Virus daşıyıcısı olan şəxs özündən çox ətrafına zərər verir

Bakı:

18 °C

88 %

2 m/s

Əlaqə

AZ RU EN

Ana səhifə / Sosial / Virus daşıyıcısı olan şəxs özündən çox ətrafına zərər verir

Virus daşıyıcısı olan şəxs özündən çox ətrafına zərər verir

06.01.2021 [09:13]

Dünyada COVID-19 virusuna yoluxanların sayı 85 milyon nəfəri ötüb. Mütəxəssislərin sözlərinə görə, kütləvi peyvənd olunmayana və ya kollektiv immunitetin formalaşmasına qədər COVID-19-a qarşı tam effektiv olan heç nə yoxdur. Hələ ki, effektiv olan tibbi maska taxmaq, məsafə saxlamaq, əl gigiyenasına diqqət etmək, asqırma və öskürmə zamanı ağızı bağlamaq, təmasları minimuma endirməkdir.
Məsələ ilə bağlı qəzetimizə açıqlama verən Mərkəzi Neftçilər Xəstəxanasının həkim-infeksionisti Fərrux Sədirov bildirib ki, koronavirusun dünyada geniş vüsət almasını, respirator xəstəliklərin baş qaldırdığı dövrdə olduğumuzu nəzərə alsaq, daha da diqqətli olmağımız vacibdir: “Təəssüf ki, hər gün adı portala düşən koronavirus xəstələrinin daxili işlər orqanlarının əməkdaşları tərəfindən ictimai yerlərdə aşkar edilərək yaşadıqları evlərə qaytarılması və ya barələrində cinayət işinə başlanılması haqqında xəbərlər oxuyuruq. Hələ virusa yoluxub test verməyən aramızda dolaşanlar da az deyil. Buna nəzarət etmək çox çətindir. Lakin burada vətəndaşın düşüncə tərzi böyük rol oynayır. Virus daşıyıcısı olan şəxs özündən çox ətrafına zərər verir. Müalicə metodları nə qədər inkişaf etsə də, ən effektiv yol xəstəliyə yoluxmamaqdır”.
Həkim-infeksionist evdə müalicə alan və özbaşına dərman qəbul edən koronavirus xəstələrindən də bəhs edib: “Evdə müalicə ciddi nəzarət altında olmalıdır. Əfsuslar olsun ki, son zamanlarda pandemiya xəstəxanalarına müraciət edən xəstələrin əksəriyyəti xəstəliyin ilk günlərindən etibarən antibakterial, hormonal, steroid kimi preparatların kütləvi istifadəsi nəticəsində ağırlaşıb gələn xəstələrdir. Bu, qətiyyən yolverilməzdir. Xəstəliyin ilk bir həftəsi və on günü virusun çoxaldığı replikativ mərhələsidir. Bu mərhələdə heç bir şəkildə immun sisteminə müdaxilə etmək olmaz. Çünki bizim immun sistemi ilk bir həftədə maksimum dərəcədə virusu uzaqlaşdırmağa və onu neytrallaşdırmağa çalışır. Antibakterial preparatların, xüsusilə steroidlərin istifadəsi immun sisteminin cavabını susdurur və beləliklə, biz virusun bədənimizdən çıxmasını gecikdiririk. Bu da daha çox zərər və ölümə gətirib çıxarır. Mütləq şəkildə xəstəliyin ilk həftəsində xəstəyə, sadəcə maye və vitaminoterapiya ilə müalicə təyin olunmalıdır”.
Həkim-infeksionist bildirib ki, ehtiyac yarandığı halda xəstələrə sırf həkim nəzarəti ilə əlavə müalicələr təyin oluna bilər: “Antibiotiklər adından da bəllidir ki, antibakterial preparatlardır. Bu xəstəliyin törədicisi isə virusdur. Antibakterial preparatların virusa heç bir şəkildə, heç bir dozada təsiri yoxdur. Statistik araşdırmalara görə, koronavirus xəstələri arasında ikincili bakterial infeksiyadan ağırlaşma ehtimalı 9 faizdir. Yəni xəstələrin 91 faizinin antibiotikə ehtiyacı yoxdur”.
MÜŞFİQƏ

Paylaş:

Baxılıb: 660 dəfə