Yeni növ virus təbili - narahatlığa əsas varmı?

Bakı:

24 °C

75 %

10 m/s

Əlaqə

AZ RU EN

Ana səhifə / Sosial / Yeni növ virus təbili - narahatlığa əsas varmı?

Yeni növ virus təbili - narahatlığa əsas varmı?

27.01.2023 [10:35]

Nicat PAŞA

Dünya gündəmi hər nə qədər hərbi-siyasi məzmun ilə zəngin olsa da, bəşəriyyətin bəlasına çevrilən koronavirus infeksiyası aktuallığını sözün mənfi mənasında qoruyub saxlamağı bacarır. Heç kəsə sirr deyil ki, COVID-19 ilk aşkarlandığı gündən etibarən bu xəstəlik barədə iddiaların ortaya atılması səngimək bilmir. Tibb sahəsi üzrə ixtisaslaşanlarla yanaşı, müxtəlif sənət sahibləri - biznesmenlər, analitiklər və s. - zaman-zaman koronavirus haqqında öz fərziyyələrini irəli sürürlər. Maraqlı məqam isə bundan ibarətdir ki, tibb elmi ilə əlaqəsi olmayan, lakin virus barədə istənilən fikri ortaya atan şəxsin iddiaları (ona görə ki, heç bir fakta söykənməyib) çox qısa bir müddət ərzində gündəmə çevrilir. Dünyada baş verən müxtəlif məzmunlu proseslərə dair səsləndirdiyi fikirləri ilə ictimaiyyət üçün önəmli olan personallardan biri də Bill Qeytsdir. Bugünlərdə “Microsoft”un qurucusu yeni xəbərdarlığı ilə yenidən gündəmə gəlib. Milyarderin sözlərinə görə, növbəti pandemiya COVID-19 dan daha ağır keçəcək. Onun səsləndirdiyi fikirlərdə diqqəti çəkən əsas məqam isə B.Qeytsin virusun insan tərəfindən yaradılacağını iddia etməsidir.

Virusun süni şəkildə yaradılması ilə bağlı iddialar daha əvvəllər də səsləndirilsə də, birmənalı qarşılanmırdı. Lakin sonradan bir çox mənbələrdə koronavirusun laboratoriyalarda hazırlanması barədə məqalələr deyilənlərin heç də əsassız olmadığını ortaya çıxarmış oldu. Maraqlıdır, azərbaycanlı mütəxəssislər bu barədə necə düşünürlər?

Həkim-infeksionist İbrahim Rufullayev “Yeni Azərbaycan”a açıqlamasında bəzi məqamlara aydınlıq gətirib. Onun sözlərinə görə, insanlar arasında düzgün olmayan yanaşma mövcuddur. Xəstəliyin xüsusiyyətlərindən (simptomlarından) və müalicəsindən danışan İ.Rufullayev fikirlərinə belə davam edib: “Deyə bilmərəm ki, hansısa süni şəkildə yaradılmış xəstəlik var. Sadəcə rutin bir qrip formasında keçir xəstəlik, temperatur isə gec düşür. İnsanların yanlış yanaşması var. Bu haqda, demək olar ki, hər kəs hər gün danışır. Antibiotiklərin heç bir köməyi yoxdur. Sadəcə bol maye içmək, temperaturu izləmək, 3-4 gün olan qızdırmadan sonra həkimə yaxınlaşmaq kifayət edir. Bu xəstəliyin təhlükəliliyi haqqında heç bir açıqlama yoxdur. Doğrudur, pnevmoniya verə bilir, amma bu xəstəlikdən ölən yoxdur. Yəni, ortada hər hansı bir təhlükəli məqam yoxdur”.

İ.Rufullayev ənənəvi qorunma üsullarından istifadə etməklə yayılan virusdan qorunmağın mümkün olduğunu da diqqətə çatdırıb.

Səhiyyə Nazirliyinin mütəxəssis-eksperti, infeksionist Təyyar Eyvazov isə ötən gün mətbuata açıqlamasında hazırda ölkəmizdə koronavirusla bağlı epidemioloji durumun qənaətbəxş olduğunu bildirib. Onun sözlərinə görə, ölkəmizdə yeni yoluxma hallarının sayı minimaldır: “Qeydiyyatda olan aktiv xəstə sayı çox azdır və çarpayı yüklənməsi qeyd olunmur”

Həkim hesab edir ki, bu cür stabil vəziyyət, payız-qış mövsümündə pisləşmənin olmaması nikbinlik yaradır və tezliklə pandemiyanın sonlanacağı anlamına gəlməyə imkan verir.

Paylaş:

Baxılıb: 676 dəfə