Xocalı soyqırımı bəşəriyyət əleyhinə cinayət aktıdır

Bakı:

26 °C

50 %

2 m/s

Əlaqə

AZ RU EN

Ana səhifə / Sosial / Xocalı soyqırımı bəşəriyyət əleyhinə cinayət aktıdır

Xocalı soyqırımı bəşəriyyət əleyhinə cinayət aktıdır

25.02.2017 [10:35]

Pirallahıda Xocalı soyqırımının 25-ci ildönümü ilə əlaqədar “Xocalıya ədalət!” adlı tədbir keçirilib
Dünən Pirallahı rayon İcra Hakimiyyətində Xocalı soyqırımının 25-ci ildönümü ilə əlaqədar “Xocalıya ədalət!” adlı tədbir keçirilib. Vaqif Mustafazadə adına Mədəniyyət Mərkəzinin böyük zalında baş tutmuş tədbirdən öncə iştirakçılar foyedə təşkil olunmuş Xocalı soyqırımına həsr edilən foto-stend, kitab sərgisi və Pirallahı rayon məktəblilərinin əl işlərindən ibarət rəsm sərgisi ilə tanış olublar. 29 saylı Uşaq Yaradıcılıq Mərkəzinin rəssamlıq dərnəyi üzvlərinin Xocalı soyqırımını özündə əks etdirən rəsmləri malbertlər və stendlərdə nümayiş olunub.
Pirallahı rayon İcra Hakimiyyəti başçısı Vasif İmanov XX əsrin sonunda ermənilərin Xocalıda törətdikləri soyqırımının bütün insanlığa və bəşəriyyətə qarşı yönəldilmiş ən ağır cinayətlərdən biri olduğunu deyib. Onun sözlərinə görə, bütün dünyanın gözü qarşısında baş verən bu dəhşətli soyqırımının əsl mahiyyəti yalnız Ümummilli lider Heydər Əliyevin 1993-cü ildə xalqın tələbi ilə siyasi hakimiyyətə qayıdışından sonra açıqlanıb, 1994-cü ilin fevralında Azərbaycan Respublikasının Milli Məclisi Xocalı soyqırımına siyasi-hüquqi qiymət verib.
Şuşa rayon İcra Hakimiyyətinin başçısı, “Azərbaycan Respublikası Dağlıq Qarabağ Bölgəsinin Azərbaycanlı İcması” İctimai Birliyinin sədri Bayram Səfərov diqqətə çatdırıb ki, Xocalı soyqırımının dünyada tanınması istiqamətində aparılan təbliğat işləri müsbət nəticələrini verməkdədir. O qeyd edib ki, bu dəhşətli cinayət aktının iştirakçıları layiqli cəzalarını almalıdırlar.
Xocalı rayon İcra Hakimiyyətinin başçısı Şahmar Usubov deyib ki, Xocalı faciəsi ilə əlaqədar son illər dünya ictimaiyyətinə ətraflı məlumat verilməsi istiqamətində ciddi tədbirlər həyata keçirilib. Onun sözlərinə görə, görülən işlər öz nəticələrini verməkdədir. Qeyd olunub ki, Xocalı soyqırımı bəşəriyyət əleyhinə cinayət aktıdır.
“Yeni Azərbaycan” qəzetinin baş redaktoru, Milli Məclisin deputatı Hikmət Babaoğlu isə diqqətə çatdırıb ki, Ermənistan silahlı qüvvələrinin Xocalı şəhərini yerlə yeksan etməsi və azərbaycanlılara qarşı etnik soyqırımının həyata keçirilməsi beynəlxalq hüquq normalarına əsasən qəbul edilmiş konvensiyalara müvafiq surətdə cinayət tərkibli akt kimi dəyərləndirilir: “Xocalının zəbt olunması üzrə həyata keçirilmiş hərbi əməliyyat zamanı şəhərin dinc əhalisinə qarşı kütləvi zorakılıq törədilib ki, bu da konkret olaraq hərbi cinayət kimi xarakterizə olunur. Həmçinin azad dəhliz barədə məlumat Xocalı əhalisinin çoxuna çatdırılmayıb, bu da müvafiq konvensiyalara ziddir”.
“İki sahil” qəzetinin baş redaktoru, YAP Siyasi Şurasının üzvü Vüqar Rəhimzadə Xocalı faciəsi ilə bağlı həqiqətlərin dünya ictimaiyyətinə çatdırılması və Xocalı faciəsinə hüquqi-siyasi qiymət verilməsi istiqamətində Ümummilli lider Heydər Əliyevin tarixi xidmətlərindən bəhs edib, hazırda Prezident İlham Əliyevin rəhbərliyi ilə bu istiqamətdə məqsədyönlü tədbirlərin həyata keçirildiyini diqqətə çatdırıb.
Tədbirə Gənc Tamaşaçılar Teatrının hazırladığı, erməni vəhşiliyini, vandalizmini əks etdirən “Arzu və Murad” tamaşasına baxışla yekun vurulub. Tədbir başa çatdıqdan sonra Xocalıdan olan məcburi köçkün ailələrinə Pirallahı rayon İcra Hakimiyyəti tərəfindən maddi yardım verilib.
Nurlan QƏLƏNDƏRLİ

Paylaş:

Baxılıb: 590 dəfə