Türkan və Zirə qəsəbələrində içməli su təchizatı sistemləri istifadəyə verilib

Bakı:

24 °C

78 %

7 m/s

Əlaqə

AZ RU EN

Ana səhifə / Sosial / Türkan və Zirə qəsəbələrində içməli su təchizatı sistemləri istifadəyə verilib

Türkan və Zirə qəsəbələrində içməli su təchizatı sistemləri istifadəyə verilib

04.11.2015 [09:34]

“Azərsu” Açıq Səhmdar Cəmiyyəti (ASC) “2014-2015-ci illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı”na uyğun olaraq qəsəbələrdə içməli su təchizatının yenidən qurulması layihələrinin icrasını davam etdirir. Belə ki, Türkan və Zirə qəsəbələrində icra olunan layihələr uğurla başa çatdırılıb və oktyabrın 31-də yeni su təchizatı sistemlərinin istifadəyə verilməsi ilə bağlı mərasim keçirilib.
“Azərsu” ASC-nin sədri Qorxmaz Hüseynov bildirib ki, Prezident İlham Əliyevin tapşırıqlarının icrasının nəticəsidir ki, bu gün bu qəsəbələrdə insanlar daimi, keyfiyyətli içməli su ilə təmin olunublar. Türkan və Zirə qəsəbələrini dayanıqlı və keyfiyyətli içməli su ilə təmin etmək üçün su mənbəyi Ceyranbatan Ultrasüzgəcli Sutəmizləyici Qurğular Kompleksi seçilib.
ASC sədri qeyd edib ki, Türkan və Zirə qəsəbələrinə yüksək keyfiyyətli su Ceyranbatan-Balaxanı-Ramana-Qala-Zirə kəmərindən verilir. Bu məqsədlə Türkan qəsəbəsinə 280 millimetr diametri olan borularla 4,2 kilometr uzunluğunda, Zirə qəsəbəsinə isə 160 millimetr diametrli borularla magistral kəmərdən qəsəbəyə qədər 3 kilometr uzunluğunda magistral su xətti çəkilib.
Həmçinin Qorxmaz Hüseynov məlumat verib ki, Türkan qəsəbəsində müxtəlif diametrli borularla 37 kilometrə yaxın su şəbəkəsi yaradılıb, 800-dək evə birləşmə verilib və 400-dək abonent smart sayğacla təmin olunub. Zirə qəsəbəsində isə müxtəlif diametrli borularla 30 kilometrə yaxın su şəbəkəsi yaradıldığını bildirən ASC sədri 700-ə yaxın evə birləşmə verildiyini və 300-dən çox abonentin smart sayğacla təmin olunduğunu vurğulayıb.
Mərasimdə iştirak edən Xəzər rayon İcra Hakimiyyətinin başçısı Gülağa İslamov bu günə qədər 11 min 500 nəfər əhalisi olan Türkan və 11 min 700 nəfər əhalisi olan Zirə qəsəbələrində mərkəzləşdirilmiş içməli su şəbəkəsinin mövcud olmadığını bildirib.
Əhalinin əsasən quyu sularından istifadə etdiyini və yaxud da içməli suyu maşınlarla aldığını söyləyən Gülağa İslamov bu gündən etibarən əhalinin belə bir probleminin qalmadığını, onların tam keyfiyyətli içməli su ilə təmin olunduqlarını vurğulayıb.
Sakinlər xoş əhval-ruhiyyə ilə problemlərinin artıq həll olunması sevincini yaşayır və təəssüratları ilə bölüşürdülər. Türkan qəsəbəsinin sakini Hacıəli Əliniyaz oğlu öz sevincini bizimlə paylaşaraq Azərbaycan Prezidenti İlham Əliyevə hər zaman sakinlərin qayğısına qaldığı üçün, “Azərsu” ASC-nin kollektivinə isə çəkdiyi zəhmətlərə görə təşəkkürünü bildirib.
Daha bir Türkan qəsəbəsi sakini - Fazil Babayev bu hadisənin inanılmaz olduğunu söyləyib. “Prezident İlham Əliyevin bütün tapşırıqları sakinlərin şəraitinin yaxşılaşdırılmasına yönəlib. Artıq bizim qəsəbədə heç bir problem qalmayıb - qazımız, işığımız, telefonumuz, ən əsası, suyumuz var”, - deyə qəsəbə sakini qeyd edib.

Paylaş:

Baxılıb: 1050 dəfə