Nərimanov rayonunda yanğın təhlükəsizliyi ilə bağlı hazırlıq məsələləri müzakirə edilib

Bakı:

25 °C

65 %

12 m/s

Əlaqə

AZ RU EN

Ana səhifə / Sosial / Nərimanov rayonunda yanğın təhlükəsizliyi ilə bağlı hazırlıq məsələləri müzakirə edilib

Nərimanov rayonunda yanğın təhlükəsizliyi ilə bağlı hazırlıq məsələləri müzakirə edilib

19.10.2015 [10:09]

Fövqəladə Hallar Nazirliyinin (FHN) Bakı Regional Mərkəzinin yaxınlaşmaqda olan qış mövsümü ilə əlaqədar rayon icra hakimiyyətləri və digər qurumlarla birgə keçirdiyi maarifləndirmə tədbirləri çərçivəsində Nərimanov rayon İcra Hakimiyyətində “Yanğın profilaktikasında və yanğın hadisələri zamanı düzgün davranış vərdişlərinin aşılanmasında yerli icra hakimiyyətləri və özünüidarəetmə orqanlarının rolu” mövzusunda müzakirələr aparılıb.
FHN-dən AZƏRTAC-a bildiriblər ki, müşavirədə rayon rəhbərliyi, Bakı Regional Mərkəzinin, Nərimanov rayon fövqəladə hallar və mülki müdafiə şöbəsinin, rayonun kommunal-təsərrüfat təşkilatlarının rəhbərləri və bələdiyyə üzvləri qatılıblar.
Müşavirədə Nərimanov rayon İcra Hakimiyyəti başçısının birinci müavini, rayon fövqəladə hallar komissiyasının sədri Şahmar İbadov yanğın profilaktikasında və yanğın hadisələri zamanı düzgün davranış vərdişlərinin aşılanmasında yerli icra hakimiyyətləri və özünüidarəetmə orqanlarının rolundan danışaraq rayonda payız-qış mövsümünə hazırlığın yekunlarına dair məlumat verib. Ş.İbadov əksər hallarda qış mövsümündə baş verən yanğın hadisələrinin və digər belə halların aradan qaldırılmasında maarifləndirici tədbirlərin əhəmiyyətini qeyd edib. O, aidiyyəti qurumlar tərəfindən rayon ərazisində mütəmadi olaraq mühüm qabaqlayıcı tədbirlərin həyata keçirildiyini diqqətə çatdırıb.
Bakı Regional Mərkəzinin rəis müavini Tale Şamçıyev respublika əhalisinin və ərazilərinin təhlükəsizliyinin təmin edilməsi, baş vermiş təhlükəli hadisələr zamanı insanların axtarışı və xilası istiqamətində aparılmış işlər barədə videogörüntülər əsasında məlumat verib. O, nazirliyin digər dövlət strukturları ilə birgə səyləri nəticəsində insan tələfatının və maddi itkilərin sayının xeyli azaldığını deyib. FHN-in nümayəndəsi görülmüş işlərə baxmayaraq, bir sıra hallarda fiziki və hüquqi şəxslər tərəfindən yanğın təhlükəsizliyinin norma və qaydalarının tələblərinin pozulmasının insanların həyat və sağlamlığını təhlükə altında salmasına, onların əmlakının məhvinə, infrastrukturun sıradan çıxmasına və dövlət büdcəsinə külli miqdarda ziyan vurmasına səbəb olduğunu bildirib. Belə halların qarşısının alınmasında insanların yanğın profilaktikası sahəsində maarifləndirilməsinin əhəmiyyəti vurğulanıb.
Sonra yanğın təhlükəsizliyinin və fəlakətlərinin aradan qaldırılması və s. mühüm mövzularda məruzələr dinlənilib.
Müşavirədə, eyni zamanda, rayonun istilik, enerji, qaz, su, lift, mənzil-kommunal və təcili tibbi yardım xidmətləri sahəsində görülən işlər diqqətə çatdırılıb, təhlükəsizlik qaydalarına riayət olunmasına gündəlik nəzarətin gücləndirilməsinin zəruriliyi qeyd edilib.
Tədbirdə rayonun fövqəladə hallar komissiyasının, yerli özünüidarəetmə orqanlarının, mülki müdafiə xidmətlərinin, idarə müəssisə və təşkilatlarının rayonda baş verə biləcək fövqəladə halların qarşısının alınması ilə bağlı FHN və nazirliyin yerli orqanı olan Nərimanov rayon fövqəladə hallar və mülki müdafiə şöbəsi ilə daim qarşılıqlı surətdə fəaliyyət göstərərək operativ tədbirlərin həyata keçirilməsinə hər an hazır olmalarının vacibliyi vurğulanıb, belə əməkdaşlığın gələcəkdə də davam etdiriləcəyinə əminlik ifadə olunub.

Paylaş:

Baxılıb: 800 dəfə