRİ-nin tərkib hissəsi statusunu itirməyib və deməli, müstəqil dövlət sayıla bilməz”.

Rusiyalı deputat keçmiş SSRİ-nin artıq dağılmış olsa da, Rusiyanın mövcud olduğunu xatırladıb: “Rusiya keçmiş SSRİ-nin hüquqi varisidir. Bu baxımdan, keçmiş SSRİ-nin tərkibindən hələ tam çıxmamış Ermənistan da əslində, Rusiyanın ərazisidir. Bu baxımdan, beynəlxalq hüquq normaları nəzərə alındıqda, Ermənistan müstəqil dövlət deyil, mübahisəli ərazidir. Rusiya beynəlxalq hüquq normaları çərçivəsində Ermənistan ərazisinə iddia etmək haqqını hələ də qoruyur”.

P.İSMAYILOV

Paylaş:

Baxılıb: 494 dəfə