2020-ci ilin “Könüllülər ili” elan olunması dövlətimizin bu hərəkata verdiyi böyük önəmin ifadəsidir

Bakı:

25 °C

70 %

15 m/s

AZ RU EN

Ana səhifə / Sosial / 2020-ci ilin “Könüllülər ili” elan olunması dövlətimizin bu hərəkata verdiyi böyük önəmin ifadəsidir

2020-ci ilin “Könüllülər ili” elan olunması dövlətimizin bu hərəkata verdiyi böyük önəmin ifadəsidir

10.01.2020 [09:37]

Gənclər hesab edirlər ki, Azərbaycanda könüllülər hərəkatı daha da güclənməkdədir
Məlum olduğu kimi, Prezident İlham Əliyev ötən il dekabrın 30-da “Azərbaycan Respublikasında 2020-ci ilin “Könüllülər ili” elan edilməsi haqqında” Sərəncam imzalayıb. Dövlət başçısı tərəfindən bu Sərəncamın imzalanması gənclərin fərdi inkişafına təkan vermək, onlarda sosial məsuliyyət hissini artırmaq, gəncliyin potensialından xalqın rifahı və ölkəmizin dayanıqlı inkişafı üçün səmərəli istifadə etmək baxımından xüsusi önəm kəsb edir. Sərəncamda qeyd edildiyi kimi, könüllülük bir çox fəaliyyət sahələrinə nüfuz edərək ümummilli hərəkata çevrilib, ölkəmizin hər bir bölgəsinə, ictimai həyatın müxtəlif sahələrinə yayılaraq, cəmiyyətimizin bütün təbəqələrini əhatə edib, gənclərimizin həyat tərzinə çevrilib. ASAN, “Regional İnkişaf” İctimai Birliyi, “Bir” Tələbə könüllüləri və digər könüllü hərəkatları yaranıb, mərkəzi və yerli icra hakimiyyəti orqanlarında on minlərlə gənci birləşdirən könüllü qrupları formalaşıb.
Məsələ ilə bağlı Yeni Azərbaycan Partiyası (YAP) Xəzər rayon təşkilatı Gənclər Birliyinin sədri Sadiq Əliyev bildirib ki, ölkəmizdə gənclərin hərtərəfli inkişafı, onların düzgün yetişdirilməsi, milli-mənəvi dəyərlərə sadiqlik və vətənpərvərlik ruhunda tərbiyəsi Prezident İlham Əliyev tərəfindən daim diqqət mərkəzində saxlanılır. Ümummilli Lider Heydər Əliyev tərəfindən əsası qoyulmuş dövlət gənclər siyasətini Prezident İlham Əliyevin uğurla davam etdirməsinin nəticəsidir ki, bu gün Azərbaycan gəncləri bütün sahələrdə özlərini doğruldur, ölkəmizi dünya miqyasında layiqincə təmsil etməyi bacarırlar. Onun sözlərinə görə, Prezident İlham Əliyevin xeyir-duası ilə yaranan “ASAN” könüllülük hərəkatı digər könüllülük fəaliyyətlərinin də yaranmasına stimul olub: “Bir” Tələbə-Könüllü proqramı, “Aqrar İnkişaf Könüllüləri”, prokurorluq orqanlarında “ictimai köməkçilər” kimi könüllü hərəkatlarının yaranması dövlətimizə, cəmiyyətimizə çoxlu sayda təcrübəli, bacarıqlı, müasir düşüncəli Azərbaycan gəncini qazandırdı, kadr ehtiyatını inkişaf etdirdi. Könüllülük dövründə gənclər respublikamızda aparılan islahatların və inkişafın fəal iştirakçısına çevrildilər, “Eurovision” mahnı müsabiqəsi, I Avropa Oyunları, Formula 1 yarışları, IV İslam Həmrəyliyi Oyunları kimi irimiqyaslı beynəlxalq tədbirlərin həyata keçirilməsində əvəzsiz rol oynadılar”.
Onun sözlərinə görə, 2020-ci ilin “Könüllülər ili” elan olunması bir daha Azərbaycan gəncliyinə göstərilən böyük etimad, eyni zamanda, könüllü gənclərimizin fəaliyyətinə verilən ali dəyərdir: “2020-ci ilin ölkəmizdə “Könüllülər ili” elan edilməsi insanların sülhsevərlik, xeyirxahlıq kimi ümumbəşəri dəyərlər ətrafında birləşməsinə, Azərbaycanın parlaq gələcəyinin təminatçısı olan gənclərin dövlətə, Vətənə bağlı, məsuliyyətli bir vətəndaş kimi formalaşmasına, uğurla həyata keçirilən gənclər siyasətinə yeni nəfəs verəcək”.
“Prezident İlham Əliyev tərəfindən 2020-ci ilin Azərbaycanda “Könüllülər ili” elan edilməsi ölkəmizdə könüllülüyün yeni, daha məhsuldar mərhələyə qədəm qoyduğunun təsdiqi oldu. “Könüllülər ili” gənclərin ilk iş təcrübəsi qazanmasına, özlərini sınaqdan keçirmələrinə imkan yaratmaqla yanaşı, təşəbbüskar, innovativ düşüncə tərzinə, müasir dünyagörüşünə malik gənclərin vahid niyyət ətrafında birləşməsinə, xalqın rifahı, ölkənin dayanıqlı inkişafı naminə fəaliyyətinə böyük stimul olacaq”. Bu fikirləri isə YAP Yevlax rayon təşkilatı Gənclər Birliyinin sədri Maqsud Süleymanlı deyib.
M.Süleymanlı qeyd edib ki, bu gün ölkəmizi beynəlxalq miqyasda uğurla təmsil edən, eyni zamanda, respublikamızın ictimai-siyasi, iqtisadi həyatında fəal rol oynayan Azərbaycan gəncləri vətənpərvər, yüksək intellektli, milli mənəvi dəyərlərinə, tarixi köklərinə, dövlətə və Vətənə sadiq olmaqla yanaşı, ictimai-siyasi məsələlərlə bağlı əsl vətəndaşlıq mövqeyindən çıxış edərək yüksək fəallıq və təşəbbüskarlıq göstərirlər. Bunlarla yanaşı, bu gün Azərbaycan gəncləri müxtəlif sahələrdə, o cümlədən qanunverici, icraedici və məhkəmə orqanlarında, eləcə də özəl sektorda uğurla fəaliyyət göstərirlər. Onun sözlərinə görə, dövlət qurumlarında gənclərin intellektual potensialından, kreativ ideyalarından, bilik, bacarıq və vərdişlərindən səmərəli istifadə edilir. Bu gün dövlətçiliyə və milli maraqlara sadiq fəal gənclər Azərbaycanın inkişafına mühüm töhfələr verirlər. “Eyni zamanda, dövlət gənclər siyasəti gənclərin yeni inkişaf modeli kimi təqdim edilən könüllülük hərəkatının geniş vüsət almasına şərait yaradıb”, - deyə M.Süleymanlı söyləyib.
Nardar BAYRAMLI

Paylaş:

Baxılıb: 510 dəfə