Dövlət başçılarının qarşılıqlı səfərləri və görüşləri

Bakı:

19 °C

88 %

2 m/s

Əlaqə

AZ RU EN

Ana səhifə / YAP xəbərləri / Dövlət başçılarının qarşılıqlı səfərləri və görüşləri

Dövlət başçılarının qarşılıqlı səfərləri və görüşləri

02.05.2025 [19:16]

Müşfiq Səfərov,

YAP Beyləqan rayon təşkilatının sədri

2025-ci il aprelin 28-də İran İslam Respublikasının Prezidenti Məsud Pezeşkianın Azərbaycan Respublikasına rəsmi səfəri iki qonşu və dost ölkə arasında münasibətlərin inkişafında mühüm mərhələ oldu. Səfər çərçivəsində Azərbaycan Prezidenti İlham Əliyevin mətbuata verdiyi bəyanat qarşılıqlı hörmət və əməkdaşlıq ruhunun davam etdiyini və gələcək perspektivlərə böyük ümidlər bəsləndiyini bir daha nümayiş etdirdi. Prezident İlham Əliyev bəyanatında İran Prezidenti Pezeşkianın səfərini yüksək qiymətləndirərək bu ziyarətin ölkələrimiz arasında dostluq və mehriban qonşuluq münasibətlərinin möhkəmlənməsinə xidmət etdiyini vurğuladı. O, qeyd etdi ki, Azərbaycan və İran arasında tarixi, dini və mədəni bağlar üzərində qurulmuş münasibətlər bu gün qarşılıqlı maraqlara əsaslanan strateji əməkdaşlığa çevrilməkdədir. Mətbuat bəyanatında İlham Əliyev iqtisadi sahədə əməkdaşlığın daha da genişlənməsinin vacibliyini önə çəkdi. Xüsusilə nəqliyyat və logistika sahəsində ortaq layihələrin həyata keçirilməsi regionda ticarət əlaqələrinin inkişafına böyük töhfə verir. Zəngəzur dəhlizinin yaradılması, eləcə də Şimal–Cənub beynəlxalq nəqliyyat dəhlizində iki ölkənin rolu xüsusi əhəmiyyət kəsb edir. Görüşdə enerji əməkdaşlığı, sənaye əlaqələri və bərpa olunan enerji sahəsində birgə layihələr müzakirə olunub. Həmçinin humanitar və mədəni sahələrdə qarşılıqlı əlaqələrin gücləndirilməsi üçün yeni təşəbbüslərin həyata keçirilməsi qərara alınıb.

Prezident İlham Əliyev, eyni zamanda, İranın Azərbaycanın ərazi bütövlüyünə verdiyi davamlı dəstəyi yüksək qiymətləndirib. Prezidentlərin mətbuata verdiyi bəyanatlar həm də regional sülh və sabitlik məsələlərində ortaq mövqelərin mövcud olduğunu göstərdi. Cənab Prezident İlham Əliyev qeyd etdi ki, Azərbaycan qonşuluq siyasətinə və dost münasibətlərə önəm verir və İranla əməkdaşlığın bu ruhda davam etməsini arzulayır. Regionda sabitliyin qorunması üçün dialoq və əməkdaşlıq əsas mexanizmlərdən biri kimi dəyərləndirilir. Məsud Pezeşkianın Prezident kimi Azərbaycana ilk səfəri olması baxımından bu ziyarət xüsusi əhəmiyyət kəsb edir. Səfər, ikitərəfli münasibətlərin yüksək səviyyədə davam etdirilməsi ilə yanaşı, həm də yeni mərhələyə qədəm qoyduğunun göstəricisidir. Bu səfər göstərdi ki, Azərbaycan və İran münasibətləri qarşılıqlı hörmət, mehriban qonşuluq və strateji əməkdaşlıq prinsiplərinə əsaslanaraq bölgədə sabitliyin və rifahın gücləndirilməsinə töhfə verməyə davam edəcək.

Azərbaycan Respublikası ilə İran İslam Respublikası arasında münasibətlər qədim tarixi, mədəni və dini bağlar əsasında formalaşıb və bu gün də strateji əməkdaşlıq səviyyəsində davam edir. Hər iki ölkənin ortaq sərhədə, ortaq dəyərlərə və regional maraqlara sahib olması bu münasibətlərin daha da inkişaf etməsinə zəmin yaradır. Azərbaycanla İran arasında mədəni sahədə də sıx əməkdaşlıq mövcuddur. Ortaq mədəni irsə və dini bağlara malik olan Azərbaycan və İran, bu dəyərlərin qorunub saxlanılması və gələcək nəsillərə ötürülməsi istiqamətində əməkdaşlıq edir. Azərbaycan və İran prezidentləri arasında keçirilən görüşlər zamanı humanitar və mədəni sahədə əməkdaşlıq da əsas müzakirə mövzularından biri olmuşdur. Hər iki dövlət başçısı xalqları birləşdirən tarixi, mədəni və dini bağları nəzərə alaraq, bu sahələrdə əməkdaşlığın daha da genişləndirilməsinin vacibliyini vurğulamış və müvafiq qurumlara konkret göstərişlər vermişlər. Mədəniyyət, təhsil, elm, turizm və gənclər siyasəti sahəsində birgə tədbirlərin təşkili, qarşılıqlı mədəniyyət günlərinin keçirilməsi, ortaq irsin qorunması və tanıdılması kimi təşəbbüslər gündəmə gətirilmişdir. Bu istiqamətdə konkret layihələrin həyata keçirilməsi, həmçinin elm və təhsil mübadilələrinin gücləndirilməsi üçün praktiki addımlar atılması planlaşdırılır. Belə humanitar əməkdaşlıq, iki ölkə arasında mehriban qonşuluq münasibətlərinin və xalqlar arasında qarşılıqlı anlaşmanın dərinləşdirilməsi baxımından xüsusi əhəmiyyət daşıyır.

Bütün bu amillər sübut edir ki, Azərbaycan-İran münasibətləri sağlam təməl üzərində inkişaf edir və qarşılıqlı etimada, mehriban qonşuluq prinsiplərinə əsaslanır. Bu münasibətlər, təkcə iki ölkənin deyil, bütövlükdə regionun sabitliyi və rifahı üçün önəmli rol oynayır.

Paylaş:

Baxılıb: 425 dəfə