Rusiya Federasiyasının sülhməramlı kontingentinin təminatı ilə bağlı fəaliyyətlər həyata keçirilir

Bakı:

25 °C

66 %

7 m/s

AZ RU EN

Ana səhifə / Sosial / Rusiya Federasiyasının sülhməramlı kontingentinin təminatı ilə bağlı fəaliyyətlər həyata keçirilir

Rusiya Federasiyasının sülhməramlı kontingentinin təminatı ilə bağlı fəaliyyətlər həyata keçirilir

03.12.2020 [10:13]

Məlum olduğu kimi, Azərbaycanın Dağlıq Qarabağ bölgəsində yerləşdirilən Rusiya sülhməramlı kontingentinin təminatı ilə bağlı Azərbaycan Respublikası və Rusiya Federasiyası arasında imzalanmış protokola əsasən müvafiq fəaliyyətlər həyata keçirilir.
Məsələ ilə bağlı Milli Məclisin deputatı Ceyhun Məmmədov deyib ki, Azərbaycan hökuməti bu yüklərin aparılması, aidiyyəti üzrə çatdırılması üçün lazımı şəraiti yaradır. Bu yüklərin məhz Azərbaycan vasitəsilə çatdırılması, eyni zamanda, ölkəmizin ərazi bütövlüyünə və suverenliyinə hörmətin nümunəsidir.
Deputat bildirib ki, münaqişənin tənzimlənməsində ən aktiv rol oynayan dövlətlərdən biri Rusiya oldu: “Rusiya Prezidenti Vladimir Putin dəfələrlə Dağlıq Qarabağın Azərbaycanın ərazisi olduğunu bəyan etdi, Azərbaycanın müttəfiqlərini seçmək hüququnun olduğunu dedi. Digər tərəfdən, məlumdur ki, Rusiyanın Ermənistanla birbaşa sərhədi yoxdur. Bu qədər yükün təyyarələr vasitəsilə daşınması, daha sonra isə buraxılış imkanları məhdud olan Laçın dəhlizi vasitəsilə Dağlıq Qarabağa çatdırılması həm böyük vaxt itkisinə, həm də böyük məbləğdə məsrəfə səbəb olar”.
Millət vəkilinin sözlərinə görə, Azərbaycan hər zaman Rusiya ilə əlaqələrin gücləndirilməsinə və inkişafına xüsusi önəm verib: “Bu əlaqələrin yüksək səviyyədə olması və inkişafı birgə regional layihələrin həyata keçirilməsinə öz töhfəsini verir. Azərbaycan güclü və suveren dövlətdir, regional əməkdaşlıqda, ikitərəfli və çoxtərəfli birgə layihələrin həyata keçirilməsində maraqlıdır. Bu da ölkəmizin suverenliyinin, milli təhlükəsizliyinin qorunmasına, təhdidlərin qarşısının öncədən alınmasına öz ciddi töhfəsini verir”.
“Noyabrın 10-da Azərbaycan, Rusiya prezidentləri və Ermənistanın baş nazirinin imzaladıqları birgə bəyanatın müddəalarına əsasən Rusiya tərəfi əvvəlcədən müəyyən edilmiş kvotaya uyğun şəkildə sülhməramlılarının Dağlıq Qarabağın ərazisində yerləşdirilməsi ilə bağlı müvafiq tədbirlər həyata keçirib”. Bu fikirləri isə Milli Məclisin deputat Ramil Həsən deyib.
Ramil Həsən bildirib ki, yerləşdiriləcək kontingentin bir hissəsi Ermənistandan gəlməklə Laçın dəhlizi vasitəsilə Dağlıq Qarabağa daxil olub. Bununla yanaşı, razılaşdırılmış hüquqi çərçivəyə uyğun olaraq Rusiya bölgəyə çatdırılması nəzərdə tutulan yüklərin məhz Azərbaycan vasitəsilə daşınmasını qərara alıb. Bu, həm də Rusiyanın beynəlxalq hüquqa, Azərbaycanla strateji tərəfdaşlıq münasibətlərinə sadiqliyinin əyani göstəricisidir.
“Digər tərəfdən, məlumdur ki, Rusiya Ermənistanla həmsərhəd deyil. Yüklərin təyyarələr vasitəsilə daşınması, daha sonra isə əlverişsiz, buraxılış imkanları məhdud olan Laçın dəhlizi vasitəsilə deyil, Ağdam istiqamətindən Dağlıq Qarabağ bölgəsinə çatdırılması daha məqsədəuyğundur. Çünki Azərbaycanın müasir nəqliyyat-logistika infrastrukturu bu tipli əməliyyatların həyata keçirilməsi üçün son dərəcədə əlverişlidir. Rusiyanın məsələ ilə bağlı nümayiş etdirdiyi mövqe Dağlıq Qarabağa humanitar yardım göstərmək istəyən beynəlxalq təşkilatlar üçün də nümunə ola bilər”, - deyə millət vəkili vurğulayıb.
Nardar BAYRAMLI

Paylaş:

Baxılıb: 684 dəfə