M.Abbaszadə: Bu il ali və orta ixtisas təhsili müəssisələrinə 48.905 nəfər qəbul oluna biləcək

Bakı:

13 °C

82 %

5 m/s

Əlaqə

AZ RU EN

Ana səhifə / Sosial / M.Abbaszadə: Bu il ali və orta ixtisas təhsili müəssisələrinə 48.905 nəfər qəbul oluna biləcək

M.Abbaszadə: Bu il ali və orta ixtisas təhsili müəssisələrinə 48.905 nəfər qəbul oluna biləcək

16.07.2016 [09:38]

Dövlət İmtahan Mərkəzi Direktorlar Şurasının sədri Məleykə Abbaszadə iyulun 15-də qəbul kampaniyasının gedişinə və “Abituriyent” jurnalının dördüncü buraxılışının təqdimatına həsr olunmuş mətbuat konfransı keçirib.
AZƏRTAC xəbər verir ki, M.Abbaszadə 2016/2017-ci tədris ili üçün Azərbaycan Respublikasının ali təhsil müəssisələrinə tələbə qəbulu müsabiqəsində iştirak etmək üçün ixtisas seçimi elanı, “Abituriyentin elektron ixtisas seçimi ərizəsi”nin doldurulma qaydası, ali təhsil müəssisələrinə qəbul aparılan ixtisaslar, dövlət sifarişi ilə tələbə qəbulunun proqnozunun dərc edildiyi “Abituriyent” jurnalının dördüncü buraxılışı haqqında məlumat verib. İyulun 15-də cari ilin məzunları üçün keçiriləcək qəbul imtahanlarına dair statistik məlumatlar və digər cari tədbirləri mətbuat nümayəndələrinin diqqətinə çatdırıb.
M.Abbassadə bu il Azərbaycanda ali məktəblərə qəbul üçün 41.965 yer təqdim edildiyini və bunun ötən ildəkindən 7,21 faiz çox olduğunu diqqətə çatdırıb.
Qeyd edilib ki, dövlət sifarişli yerlərin sayında bir az fərq var. Burada ötən illə müqayisədə 497 yer artıb və 12.211-ə çatıb. Ötən il dövlət sifarişli yerlərin sayı 11.714 olub. On bir illik təhsil bazasında orta ixtisas təhsili müəssisələrinə (texnikum) isə bu il 6.940 yer ayrılıb. Ötən il isə bu rəqəm 6.133 olub. Beləliklə, 11 illik bazadan texnikumlara ayrılan qəbul yerlərinin sayı ötən illə müqayisədə 13 faiz artıb. Orta ixtisas məktəblərinə 6.940 qəbul yeri var. Plana əsasən 48.905 nəfər ali və orta ixtisas təhsili müəssisələrinə qəbul oluna biləcək.
M.Abbassazə imtahanın respublikanın 11 şəhərində - Bakı, Naxçıvan, Gəncə, Sumqayıt, Mingəçevir, Şəki, Ağcabədi, Göyçay, Şirvan, Lənkəran və Xaçmazda ümumilikdə 47 binada aparılacağını diqqətə çatdırıb. İmtahanların idarə olunmasına 227 imtahan rəhbəri və orta ümumtəhsil müəssisələrindən 2.129 nəzarətçi-müəllim cəlb olunub. İmtahanda 25 min 926 abituriyentin iştirakı nəzərdə tutulur. Onlardan 22.044-ü birinci qrup üzrə, 3.912-si isə dördüncü qrup üzrə imtahan verəcək.
Abituriyentlərdən 23.540-ı Azərbaycan bölməsinin (I qrup üzrə 19995, IV qrup üzrə 3545 nəfər), 2.416-sı isə rus bölməsinin (I qrup üzrə 2049 nəfər, IV qrup üzrə 367 nəfər) məzunudur. Abituriyentlərin 15.067-si oğlan (I qrup üzrə 13873 nəfər, IV qrup üzrə 1194 nəfər), 10.889-u isə qızdır (I qrup üzrə 8171 nəfər, IV qrup üzrə 2718 nəfər). 25.457 nəfər orta ümumtəhsil məktəblərinin, 10 nəfər ali təhsil müəssisələrinin, 489 nəfər isə orta ixtisas təhsili müəssisələrinin məzunudur. 173 abituriyent xarici ölkələrin vətəndaşıdır.
Bakı şəhərində 11.516, Naxçıvanda 1097, Gəncədə 3178, Sumqayıtda 1647, Mingəçevirdə 1208, Şəkidə 1752, Ağcabədidə 876, Göyçayda 1331, Şirvanda 969, Lənkəranda 1359, Xaçmazda isə 1000 abituriyentin imtahan verəcəyi gözlənilir.
İmtahanın gedişini işıqlandırmaq üçün 60-dək KİV nümayəndəsi TQDK-da akkreditasiyadan keçib.
İmtahan başa çatdıqdan dərhal sonra müstəqil ekspertlər tərəfindən test suallarının ekspertizası aparılacaq. Həmin gün “Space” telekanalında canlı yayımlanan “Abituriyent” verilişində TQDK-nın məsul əməkdaşları və ekspertlər tərəfindən imtahanda istifadə olunmuş sualların düzgün cavabları və test tapşırıqları ilə bağlı geniş izahat veriləcək. İmtahanda istifadə olunmuş sualların düzgün cavabları, eyni zamanda, TQDK-nın internet saytında və “Facebook” səhifəsində yerləşdiriləcək.
İmtahan vermiş abituriyentlərin cavab kartlarının emalı başa çatdıqdan sonra nəticələr və hər bir abituriyentin cavab kartının qrafik təsviri TQDK-nın internet saytında yerləşdiriləcək. Abituriyentlər imtahan nəticələri barədə məlumatı, həmçinin mobil telefonla iş nömrələrini 7727 nömrəsinə göndərməklə öyrənə biləcəklər.
Sonda M.Abbaszadə jurnalistlərin suallarını cavablandırıb.

Paylaş:

Baxılıb: 711 dəfə