Naxçıvanın Bakıdakı daimi nümayəndəliyində Şuşanın işğalının 23-cü ildönümü ilə əlaqədar tədbir keçirilib

Bakı:

20 °C

64 %

8 m/s

AZ RU EN

Ana səhifə / Sosial / Naxçıvanın Bakıdakı daimi nümayəndəliyində Şuşanın işğalının 23-cü ildönümü ilə əlaqədar tədbir keçirilib

Naxçıvanın Bakıdakı daimi nümayəndəliyində Şuşanın işğalının 23-cü ildönümü ilə əlaqədar tədbir keçirilib

09.05.2015 [13:01]

Naxçıvan Muxtar Respublikasının Bakı şəhərindəki daimi nümayəndəliyində Şuşanın işğalının 23-cü ildönümü ilə əlaqədar “Şuşa uzaqda deyil” adlı tədbir keçirilib.
Nümayəndəlikdən AZƏRTAC-a bildiriblər ki, əvvəlcə ölkəmizin müstəqilliyi, ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Daimi nümayəndəliyin rəhbəri Bəxtiyar Əsgərov çıxış edərək bildirib ki, Azərbaycan xalqının mədəniyyətinin, əsrarəngiz musiqisinin beşiyi sayılan, tarixi Azərbaycan torpaqlarının əbədi və ayrılmaz parçası, böyük alimlərin, bəstəkarların, şairlərin vətəni olan Qarabağın paytaxtı - Şuşa şəhəri artıq iyirmi üç ildir təcavüzkar Ermənistanın işğalı altındadır. Düz iyirmi üç ildir ki, yadlar tapdağı olan Şuşa ölüm sükutuna qərq olub. 1988-ci ildən başlayaraq ermənilərin işğalçılıq siyasəti nəticəsində Azərbaycan ərazisinin 20 faizi zəbt olunub. Ermənistan Azərbaycan əhalisinə qarşı etnik təmizləmə siyasəti aparıb. BMT-nin məlum qətnamələrinə baxmayaraq, Ermənistan bu gün də işğalçılıq siyasətini davam etdirir. Bu işğalçılıq xalqımıza böyük maddi-mənəvi ziyan vurub, 1 milyondan artıq soydaşımız öz yurd-yuvasından didərgin düşüb.
Diqqətə çatdırılıb ki, 1992-ci il may ayının 8-nə keçən gecə erməni hərbi birləşmələri keçmiş sovet ordusunun 366-cı alayının hərbi qulluqçularının və 40 zirehli texnikasının köməyi ilə Şuşa şəhərinə hücuma keçdilər. Uzun sürən artilleriya atəşindən və qeyri-bərabər qanlı döyüşlərdən sonra şəhər işğal olundu. Dünya dövlətlərinin, beynəlxalq təşkilatların işğalçı ölkə kimi tanıdığı Ermənistanın silahlı qüvvələri bu şəhərdə Azərbaycan xalqının izlərini silmək, onu unutdurmaq üçün ən ağlagəlməz cinayətlərə əl atıblar. Şuşa şəhərinin qiymətli tarixi abidələrini dağıdır, milli arxitekturasını silib istədikləri kimi yenidən qurmağa cəhd edirlər. Şəhərdə nadir tarixi-memarlıq tikililəri, qədim abidələr, inanc yerləri, yaşayış binaları, hətta məzarlıqlar dağıdılıb, zəngin muzey və kitabxanalar talan edilib, bir vaxtlar təkrarolunmaz təbiətinə görə “Qafqazın cənnəti” adlandırılan yerlər xarabazara çevrilib.
Qeyd edilib ki, Şuşanın işğalı nəticəsində şəhərdə 195 nəfər Azərbaycan vətəndaşı xüsusi amansızlıqla qətlə yetirilib, 165 nəfər yaralanıb, onlardan 150 nəfəri əlil olub, 552 körpə valideynlərini itirib, 20 mindən artıq əhali isə doğma yurd-yuvasını tərk edərək məcburi köçkün vəziyyətinə düşüb. Əsir və girov götürülmüş 58 azərbaycanlının taleyi barədə bu günə qədər məlumat yoxdur.
Diqqətə çatdırılıb ki, bu gün qaçqın və məcburi köçkünlərin problemlərinin həlli istiqamətində lazımi addımlar atılır. Dövlət tərəfindən məcburi köçkünlərə diqqət və qayğının nəticəsi olaraq bütün məcburi köçkün şəhərcikləri ləğv olunub. Məcburi köçkünlərin sosial problemlərinin həlli istiqamətində mühüm addımlar atılıb.

Paylaş:

Baxılıb: 837 dəfə