Karantin rejimində müsbət dinamikanın əldə edilməsi vətəndaş məsuliyyətindən asılıdır

Bakı:

27 °C

69 %

8 m/s

Əlaqə

AZ RU EN

Ana səhifə / Sosial / Karantin rejimində müsbət dinamikanın əldə edilməsi vətəndaş məsuliyyətindən asılıdır

Karantin rejimində müsbət dinamikanın əldə edilməsi vətəndaş məsuliyyətindən asılıdır

31.07.2020 [13:09]

Ekspertlərin fikrincə, sağalanların sayıyoluxanların sayından çox olsa da bu, heç də arxayınlaşmağa əsas vermir

Azərbaycanda yeni növ koronavirus (COVİD-19) infeksiyasının yayılmasına qaşı effektiv tədbirlər davam etdirilir. Qeyd edək ki, ölkəmizdə iyulun 21-dən avqustun 5-nə kimi tətbiq edilən sərt karantin rejimi nəticəsində gündəlik yoluxma hallarının sayında müəyyən qədər sabitləşmə təmin edilib, yoluxmaların sayı sağalanların sayından kəskin şəkildə azalıb. Bununla yanaşı, hələ də epidemioloji vəziyyəti qənaətbəxş hesab etmək olmaz. Çünki gündəlik yeni yoluxan xəstələrin sayı hələ də üçrəqəmli sayla ifadə edilir və bu da o deməkdir ki, vətəndaşlar arxayınlaşmamalı, daha məsuliyyətli olmalı, xüsusi karantin rejiminin qaydalarına riayət etməlidirlər.

Məsələ ilə bağlı fikirlərini bölüşən Milli Məclisin deputatı İlham Məmmədov qeyd edib ki, ölkəmizdə pandemiyanın yayılmasına və təsirlərinin azaldılmasına qarşı dövlətimiz tərəfindən yüksək səviyyədə tədbirlər həyata keçirilir. Millət vəkili bildirib ki, bir sıra bölgələrimizdə ciddi karantin rejiminin avqustun 5-nə kimi uzadılması zərurətdən irəli gəlmişdi və bu, artıq öz müsbət effektini göstərir. İ.Məmmədov onu da deyib ki, karantin rejimi dövründə və sonrakı mərhələdə vətəndaşlar daha çox məsuliyyətli olmalı, tibbi maskalardan istifadəni davam etdirməlidirlər: "Pandemiyanın təsirlərinin tam aradan qaldırılmasının vacib şərti vətəndaşların məsuliyyətli davranışlarıdır. İnsanlar karantin qaydalarına riayət etməli, tiibbi maskalardan istifadə olunmalı, sosial məsafə qorunmalıdır. Bu, pandemiyaya qarşı mübarizədə tam effektiv nəticənin əldə olunmasına yardım göstərir. Hər kəs bilməlidir ki, pandemiya hələ sona çatmayıb. Əgər sərt karantin rejimi şəraitində yaşamaq istəmiriksə, məsuliyyətli olaq və qayda-qanunlara riayət edək".

Milli Məclisin deputatı Kamilə Əliyeva isə bildirib ki, yumşalmalar dövründə qaydalara tam riayət edilməməsi nəticə etibarilə koronavirusa yoluxmaların sayında artıma gətirib çıxardı ki, bu da yenidən sərt karantin rejiminin tətbiqini zərurətə çevirdi. Millət vəkilinin fikrincə, eyni vəziyyət təkcə Azərbaycanda deyil, dünyanın bir çox ölkələrində müşahidə edilməkdədir. Hazırda bir çox ölkələr yenidən sərt karantin rejiminin tətbiqi istiqamətində tədbirlər həyata keçirirlər: "Göründüyü kimi, sərt karantin rejiminin yenidən tətbiqi öz nəticəsini verməkdədir. Azərbaycanda iyun ayının ortalarında koronavirus ölkə ərazisində sürətlə yayılmağa başladı və gündəlik təsdiq edilmiş halların sayı 500-ü ötdü. İyulun 21-dən etibarən bəzi regionlarda tətbiq olunan sərt karantin nəticəsində isə sağalanların sayı gündəlik yoluxmanın sayını iki dəfə üstələyir. Hesab edirəm ki, sərt karantin rejimi nəticəsində əhalinin daha çox evdə qalması, kütləvi toplantıların, gəzintilərin olmaması, insanlar arasında yaxın təmasların kəskin azalması bunda mühüm rol oynadı. Hər kəs bilməlidir ki, bütün görülən tədbirlərin müsbət nəticə verməsi üçün vətəndaş məsuliyyəti mühüm əhəmiyyət kəsb edir".

Pərviz SADAYOĞLU

Paylaş:

Baxılıb: 571 dəfə