Binəqədi rayonu daha bir ilkə imza atıb

Bakı:

12 °C

94 %

2 m/s

Əlaqə

AZ RU EN

Ana səhifə / Sosial / Binəqədi rayonu daha bir ilkə imza atıb

Binəqədi rayonu daha bir ilkə imza atıb

10.07.2014 [09:55]

Yerli icra hakimiyyətləri arasında ilk dəfə olaraq məhz Binəqədi rayon İcra Hakimiyyəti tərəfindən rayon ərazisində bir sıra ünvanlarda elektron informasiya köşkləri quraşdırılıb
İyulun 9-da Binəqədi rayonunda elektron informasiya köşklərinin təqdimatı olub. Tədbiri giriş sözü ilə açan Binəqədi rayon İcra Hakimiyyəti başçısının birinci müavini İlqar Süleymanov modern və çevik idarəetmənin təmin olunması, dövlət idarəçiliyinin müasir prinsiplər əsasında təşkil edilməsi məqsədi ilə son illər mühüm tədbirlər görüldüyünü diqqətə çatdırıb.
İ.Süleymanov bu istiqamətdə Binəqədi rayon İcra Hakimiyyəti tərəfindən zəruri addımların atıldığını bildirib, Binəqədi RİH-də Avtomatlaşdırılmış İnformasiya Sisteminin, qısa vaxt ərzində sakinlər tərəfindən böyük rəğbətlə qarşılanan yerli icra hakimiyyətləri arasında ilk dəfə olaraq xüsusi texniki vasitələrlə və müvafiq proqram təminatı ilə təchiz edilmiş Sakinlərin Müraciət Xidmətinin yaradılmasını qeyd edib. Bununla yanaşı, natiq RİH başçısı Aparatı ilə rayon ərazisində yerləşən idarə, müəssisə və təşkilatlar arasında elektron şəkildə yazışmalar aparılması üçün həmin qurumlara avtomatlaşdırılmış informasiya sistemindən istifadə imkanı yaradıldığını da bildirib. İ.Süleymanov, həmçinin, “Prezident İlham Əliyevin dövlət idarəçiliyində informasiya-kommunikasiya texnologiyalarının uğurlu tətbiqi işinə ayırdığı diqqət vətəndaş məmnunluğuna nail olmaq baxımından çox böyük əhəmiyyət daşıyır” deyib.
O da qeyd olunub ki, yerli icra hakimiyyətləri arasında ilk dəfə olaraq məhz Binəqədi rayon İcra Hakimiyyəti tərəfindən rayon ərazisində bir sıra ünvanlarda elektron informasiya köşkləri quraşdırılıb.
Sonra Binəqədi RİH başçısı Aparatının Sənədlərlə və vətəndaşların müraciətləri ilə iş şöbəsinin müdiri Elnur İmanov informasiya köşklərinin iş prinsipi barədə məlumatları tədbir iştirakçılarının diqqətinə çatdırıb. O, hazırda rayon ərazisində İcra Hakimiyyətinin elektron informasiya köşklərinin Azadlıq prospekti 157 ünvanında yerləşən “Favorit” marketdə, 8-ci mikrorayon İ.Dadaşov küçəsi 60 ünvanında yerləşən “Bizim market”də və metronun “Azadlıq prospekti” stansiyasında quraşdırıldığını bildirib, yaxın gələcəkdə bu köşklərin əhatə dairəsinin genişlənəcəyi və rayonun bütün inzibati ərazi dairələrini əhatə edəcəyi barədə məlumat verib. İnteraktiv formada keçirilən təqdimatda E.İmanov jurnalistləri maraqlandıran sualları cavablandırıb.
Rabitə və Yüksək Texnologiyalar Nazirliyinin İnformasiya cəmiyyətinin inkişafı şöbəsinin müdiri İsfəndiyar Əliyev və “ASAN xidmət”in Strateji araşdırmalar və sosial innovasiyalar şöbəsinin müdir müavini Fariz Cəfərovun çıxışları ilə davam edən tədbir Binəqədi rayon İcra Hakimiyyətinin elektron informasiya köşklərinin təbliğatı ilə əlaqədar hazırlanmış sosial reklam çarxının nümayiş etdirilməsi ilə yekunlaşıb. Tədbirdən sonra qonaqlar və media nümayəndələri Binəqədi rayon İcra Hakimiyyətinin inzibati binası ilə tanış olublar.

Paylaş:

Baxılıb: 1067 dəfə