Yoluxma sayı artır: Səbəb nədir?

Ana səhifə / Sosial / Yoluxma sayı artır: Səbəb nədir?

Yoluxma sayı artır: Səbəb nədir?

17.08.2022 [10:40]

Y.BAYRAMOVA

Son zamanlar qonşu ölkələrdə olduğu kimi, Azərbaycanda da koronavirus infeksiyasının yoluxma sayında artım müşahidə olunur. Pandemiyanın yenidən alovlanması narahatlıqlara səbəb olub. Məlumdur ki, yoluxma sayı çoxaldıqca ölüm sayları da arta bilər. Yoluxma sayının artması müxtəlif səbəblərdən qaynaqlanır. Məsələn, insanların bir çox xarici ölkələrə getməsi və qayıdarkən yaxınlarını da yoluxdurması qeydə alınır. Digər tərəfdən bəzi şəxslər kliniki şikayətlərin fərqində olduğu zaman test verməyə can atmırlar. Elə düşünürlər ki, qripdirlər və nəticədə bu məsuliyyətsizlik də yoluxmanın artmasına gətirib çıxarır.

Xəbərdarlıq:

Səhiyyə Nazirliyinin mütəxəssis-eksperti Günay İsmayılova payız mövsümündə bir çox infeksiyaların aktivləşdiyini söyləyib. Onun sözlərinə görə, son günlər ölkəmizdə COV?D-19-a yoluxanların sayının artmasına səbəb əksər məhdudiyyətlərin xeyli vaxtdır ki, aradan qaldırılması, zaman keçdikcə qazanılmış kollektiv immunitetin zəifləməsidir: “Fəsil dəyişkənliyi insanların orqanizmində müəyyən dəyişikliyə səbəb olur. Havalar soyuduqca bədənin müqaviməti azalır, orqanizm zəiflədiyi üçün xəstəliyə yoluxma halları çoxalır. Payız aylarında tənəffüs yolu infeksiyalarının artmasının daha bir səbəbi isə havaların soyuması ilə mövsümə uyğun geyinməmək, qapalı məkanlardan daha çox istifadə etməkdir. Məlumdur ki, pandemiyanın hər yeni dalğası infeksiyanın daha sürətli və immun nəzarətindən asan yayına bilən mutant variantları törədir. Bütün bunları nəzərə alaraq ölkəmizdə koronavirus infeksiyasına yoluxma halının payızda yüksəlməsi istisna deyil”.

Yoluxmanın artmasına səbəb olan amillər

Mütəxəssislər artımı bu ilin iyun ayından yayılan və əvvəlkilərdən daha yoluxucu olan virusun yeni variantları ilə əsaslandırırlar. Səhiyyə Nazirliyi İctimai Səhiyyə və İslahatlar Mərkəzinin direktoru Qəhrəman Haqverdiyev söyləyib ki, “Omikron” indi epidemiyanın aparıcı qüvvəsidir, 8 ayda 290 milyon insanı yoluxdurub: “Onun öldürücülük qabiliyyəti təxminən 0,35 faizdir və peyvəndləmənin aktiv şəkildə aparıldığı dövlətlərdə bu rəqəm daha aşağıdır. Epidemioloqlara görə, pandemiyaya qarşı tədbirlərin yumşaldılması və ya tamamilə ləğvi yoluxucu ştamların ölkələrin sərhədləri boyunca daha sürətlə yayılmasına kömək edir. Amma müsbət xəbərlər də var. Ağırlaşma və ölüm hallarının sayı alfa, beta, qamma və ən təhlükəli delta kimi ştamların üstünlük təşkil etdiyi əvvəlki dövrə nisbətən xeyli azdır. Əlbəttə, bu ümidverici vəziyyətin yaranması peyvəndləmə səviyyəsi ilə sıx bağlıdır. Lakin buna baxmayaraq, infeksiyaların sayının artması, delta ştamları nisbətində olmasa da, ölüm hallarının artmasına səbəb ola bilər. Məhz bu səbəbdən Ümumdünya Səhiyyə Təşkilatı (ÜST) həyəcan təbili çalmağa başlayıb”.

Qeyd edək ki, ölkəmizdə koronavirusa yoluxma sayının artmasına səbəb olan əsas amillərdən biri vətəndaşlarımızın böyük hissəsinin xarici ölkələrə üz tutmasıdır. Müxtəlif ölkələrə gedənlər Azərbaycana qayıtdığı zaman öz yaxınlarını da virusa yoluxdururlar. Nəticədə son zamanlar aktiv xəstə sayının artması üçün münbit şərait yaranıb.

Xroniki xəstəlikləri olanların diqqətinə...

“Sağlamlığa Xidmət” İctimai Birliyinin icraçı direktoru Pərvanə Vəliyeva “Yeni Azərbaycan”a açıqlamasında bildirib ki, sınaqdan keçirilmiş virusdan qorunma yolları dəyişməz olaraq qalır. Onun sözlərinə görə, ilk növbədə, qapalı məkanlarda, ictimai nəqliyyatda tibbi maskalardan düzgün istifadə, otaqları tez-tez havalandırmaq, insanların sıx toplaşdığı yerlərdə iştirakı minimuma endirmək, sosial məsafəni ən azı 1.5 metr gözləmək, əl və tənəffüs gigiyenası qaydalarına əməl etmək vacibdir: “Məlumdur ki, koronavirus infeksiyası ağırlığına görə müxtəlif formalarda keçə bilər: asimptomatikdən çox ağır dərəcəyə qədər irəliləyə bilər. Sübut olunub ki, xroniki xəstəliklərdən əziyyət çəkənlər və yaşı 65-dən yuxarı olan şəxslər üçün koronavirus infeksiyası daha təhlükəlidir. Ümumiyyətlə, bütün xroniki xəstəlikləri olanlar üçün koronavirus infeksiyası təhlükəlidir. Ona görə də bu qrupda olanlar səhhətlərinə qarşı xüsusi diqqətli olmalı və daha ciddi profilaktik tədbirlər görməlidirlər. Belə ki, yanaşı xəstəlikləri, yaşı 65-dən yuxarı risk qrupuna daxil olanların səhhətində hər hansı şübhəli bir hal baş verərsə, mütləq həkimlə əlaqə saxlamaları vacibdir”.

Paylaş:

Baxılıb: 325 dəfə