Azərbaycanın əldə etdiyi uğurlar bizi də sevindirir

Bakı:

30 °C

50 %

7 m/s

Əlaqə

AZ RU EN

Ana səhifə / Siyasət / Azərbaycanın əldə etdiyi uğurlar bizi də sevindirir

Azərbaycanın əldə etdiyi uğurlar bizi də sevindirir

21.12.2011 [01:43]

Asror Vlatipov: Azərbaycanın bütün sahələrdə inkişafının davamlı olacağına inanıram və düşünürəm ki, bundan sonra da bütün istiqamətlərdə, o cümlədən, neft, qaz və qeyri-neft sektorunda böyük nailiyyətlər əldə ediləcək
Yeni Azərbaycan Partiyasının (YAP) təşəbbüsü ilə “Modernləşmə siyasəti: yeni iqtisadi və sosial çağırışlar” mövzusunda keçirilən beynəlxalq konfransda iştirak etmək məqsədilə ölkəmizə səfər edən Tacikistanın hakim Xalq Demokratik Partiyasının sədr müavini Asror Vlatipov və bu partiyanın Düşənbə şəhəri üzrə İcraiyyə Komitəsinin sədri Camşid Saidov dünən “Yeni Azərbaycan” qəzetinin qonağı olublar. Görüşdən sonra qəzetimizə müsahibə verən Asror Vlatipov bildirib ki, sözügedən tədbirdə qlobal problemlər ətrafında müzakirələr aparılacaq. O, hesab edir ki, belə görüşlərin keçirilməsi, Asiya və Avropadan gəlmiş müxtəlif mütəxəssislər ilə təcrübə və fikir mübadiləsinin aparılması olduqca əhəmiyyətlidir. Həmçinin, A.Vlatipov bildirib ki, səfərinin digər məqsədi hər iki hakim partiya arasında əməkdaşlıq sazişinin imzalanmasıdır: “Bu vaxta qədər bizim münasibətlərimiz yüksələn xətlə inkişaf edib. Hamıya məlumdur ki, bütün sahələrdə ölkələrimiz arasında ikitərəfli əlaqələr var. Prezidentimizin tapşırıqlarına əsasən biz sizin partiya ilə əməkdaşlığa dair saziş imzalayacağıq. Mən hesab edirəm ki, hər iki partiya arasında başlanan dialoq davamlı olacaq və əhəmiyyəti baxımından yüksək dəyərləndirilməlidir”.
Sonuncu dəfə 70-ci illərdə Bakıda olduğunu deyən Asror Vlatipov bildirib ki, paytaxtımız müsbət mənada tanınmaz dərəcədə dəyişib: “Gəlmədən öncə Azərbaycan və Bakı barədə demək olar ki, bütün məqalə və informasiyaları gözdən keçirmişik. Sözün həqiqi mənasında, sizin uğurlarınız bizi sevindirir. Necə deyərlər, əgər bizim dostlarımız yaxşıdırsa, onda biz də yaxşıyıq. Əgər Azərbaycanda inkişaf müşahidə olunursa, sabitlik qorunursa, bu, o deməkdir ki, ölkə Prezidenti, ölkə parlamenti öz işinin öhdəsindən lazımınca gəlir. Azərbaycanın bütün sahələrdə inkişafının davamlı olacağına inanıram və düşünürəm ki, bundan sonra da bütün istiqamətlərdə, o cümlədən, neft, qaz və qeyri-neft sektorunda böyük nailiyyətlər əldə ediləcək”.
O, həmçinin, qeyd edib ki, hər iki ölkə arasında olan və çox qədimlərə söykənən dostluq, qardaşlıq əlaqələri bundan sonra da möhkəmlənəcək: “Bizim məktəblərimizdə Nizami Gəncəvinin əsərləri öyrədilir. Biz Zeynəb Xanlarova, Rəşid Behbudov, Nəzakət Məmmədovanın musiqilərini dinləmişik. Mən hesab edirəm ki, bu dostluq bütün sosial təbəqələri, gəncləri, qadın birliklərini əhatə edəcək”.
Sonda Azərbaycan xalqına əmin-amanlıq arzulayan qonaq ölkədə Ulu öndər Heydər Əliyev tərəfindən başlanan və Prezident İlham Əliyev tərəfindən uğurla davam etdirilən siyasi kursa və dövlət başçısına göstərilən ehtiram və verilən dəyəri yüksək qiymətləndirib.
SEVİNC
üMİDƏ

Paylaş:

Baxılıb: 1069 dəfə