Regiona sabitlik, təhlükəsizlik lazımdır

Bakı:

7 °C

61 %

3 m/s

Əlaqə

AZ RU EN

Ana səhifə / YAP xəbərləri / Regiona sabitlik, təhlükəsizlik lazımdır

Regiona sabitlik, təhlükəsizlik lazımdır

22.07.2025 [17:28]

İyulun 19-da Prezident İlham Əliyevin Xankəndidə “Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda III Şuşa Qlobal Media Forumunun iştirakçıları ilə görüşü zamanı bildirdi ki, Azərbaycanla Ermənistan arasında sülh müqaviləsinin mətni artıq razılaşdırılıb. Məlum olduğu kimi məhz ölkəmiz sülh prosesinin təşəbbüskarı olmuşdur. Bu mövzuda danışarkən Prezident İlham Əliyev qeyd etdi ki, İkinci Qarabağ müharibəsi bitdikdən sonra Minsk qrupunun üçlüyü hələ də çalışır, Bakıya səfər edir və onlar nə edəcəklərini bilmirdilər. Ölkə başçsı Azərbaycan tərəfinin sülh sazişinin mətnini hazırlayaraq Ermənistana göndərdiyini bildirdi. Ermənistan tərəfi həmin sülh sazişinin mətninə dırnaqarası “Dağlıq Qarabağ” məsələsini daxil etmək istəyib. Lakin Azərbaycan tərəfi qətiyyətlə bildirib ki, “Dağlıq Qarabağ” Ermənistanın təxəyyülündə mövcuddur, bu, reallıqda mövcud deyil. Bu, Azərbaycanın bir parçasıdır və sülh müqaviləsinin mətninə ölkəmizin daxili siyasətinə aid olan bir məsələ daxil edilə bilməz.

“Rəqəmsal keçidlər: Süni intellekt dövründə informasiya və media dayanıqlılığının gücləndirilməsi” mövzusunda III Şuşa Qlobal Media Forumunda Prezident İlham Əliyev müzakirələrin iki il sürdüyünü və heç bir irəliləyişin olmadığını vurğuladı. Lakin həmin əraziləri sentyabrda Azərbaycan azad edəndən sonra Ermənistan artıq bunun üzərində israr etmədi, çünki artıq bu mövzu bağlı idi.

Prezident İlham Əliyev 2024-cü ilin yanvarında real danışıqların başlanıldığını və Azərbaycanın hazırladığı layihənin mətni üzərində iş getdiyini və həmin mətnin razılaşdırıldığını açıqladı. Ölkə başçısı birmənalı olaraq bəyan etdi ki, Ermənistan konstitusiyasına dəyişiklik və ATƏT-in Minsk qrupunun buraxılması həll edilən kimi sülh müqaviləsi imzalana bilər.

III Şuşa Qlobal Media Forumunda Prezident İlham Əliyev mətnin paraflana biləcəyini və Azərbaycan tərəfinin artıq Əbu-Dabidə bu təkliflə çıxış etdiyini diqqətə çatdırdı. Tərəflər sülh müqaviləsinin imzalanmasına çox yaxındır. Ölkə başçısı bu prosesin geridönməz xarakter aldığını və Azərbaycanın heç nəyi yenidən müzakirə etməyəcəyini bəyan etdi. Əgər Ermənistan yenidən müzakirəyə başlamağa çalışırsa, o deməkdir ki, onlar sülh istəmirlər. Deməli, o ərazi iddiası qalır. Ölkəmizin düzgün istiqamətdə olduğunu qeyd edən Prezident İlham Əliyev Ermənistan tərəfinin ev tapşırıqlarını yerinə yetirməli olduğunu bildirdi. Bu baş verdiyi halda sülh müqaviləsi imzalana bilər. Sülh müqaviləsinin imzalanması region üçün çox böyük yenilik, çox böyük dəyişiklik olacaq, deyə, Prezident İlham Əliyev III Şuşa Qlobal Media Forumunda qeyd etdi. Cənubi Qafqaz sabitlik məkanı olacaq. Regiona sabitlik, təhlükəsizlik lazımdır. Çünki Cənubi Qafqaz əsrlər boyu qan tökülməsi, toqquşma, işğal məkanı olmuşdur və Qafqaz xalqları çox əziyyət çəkiblər. Ona görə də kifayətdir, region ölkələri artıq sülh şəraitində yaşamalıdırlar.

Əlişah Rəcəbov,

YAP Ağdaş rayon təşkilatının sədri

Paylaş:

Baxılıb: 297 dəfə