Aktauda AZAL təyyarəsinin qəzasında həlak olanların xatirəsi anılıb

Bakı:

26 °C

68 %

1 m/s

Əlaqə

AZ RU EN

Ana səhifə / Sosial / Aktauda AZAL təyyarəsinin qəzasında həlak olanların xatirəsi anılıb

Aktauda AZAL təyyarəsinin qəzasında həlak olanların xatirəsi anılıb

07.02.2025 [21:36]

Ötən il dekabrın 25-də AZAL-a məxsus təyyarənin qəzaya uğraması nəticəsində həlak olanların xatirəsi Aktauda anılıb.

AZƏRTAC xəbər verir ki, tədbir Azərbaycanın Qazaxıstandakı səfirliyi və Mangistau vilayətinin Akimatı tərəfindən təşkil edilib.

Tədbirdə Mangistau vilayətinin akimi Nurdaulet Kılıbay, Azərbaycanın Qazaxıstandakı səfiri Ağalar Atamoğlanov, Qazaxıstanın Azərbaycandakı səfiri Alim Bayel, Azərbaycanın Aktaudakı baş konsulu Ayxan Süleymanlı, qəza nəticəsində həlak olmuş qazaxıstanlıların ailə üzvləri, Azərbaycan diasporunun nümayəndələri, xilasetmə işlərində iştirak etmiş qurumların təmsilçiləri və Aktau şəhərinin sakinləri iştirak ediblər.

Mərasimdə çıxış edən Mangistau vilayətinin akimi Nurdaulet Kılıbay həlak olanların yaxınlarına başsağlığı verib. Deyib ki, Qazaxıstan Prezidenti Kasım-Jomart Tokayevin tapşırığı ilə təyyarə qəzasının nəticələrinin aradan qaldırılması və səbəblərinin müəyyən edilməsi, zərərçəkənlərə yardım göstərilməsi üçün hökumət komissiyası yaradılıb. Qazaxıstanın səlahiyyətli orqanları, o cümlədən Mangistau vilayətinin Akimatı faciə günlərində bütün zəruri tədbirləri görüb.

Azərbaycanın Qazaxıstandakı səfiri Ağalar Atamoglanov öz növbəsində bildirib ki, faciə hər kəsin qəlbində dərin iz buraxıb.

“Lakin bu hadisə həm də bizi birləşdirdi. Bir daha bütün dünyaya göstərdi ki, biz qardaş xalqlarıq. Bu, sözdə deyil, əməldə də belə oldu. Biz bunu burada, Aktauda öz gözlərimizlə gördük", - deyə diplomat bildirib.

Səfir qəzadan dərhal sonra zəruri tədbirlər görən və zərərçəkmiş sərnişinlərin xilas olunmasında fəal iştirak edən xilasedicilərə, peşəkar tibbi personala, həmçinin bütün Qazaxıstan vətəndaşlarına dərin minnətdarlığını bildirib.

Diplomat Azərbaycan və Qazaxıstan xalqları arasında dostluq-qardaşlıq əlaqələrinin inkişafına və möhkəmləndirilməsinə verdiyi töhfəyə görə səfirlik adından Amil Yusifova təşəkkürnamə təqdim edib.

Qazaxıstanın Azərbaycandakı səfiri Alim Bayel vurğulayıb ki, bu gün ölkələrimiz arasındakı münasibətlər həqiqətən müttəfiqlik xarakteri alıb. O qeyd edib ki, Xəzər dənizinin şərq və qərb sahillərində yerləşən Qazaxıstan və Azərbaycan Türk dünyasının mühüm aktorları, həmçinin Avrasiya nəqliyyat-logistika arxitekturasının əsas həlqələridir.

A.Bayel Azərbaycan Prezidenti İlham Əliyevin ölkələrimiz arasında dostluq və qardaşlığın faciədən sonra daha da möhkəmləndiyinə dair sözlərini xatırladıb. O, bu kontekstdə deyib ki, Qazaxıstan tərəfi azərbaycanlı iş adamı Amil Yusifovun təyyarə qəzasında həlak olanların ailələrinə yardım göstərmək təklifini minnətdarlıqla qəbul edib.

Mərasimdə iş adamı Amil Yusifov Almatı şəhərində yerləşən yeni yaşayış kompleksində beş ikiotaqlı mənzilin açarlarını qəzada həlak olmuş qazaxıstanlıların yaxınlarına təqdim edib.

Bundan əlavə, iş adamı Mangistau vilayətinin Fövqəladə Hallar Departamentinə, xəstəxanaya, Aktau şəhərinin təcili və təxirəsalınmaz tibbi yardım stansiyasına üç yeni avtomobil hədiyyə edib.

Paylaş:

Baxılıb: 540 dəfə